TITO 2

1Kyonkai iwe ogume, oyegese eby'amazima. 2Ogambire abagurusi bamanye okwebalira, bagire obwelinzi, bakoze amagezi, bagume omu kwesiga n'omu ngonzi, mara batahindukana. 3Abakaikuru nabo kutyo, obagambire bekunire omu migilire, baleke okugonza enkuru n'etamiiro. Begese ebintu birungi, 4mara begese abakazi bato kugonza baibabo n'abaana babo. 5Babe bantu b'amagezi, bagire obwera bw'omwoyo, bamanye amaka gabo, babe bafura, kandi bagire omuhuliro ahali bashaija babo, ekigambo kya Ruhanga kitaija kikagaywa. 6Kutyo ogambire abasigazi bate nibefutatira. 7Na iwe omuli buli kantu obe bulebero burungi, omu kwegesa kwawe ozoke okwo olikwegesa eby'amazima, n'okwo otalikuzana, abantu batakwetwaliliza. 8Omu fumoro yawe batakumoga, nirwo omubisha arashonara akaburwa ekyo aratuneenaho. 9Abairu obagambire okugira omuhuliro ahali bakama babo, mara buli kantu bakakore kurungi. Baleke kushenga bakama babo, 10n'okwiba obuntu obuke buke chei, bagire obwesigwa nyakabara, bakore kurungi buli kantu baihwe ahali bonene bashemelerwe ebyo balikwegesibwa ahali Ruhanga Omurokozi waitu. 11Nobona Ruhanga akagilira abantu bona ekishakye kabarokoka. 12Aha rw'ekisha ekyo akatujuna twamanya Ruhanga, twayejuma amairu g'ensi, twashobora kurora tuchuleire, tuli bagorogoki, twarora oburora obutakatifu omu nsi egi, 13tulindiliire eshuubi yaitu enungi, nikwo kugaruka kwa Ruhanga waitu Nyamukuru mara Omurokozi waitu Yesu Kirisito omu kitinwa, 14ayatwehaire kutuchungura omu ntambara zona n'okweyeleza abantu abe abalikwitanira ebigiro birungi. 15Ebigambo ebi obigambe. Kandi ohane abantu n'okubatera aha mutwe, okoze obushobora bwona. Omuntu n'omoi atalikugaya.

will be added

X\