ABAROMA 9

1Ningamba amazima omuli Kirisito, tindikubeiya. Omutima gwange nigunjulira omuli Mwoyo Mutakatifu, 2okwo nyina obujune bungi n'obushasi bwa buli kaanya omu mwoyo gwange. 3Omu bwange nakugondize mbe muraamwa mara mushendwa ahali Kirisito aha rwa barumuna bange abanyabuzare bange aha bunyamubili. 4Nibo Baisiraeli abahairwe egabo y'okuba baana ba Ruhanga, ekitinwakye, endaganoze. Amateka, emigenzo y'okumufukamira, n'ebyaragainwe. 5Nibatabuka ahali batat'enkurw'ichwe ab'eirai, kandi na Kirisito aha bunyamubili, w'eihanga lyabo. Ruhanga omutwazi wa bona asingizibwe eirai lyona. Amina. 6Kyonkai tikwo kugir'oti ekigambo kya Ruhanga tikyagasire. Tikugir'oti bona abalikutabuka ahali Isiraeli ba Isiraeli, 7kandi ti bona baana ba Aburahamu kuba baijukuru, kyonkai kikagambwa kiti, «Baijukuru bawe balyetelerwa ahali Isaka.» 8Eki nikimanyisa okwo abaana aba Ruhanga ti ba bunyamubili, shana abaana ab'endagano nibo balikwetwa baijukuru. 9Ekyaragainwe nikigenda kiti, «Omu bukiro nk'obu ndigaruka mara Sara aliba aina omwana w'omwojo.» 10Kandi t'ekyo kyonkai, na Rebeka kwakwo akazara abaana babili aha mushaija omoi, tat'enkurw'ichwe Isaka. 11N'orwo abaana abo babaire batakazairwe nangu batakakozire kirungi anga kibi, entegeka ya Ruhanga y'okuronka Isiraeli ebone kugumaho, ti aha rwa bikorwa bya bantu kyonkai mweto gwa Ruhanga, 12Rebeka ogwo akagambirwa ati, «Omukuru alitwarwa omuto.» 13Nk'okwo kihandikire kiti, «Nkagonza Yakobo kyonkai nanoba Esau.» 14Mbwenu tugambeki? Tuti Ruhanga takoza mazima? Nikikabure! 15Enshonga nagambira Musa ati, «Ndaganyira owo nganyira; mara wenene ogwo owo ndiganyira ndamugilira obuganyizi.» 16Aha rw'ekyo tikili aha bweyendezi bwa muntu, shana aha buganyizi bwa Ruhanga, 17n'ebihandiko nibigambira Farao biti, «Nkakuha obukama kukwolekeraho obushobora bwange obuli omuli iwe, eibara lyange lirangaanwe omu nsi zona.» 18Kityonu Ruhanga agilira obuganyizi wena wena ow'agonza, kandi agumanganisa omutima gwa kaishe muntu owo ayenda. 19Noija kumbaza oti, «Kubaki akyakwata abantu omushango? Isi n'ohai ayakumwangira eky'ayenzire?» 20Kyonkai iwe wab'ohai, omuntu kuhorora Ruhanga? Ekibumbano kyakubaza ayakibumbire kiti, «Kubaki wambumbire oti?» 21Isi omubumbi taina bushobora aha ibumba, omw'ibumba elyo yakaata kwihyamu ekikwato kirungi n'ekindi eky'okukoza ebintu ebya buli kiro? 22Nikyo kimoi n'ekyo Ruhanga akozire. Akagonza kwoleka ekinigakye n'okumanyisa obushoborabwe. Kyonkai abo yabaire anigaliire kwija kubasilikya akabegumisiliza muno. 23Kandi akashuba yagonza kwoleka okwo ekitinwakye kili kingi muno ekyo yatutungire ichwe abo yaganyiire, nibo balinya omuli ichwe ab'atekatekire kutungwa ekitinwa. 24Tuli bantu abo ayesire, ti mu Bayahudi bonkai, kyonkai mpaho n'omu Banyamahanga. 25Eki nikyo alikugamba omuli Hosea ati, «Ababaire batali bantu bange ndibeta ‹Bantu bange,› n'eihanga elitagonzibwaga ndilyeta ‹Mugonzibwa wange.› 26Kandi aha mwanya gwonene gwonene mbali bagambiirwe bati, ‹Timuba bantu bange,› honene aho barayeterwaho, ‹Baana ba Ruhanga Asingire.› » 27Na Isaya nagamba ahali Isiraeli ati: «N'orwo orubara rw'Abaisiraeli rulishusha omushenye gw'enyanja, abaliruhonokaho nibo balirokoka; 28kuba ekyo Ruhanga yagambire kukora ensi naija kukikora n'amani mara omu bwangu bwangu.» 29Kandi nk'okwo Isaya yabaasire ati, «K'Omukama w'amahe atakutusigiireho baana, twakubaire nka Sodoma, tushusha Gomora.» 30Mbwenu aho tugambeki? Abanyamahanga abatakoraga bya bugorogoki babaire bagorogoki, obugorogoki bwabo nibwo buruga omu kwesiga. 31Kyonkai Isiraeli abakoraga eby'obugorogoki basimbize aha Mateka tibashoboire kuhikya Mateka galinya. 32Ahakubaki? Enshonga eby'obugorogoki ebyo tibabikolize mani ga kwesiga, bakaba basimbize aha bikorwa. Basitaire aha «Ibare elisitarwaho,» 33nk'okwo kihandikire kiti, «Mulebe, nateka eibare omuli Sioni elilisitaza abantu, orwazi orulibagwisa; kandi alikamwikiliza talikwatwa nshoni.»

will be added

X\