ABAROMA 6

1Mbwenu tugambeki? Twikare omu bufu k'ekisha kiba kingi? 2Nikikabure! Ichwe abataaniire kimoi n'obufu, twakurora tutai nitugendelera kufakara? 3Timulikumanya okwo ichwe chwena ababatiziibwe kurondora Kirisito tukabatizibwa kumurondora n'omu kufakwe? 4Aha rw'ekyo tukaziikwa hamoi nawe orwo twabatiziibwe kufa, tushobore kubona oburora obuhya nka Kirisito ow'ekitinwa kya Isheichwe kyahimbwire omu bafu. 5Katuraba tubaire ba wenene aha rw'okuba tufire nka wenene, mazima turaba ba wenene orwo tulihimbuka nka wenene. 6Nitumanya okwo twabaire tuli eirai, tukabambwa nawe, amairu g'omubili gabone kuchweka, obufu bulekere kutwetwaliliza. 7Aha rw'enshonga ayafire obufu tibumwetwaliliza. 8Kyonkai katuraba twafire na Kirisito, nitwesiga okwo tulishuba tukarora nawe. 9Enshonga nitumanya okwo orwo Kirisito yahimbukire omu bafu talifa rundi n'akake; rufu takimugeleera. 10Orufu orwo yafire rukaba ruli rufu rw'okutaanira kimoi n'entambara, mara akafa limoi lyonkai. Kyonkai oburora obwo alikurora naburora ali wa Ruhanga. 11Kityo na inywe nimuragirwa kwebona nk'abataaniire kimoi n'obufu, mara murore muli ba Ruhanga omuli Kirisito Yesu. 12Aha rw'ekyo obufu buleke kwetwaliliza emibili yanyu elikwija kuhwaho, kubakora kamuhondera amairu gayo. 13Engingo zanyu mutazijubura kufakara, zitaba bikwato bya kukoza ntambara. Mwehongere Ruhanga, mube bantu abaihirwe omu rufu mukaletwa omu burora, n'engingo zanyu muzihongere Ruhanga zibe bikwato by'okukoza ebikorwa by'obugorogoki. 14Obufu tibubetwalilize, enshonga timulikugeleerwa Mateka, shana nimugeleerwa ekisha. 15Mbwenu aho tukoreki? Tufakare aha rw'okuba nitugeleerwa ekisha titulikugeleerwa Mateka? Nikikabure! 16Timulikumanya okwo kamulikwehongera omuntu wena wena kuba bairube kumuhulira, muli bairube kwo orwo mulikuhulira? Nimuba bairu b'obufu obwisa, anga nimuba bairu b'omuhuliro ogugiza oburora obugorogoki. 17Kyonkai Ruhanga nakasinge! Kuba eirai n'orwo mwabaire muli bairu b'obufu, mbwenu mwagizire omuhuliro n'omutima gwanyu gwona aha mazima agalikushangwa omu byomwegesiibwe. 18Orwo mumazire kurokorwa omu bufu mwaba bairu b'obugorogoki. 19Ningamba okwo abantu bagamba, aha rw'enshonga y'amani gake ganyu ag'obuhangwa. Nk'okwo eirai engingo zanyu mwazikozaga eby'enshoni n'amafu agashagulirane, kityo mbwenu engingo zanyu ezo muzikoze eby'obugorogoki mubone kuba batakatifu. 20Orwo mwabaire mukyali bairu b'obufu, mukaba mutagelerwa bugorogoki. 21Kyonkai mbwenu ebintu ebilikubakwasa enshoni mwaha mukyabibonamu mugashoki? Endekelero y'ebintu ebyo ni rufu. 22Orwo mwachungwirwe omu bufu mukaba bairu ba Ruhanga, omugasho ogwo mulikubona ni kuhindurwa batakatifu, n'endekeelero yagwo burora obutalihwaho. 23Empeerwa y'obufu ruba rufu, kyonkai egabo ya Ruhanga eyo aha aha rw'embabazize, buba burora obutalihwaho aha rwa Kirisito Yesu Omukama waitu.

will be added

X\