ABAROMA 3

1Omuyahudi aina kakizoki? Anga omugasho gw'okutahirirwa ni guhai? 2Omugasho gungi mara gw'engeli zona. Eky'okubanza nakyo, Abayahudi nibo bakwasiibwe ebyo Ruhanga yagambire. 3Isi k'abandi omuli bonene baraba tibagizire bwesigwa? Obutesigwa bwabo nibwiza obwesigwa bwa Ruhanga? 4Nikikabure! Ruhanga agamba amazima, n'orwo buli muntu agamba ebishuba, nk'okwo kihandikirwe kiti: «Oije oboneke okwo oli mugorogoki omu by'olikugamba, osinge omushango ogw'oliramurwa.» 5K'amafu gaitu garaba nigolekya obugorogoki bwa Ruhanga, tugambeki? Tugiire tuti Ruhanga orwo atubonabonyia ti mugorogoki? (Ningamba nk'omuntu). 6N'akati! Aho Ruhanga yakuramura atai ensi? 7Ebishuba byange kabiraba nibimanyisa ekitinwa kya Ruhanga aha rw'amazima ga wenene, ahakubaki ninkwatwa omushango gw'obufakare? 8Mara aho ichwe kubaki tutalikukora bibi kabirugwamu birungi? Nk'okwo abantu abandi balikutuchwelerera ngu nikwo tulikugamba. Bonene abo baliramurwa nk'okwo baragirwa. 9Mbwenu tugire tutai? Ichwe Abayahudi tuli barungi kushaaga? Chei, n'akati; enshonga nagambire okwo abantu bona, Abayahudi n'abatali Bayahudi, obufu nibubakiza amani, 10nk'okwo kihandikire kiti, «Taliho mugorogoki n'omoi, chei taliho n'omoi; 11taliho alikushobokerwa, taliho alikwitanira Ruhanga. 12Bona bakahaba, bona hamoi bakakora kubi; taliho alikukorage, taliho n'omoi. 13Emimiro yabo nyanga erangaire, nibabeiyesa endimi zabo. Akanwa kabo kaijwire amashagwa g'empili. 14Nibagamba kubi omu kanwa, nibajuma kubi. 15Amaguru gabo gangu kwita omuntu 16okusiliikya n'enaku bili mbali balikuraba, 17omuhanda gw'emilembe tibagumanya. 18Okutina Ruhanga tibakubona.» 19Kandi nitumanya okwo kyona kyona eky'Amateka gagamba, gakigambira abatwarwa Amateka, buli muntu atalija aketonga, kandi n'ensi yona esingwe omushango omu maisho ga Ruhanga. 20Omu maishoge taliho muntu n'omoi alisinga mushango aha rw'okukora ebiragiirwe Amateka; enshonga Amateka nigo gamanyisa obufu. 21Kyonkai mbwenu obugorogoki nk'obwa Ruhanga tibulikuletwa kukwata Mateka; Amateka n'abarangi bujulizi kushai aha bugorogoki obwo. 22Obugorogoki nk'obwa Ruhanga nibuletwa okwesiga Yesu Kirisito okwo bona abalikumwikiliza bainakwo. Aha rw'okuba taliho nshororo; 23enshonga abantu bona bakafakara baferwa n'ekitinwa kya Ruhanga. 24Ekishakye eba gabo ebahindura bagorogoki, omu kuchungurwa okwo bachungwirwe Yesu Kirisito. 25Yesu Kirisito n'iwe Ruhanga yataireho kugira enyatano aha rw'obwambabwe, abalimwesiga barokoke. Ekyo kikabaho kwoleka obugorogoki bwa Ruhanga, kuba omu bwegumisilizabwe, entambara ez'eirai akaba atazifireho; 26ahali kaanya aka akagendelera kwoleka okwo wenene aba mugorogoki n'okwo ogwo alikwikiliza Yesu amuhindura mugorogoki. 27Mbwenu aho okweshalingya kwaitu kulihai? Tikuliho. Kwemeleire nkahai? Kwemeleire aha bikorwa? Chei; kwemeleire aha kwikiliza. 28Nitumanya okwo okwikiliza nikwo kuhindura omuntu kuba mugorogoki, ti bikorwa eby'Amateka garagira. 29Anga Ruhanga aba w'Abayahudi bonkai? Ti kwakwo Ruhanga w'Abanyamahanga? Nikwo, w'Abanyamahanga kwakwo, 30aha rw'okuba Ruhanga ab'omoi; alyoleka okwo abatahiriirwe abahindura bagorogoki aha rw'enshonga y'okwikiliza kwabo n'abatatahirirwe abahindura bagorogoki aha rw'okwikiliza kwabo. 31Mbwenu aho nitwihyaho Amateka aha rw'enshonga y'okwikiliza oku? Nikikabure! Shana ekiliho nitukwata Amateka okwo gali.

will be added

X\