TITO 3

1Abantu bawe obaijukye okuhulira abatwazi n'abaina obushobora, bagire omuhuliro, baikare betekatekire kukora buli mulimo ogurungi. 2Batagambaho kubi muntu, belinde enkungana, bagire obuchulezi n'obufura aha bantu bona. 3Ichwe eirai twabaga bafera, titwagiraga muhuliro, tukaba tuhabire, twabaga bairu b'obunyama, n'amairu agatali gamoi, oburora bwaitu bwabaga bw'omutima gubi n'akachubirano, abantu batunobaga mara naichwe tukaba nitunobangana. 4Kyonkai kwema orwo twamanyire okwo Ruhanga Omurokozi waitu aba murungi mara atugonza n'obufura, 5akaturokora ti aha rwa bigiro byaitu bya bugorogoki, shana aha rw'obuganyizibwe orwo twayogiibwe n'amaizi tukazarwa buhya twahindurwa bahya omu mani ga Mwoyo Mutakatifu, 6owo yatutungire amanaganage tujwangane na Yesu Kirisito Omurokozi waitu, 7tubone kugarulirwa aha rw'ekishakye tukaba basika orwo tulikushuubirayo oburora obutalihwaho. 8Ekigambo eki ky'amazima. Ningonza k'obakomeleza ebigambo ebi, balinya abesiga Ruhanga bashobore kugira obwegendeleza kuta nibakora kurungi. Ebi birungi muno mara by'omugasho aha bantu. 9Nawe iwe oyelinde empaka z'obufera, orutondelezo rw'abagurusi b'amahiga, akahukano, n'okuhakanisa amateka, kuba ebyo bya katozi mara tibina mugasho. 10Omuntu alikuletera banu akaahukano, k'oramara kumuhana limoi anga kabili, omuhwemu. 11Aho oramanya okwo omuntu nk'ogwo ali mubi mara mufakare. Wenene wenkai naba yayeramwire. 12Orwo ndakutwekera Aritemi na Tikiko, oyanguhe muno onshange Nikopoli, ndamwire kuba niyo malira ekirumo ky'embeho. 13Okore okwo olikushobora kubonera Zena omubuya w'amateeka, na Apolo eby'okugenda nabyo; oshare amagezi bataburwa kantu. 14Kandi abantu baitu ab'okwo bamanye kwikara nibakora emilimo y'ekitinwa n'okujuna banu orwo bakwatwa, babe bantu b'omugasho. 15Abo nyinabo bona nibakushura. Naiwe onshulire abalikutugonza tujwangaine nabo omu kwikiliza. Omugisha gwa Ruhanga gube nainywe inywena.

will be added

X\