ABAROMA 7

1Barumuna bange, ningambira abalikumanya Amateka, nimumanya okw'omuntu aragirwa Amateka orwo aba akyarora? 2Tugambe omukazi omushwerwa, Amateka nigamukoma ahali iba orwo iba ogwo akyarora. Kyonkai orwo iba afa, Amateka agalikumukoma ahali iba gamutaishura. 3Kyonkai k'aratura n'omushaija ondijo okwo iba akyarora arayetwa nsiyani. Nawe iba k'arafa aho Amateka nigamutaishura, mara k'arashwerwa omushaija ondijo ti nsiyani. 4Nikyo kimoi barumuna bange, nainywe kwakwo Amateka tigakibakomire ahakuba muli ngingo z'omubili gwa Kirisito. Mbwenunu muli ba Kirisito ogwo ayahimbukire omu bafu tushobore kuba bantu b'omugasho orwo tulikukolera Ruhanga. 5Orwo twabaire tukyarora oburora obw'obunyama, amairu gabi agatengibwaga Amateka, emibili yaitu gakaba gagili kubi. Ekyaturugiire omwo twafa ichwena. 6Kyonkai mbwenu Amateka twagachungukiremu. Byonene ebyo ebyatuhinduraga bairu bikatwisa. Aha rw'ekyo titukigeleerwa Mateka ag'eirai agahandikirwe, shana ekiliho nitugeleerwa oburora obuhya obwa Mwoyo. 7Mbwenu tugambeki? Tuti Amateka nibwo buba bufu? Nikikabure! Kandi okwo k'Amateka gatakubaireho, obufu tinakubumanyire. Tinakumanyire okwegomba kiki k'Amateka gatakugambire gati, «Otalyegomba.» 8Kyonkai obufu bukekwatiliza emihango, bwandetera okwegomba okwa buli ngeli. K'Amateka gataliho n'obufu tibuliho. 9Haliho orwo naroraga obuzira Mateka; kyonkai orwo emihango yagiireho, obufu bwaija, aho nafa. 10Emihango yonene yonene elikushuubiza oburora yaba niyo enyita yonene. 11Obufu bukekwatiliza emihango, bwambeiya bwanyisa emihango. 12Kityo Amateka gaba gatakatifu, n'emihango eba mitakatifu mara y'amazima kandi mirungi. 13Mbwenu aho ekyo ekili kirungi kikanyita? Nikikabure! Obufu nibwo bwanyisire. Bukankoza ekili kirungi bwanyita, bubone kumanyika bwoli okwo bwemire. Kityo obufu nibumanyikira omu mihango okwo bwina amani gabi agashaagulirane. 14Nitumanya okwo Amateka gagira omwoyo; kyonkai inye nyina omubili obufu bukangura. 15Ebyo inye nyenene ndikukora tindikubishobokerwa. Ekyo ndikwenda tikyo ndikukora; ninkora ekyo ntalikwenda. 16Mbwenu kandikukora ekyo ntalikwenda, aho ninyikiliza okwo Amateka gaba garungi. 17Kityonu takyali inye alikukikora, nikikorwa obufu obulikutuura omuli inye. 18Aha rw'enshonga nimanya okwo taliho kantu karungi akalikutura muli inye, nikwo kugamb'oti, omu bunyama bwange. Ninshobora kwenda ekili kirungi kyonkai tindikushobora kukikora. 19Aha rw'okuba tindikukora kirungi kyo ndikwenda, shana ekibi ekyo ntalikwenda nikyo ndikukora. 20Mbwenu aho kandikukora ekyo ntalikwenda, takyali inye alikukikora, nikikorwa obufu obulikutuura omuli inye. 21Kityo nimbona okwo Amateka galikukora: Orwo ndikwenda kukora ekili kirungi, ekili kibi nikiba kyagobire. 22Okwo ndi omu mwoyo ninshemelerwa Amateka ga Ruhanga, 23kyonkai omu ngingo zange nimbonamu Amateka agandi nigarashana n'Amateka ag'omwoyo gwange gulikusiima mara nigampindura mbohe y'Amateka g'obufu agalikutuura omu ngingo zange. 24Inye omunaku! N'ohai alinyihya omu mubili ogu ogulikugya kunyisa? 25Ruhanga nakasinge omuli Yesu Kirisito Omukama waitu! Kityonu inye omu bwange ninkunda Amateka ga Ruhanga n'omwoyo gwange gwona, kyonkai kandi ninkunda Amateka g'obufu n'omubili gwange.

will be added

X\