1 AVAKOLINDO 1

1Pawulo, yendakemelitwe mbe mwigendo va Kilisito Yesu kwa uwende wa Nguluvi, pamwinga na umunyalukolo vangu Sositene, 2Kulikanisa lya Nguluvi lyelili uko ku Kolindo. Nyenye mukesiwe kwa ukuhanga na Kilisito Yesu, mwakemelitwe sambi muve vanu va Nguluvi mwiva pamwinga na avanu mbevali, vevakumusunyalila Umutwa vetu Yesu Kilisito, ye Umutwa vawo na vetu na hwehwe. 3Nguvasukila uwende na uwikalakunoga ukuhuma kwa Nguluvi udadetu na Umutwa vetu Yesu Kilisito. 4Nane ngumulumba Nguluvi vangu mbepali ukwimila nyenye pakuva kwa uwunofu wakwe akavapelye uwuwuya wakwe ukwimila Kilisito Yesu. 5Pakuva, kwa ukuhanga na Kilisito mukanonite mwa mbefili. Mukapelitwe uwuseela mbewuli na uludali mbeluli ulwa ukudalika, 6Ulukani lwa Kilisito lukangasiswe mwanyenye, 7na simwigaya ikipelwa chechekivesaga cha kimuhe, pemwisindila ukugubulwa kwakwe Umutwa vetu Yesu Kilisito. 8Umwene avakangasa nyenye mbaka kumudugo sambi samuwoneke simwivananzi ikimunyi kila cha Umutwa Yesu Kilisito. 9Nave yemwene yeavakemelye nyenye, sambi muhange na umwanakwe Yesu Kilisito Umutwa vetu umwene ye vakwihuvilwa. 10Vanyalukolo, nene nguvagongola hilo, mwitawa lya Umutwa vetu Yesu Kilisito: muvelage mulaganie kumwi mbemuli mwa mbesili semwilonga, kulemwage ukuva na ulwigawo kwa nyenye; muvelage na amahosa gamwi kangi mwilamulila kumwi mbemuli. 11Vanyalukolo vangu, ing'ani sengapulike ukuhuma kwa avanu avamwi va mukaye ya Kulove, silagila pelu hela ukutigila uko kwina lwitakilo. 12Ndisaka ukutigila de: umunu yeyeavesaga ilonga ulwakwe: uyumwi itigila, “Nene ndiva Pawulo,” Uyungi: “Nene ndiva Apolo,” uyungi kangi: “Nene ndiva Kefa,” na uyungi: “Nene ndiva Kilisito.” 13Mbi, Kilisito akigavite? Mbi, Pawulo yeatumbikwe ukwimila nyenye? Na kangi tutigile, mbi mwabatisiwe mwitawa lya Pawulo? 14Nene ngumulumba Nguluvi ulwa sindamubatisisi umunu yeyeavesaga mwa nyenye pesi Kilisipo na Gayo hela. 15Sweno nambi nditigila asupali yeatigila akabatisiwe mwitawa lyangu. ( 16Aha mundegepele, kumbi ndabatisise kangi avanu va mukaye ya Sitefana; neke vevalutye paiva, singwiwuka wone ndabatisise umunu uyungi yeyeavesaga.) 17Pakuva Kilisito sianumiti ukubatisa, pesi ukudalika Ulukani Ulunofu, kangi ndadalikige si kwa ukwimila indongele ya uluhala sambi uludali lwa ifwa ya Kilisito mu musalaba salulava lugaya cha kwambula. 18Pakuva ulukani ulwa ifwa ya Kilisito mu musalaba, lwiwoneka nda lukani lwa wupuva kwa vala vevisogola kukuyaga, neke kwa hwehwe yetuli mung'asi ya uwupoki ulukani ulo, lwe ludali lwa Nguluvi. 19Pakuva Uwandike Uwelu witigila: “Nene sanzananga uluhala lwa avene avanyaluhala. na ukwimba kwa avaseela sandikutosa kutali.” 20Mbi alikwi lino, umunyaluhala? Mbi alikwi lino, umwigisi va indagilo? Mbi alikwi yula umuseela va ulubesa va ifilo ifi mbi alikwi? Mbi si Nguluvi aluwuyipe uluhala lwa mung'i luve wupuva? 21Pakuva, kwa uluhala lwa Nguluvi avanu sivahwaniti ukumukagula umwene ukwimila uluhala lwawo. Neke kangi ulungi na ulo, Nguluvi awendite ukuvapoka vala avifuuwa kwa ukwimila lula lwe avanyaluhala vitigila wupuva, kwa lula ulukani lwetwidalika. 22Avayudaya visaka ikilagilo, na Avagiliki nawo visaka uluhala, 23Neke hwehwe tukumudalika Kilisito yevamutumbikea Kwa Avayudaya ulukani lulu kikuvaso, na kwa Avamyanza ulukani ulu wupuva. 24Neke kwa vala avakemele, Avayudaya na Avagiliki, Kilisito ye uludali na uluhala lwa Nguluvi. 25Pakuva chekiwoneka wupuva kwa Nguluvi, icho chekiva kina uluhala ululutye uluhala lwa avanu, na chekiwoneka ukuva kihomefu kwa Nguluvi, icho chekiva kikangafu hilo ukulutila uwukangafu wa avanu. 26Vanyalukolo, mwiwukage ulusika pemwakemeligwe: Awolofu mwanyenye sive vanyaluhala nambi kwa amahosa ga uwunu; avangi sive vanyaludali nambi ukuva vatambule. 27Kwekutigila, Nguluvi ahagwe ifinu fila fye mung'i fiwoneka wupuva; sambi avahongele inyoni vala avanyaluhala na kangi ahagwe fila fye mung'i fiwoneka fihomefu, sambi avahongele inyoni avakangafu. 28Nguluvi ahagwe fila fye kwa amahosa ga mung'i fiwoneka si kinu na fihele fibedalwa, ifinu fye siuhwaniti nambi ukwihosa ukuta kofili sambi kwa ukukola mwa fifyo anange fila fye kwa amahosa ga avanu fiva fitambule. 29Sweno, asupali umunu yeivahila ikinu chechekivesaga pamiho ga Nguluvi. 30Umwene ye kilamuko cha uwumi wenyu mwa Kilisito Yesu ye Nguluvi amuwuyipe ave luhala lwetu, uwugolofu wetu na ukweswa kwetu na uwukombolwa. 31Sweno, ndawe lwewilonga Uwandike Uwelu: “Yeiwenda ukwivahila, sweno, ivahilage ikipigo cha Umutwa.”

will be added

X\