TITO 1

1Inye ndi Paulo, omwiru wa Ruhanga mara entumwa ya Yesu Kirisito, ayatumirwe omu ndonkwa za Ruhanga kabeyongera omu kwikiliza n'omu kumanya amazima againamu okutina Ruhanga, 2baina eshuubi y'oburora obutalihwaho obwo Ruhanga, atachwa igambi yatushuubize ensi etakatonzirwe. 3Kandi orw'obukiro bwonene bwagobire, oburora obwo Ruhanga Omurokozi waitu yabutwoleka omu kigambo ekyo Ruhanga Omurokozi waitu yankwasize mara akandagira kukiranga: 4N'inye ndikukuhandikira, iwe Tito, omwana wange ow'amazima omu mujwangano gwaitu omu kwikiliza kumoi. Ruhanga Isheichwe na Yesu Kirisito Omurokozi bakugilire ekisha, bakutunge n'emilembe. 5Ekyo nakusigiire Kirete nkagonza k'oshemeza ebyabaire bisigaliire, kandi n'okutaho abagurusi omu bigo byona nk'okwo nakuragiire. 6Omushaija abe atainaho kamogo, ashangwe aina omukazi omoi, n'abaanabe babe nibesiiga, mara batalikwetwa biraragwa anga kugira lyeleme. 7Asikofu, omusigire wa Ruhanga, naragirwa kutagiraho katalizi. Ataba muntu wa ikuru anga alikuzibiitana bwangu, ataba ntamiizi handiki ntemangani anga kurujuukira magoba omu mulimo gwa wenene. 8Abe muntu omufura, omuntu w'emilembe, alikwelinda, omugorogoki, omutakatifu mara ayefutatire. 9Agume aha kigambo ky'amazima nk'okwo kilikwegesibwa, nirwo arabona kwegesa abantu eby'okwegesa eby'amazima n'okukiza amani abalikuhakanisa amani. 10Nobona haliho abashengi bangi, abalikusharangura amagambo mara ngobya, kandi omuno balinya abatatahiliirwe. 11Aho obasize, ahakuba nibatabangura amaka g'abantu nibabegesa ebifire ebyo batasaine kwegesa, bagendeleire kubona empiya z'obushai. 12Omoi omuli bonene abo, omurangi mutahi wabo, akagamba ati, «Rwona rwona Abakirete bagamba ebishuba, bikaaka by'eitima, kandi benda okulyaguzibwa batakozire milimo.» 13Eki akakigamba akiboine. Aha rw'ekyo obatere aha mutwe n'amani, nirwo baraguma omu kwikiliza, 14kushaaga okuhuliliza ebigano by'Abayahudi anga okukwata eby'abantu abalikwanga amazima. 15Abantu barungi babona ebintu byona bili birungi; kyonkai abantu babi mara batakansi tibabona karungi, kuba amagezi gabo gakahagara, kutyo n'ebitekelezo byabo. 16Nibagamba okwo bamanya Ruhanga, kyonkai omu bigiro byabo nibamwetonga. Nibasheshemukya, bantu abataina muhuliro, tibaina karungi kona kona ako bakushobora kukora.

will be added

X\