ABAROMA 4

1Lero tugambeki ahali Aburahamu, tat'enkurw'ichwe aha bunyamubili! 2Ka Aburahamu ebikorwa biraba nibyo byamuhindwire mugorogoki, aina eky'okwebuga, kyonkai ti ahali Ruhanga. 3Isi ebihandiko nibigambaki? «Aburahamu yayesigaga Ruhanga, yabarwa okwo ali mugorogoki.» 4Omuntu akakora omulimo empeerwaye teba gabo, shana eba hakiye. 5Kandi n'omuntu atakora mulimo akesiga Ruhanga ogwo ahindura ababi kuba bagorogoki nabarwa okwo ali mugorogoki aha rw'okwesigakwe. 6Kityo Daudi kwakwo naha omuntu omugisha owo Ruhanga alikubona okwo ali mugorogoki etali nshonga ya bikorwa, ati, 7«Baina omugisha abagarulirwa entambara zabo, ab'amafu gabo gataijukwa; 8muberwa omuntu ow'Omukama atalikwata ntambara.» 9Isi omugisha ogu nigugya aha batahiriirwe bonkai, anga kwakwo n'abatatahirirwe? Nitugamba okwo Aburahamu yamanyikiire okwo ali mugorogoki aha rw'enshonga y'okwesiga. 10Akamanyika atai? Akaba yatahiriirwe anga atakatahiriirwe? Akaba atakatahiriirwe. 11Akatahilirwa kali kabonero k'okugumisa obugorogokibwe obwo yabaire ainabwo aha rw'okwesiga orwo yabaire atakatahiriirwe. Omugendelero gukaba guli kumuhindura ishe bona abesiga obuzira kutahirirwa kandi oku nibamanyika okwo bali bagorogoki, 12mara kutyo ishe abatahiliirwe, abatatahirirwe kushai kyonkai nibarondoora okwesiga okwo tataichwe Aburahamu yabaire ainakwo atakatahiriirwe. 13Endagano eyo Aburahamu n'abaijukuru baraganisiibwe, okwo balisika ensi, tiyarabire mu Mateka, ekaraba omu bugorogoki obulikuruga omu kwesiga. 14K'abasika baraba bali balinya abakwata Amateka, aho okwesiga kwa bushai, kandi n'endagano teinamu kantu. 15Amateka gatabukwamu ekiniga; kandi mbali Amateka gatali n'entambara tizibaho. 16Niyo nshonga obugorogoki bwemeleire aha kwesiga, nirwo ebyaraganisiibwe birayemelera aha kisha mara bihamisibwe kuba bya baijukurube bona, ti balinya bonkai abakwata Amateka, kyonkai na balinya abaina okwesiga okwa Aburahamu, kuba aba ishe bona. 17Nk'okwo kihandikirwe kiti, «Nkakutaho k'oba ishe amahanga gangi» omu maisho ga Ruhanga owo yayesigire, atunga abafire oburora, akataho n'ebitabaho. 18Akashubira n'eby'atakushuubiire, abone kuba ishe amahanga gangi; nk'okwo yabaire agambiirwe ati, «Nikwo baijukuru bawe baliba.» 19Tiyayugire mu kwesiga n'orwo yayebonaga nk'afire kuba akaba aina emyaka 100, anga orwo yatekelezaga okwo Sara yabaire ali mugumba, 20okwesigakwe aha byo Ruhanga yabaire aragaine tigwayugire. Ekiliho akeyongera omu kwesiga, yata naha Ruhanga ekitinwa, 21namanya kabutekire okwo Ruhanga yabaire nashobora kukora ebyo yabaire aragaine. 22Niyo nshonga akaboneka ali mugorogoki aha rw'okwesiga kwa wenene. 23Ekigambo eki «Akaboneka» tikyahandikirwe aha rwa wenene wenkai, 24kikahandikwa n'aha rwaitu. Naichwe tuboneke tuli bagorogoki aha rw'okwesiga Ruhanga ayahimbwire Yesu Omukama waitu mu bafu, 25Yesu ogwo ayaisirwe naturwa amafu gaitu, yashuba yahimbuka katuba bagorogoki.

will be added

X\