ABAROMA 16

1Nimbakwasa munyanyaichwe Febe, omudiakonikazi w'enteko ya Kenikirea, 2mumutore omw'ibara ly'Omukama nk'okwo bikagenda aha bakirisito bataahi baitu, mumujune omuli byona ebyo arayetaaga ahali inywe, aha rw'okuba akajuna bangi nanye mbulimu. 3Munshulire Purisika na Akila, abakozi bataahi bange aha rwa Kirisito Yesu, 4abayehoiremu kunkiza ahali rufu. T'inye nyenkai, kyonkai mpaho n'enteko zona z'Abanyamahanga nizibasiima. 5Kwakwo munshulire n'enteko eli omu ka yabo. Munshulire omugonzibwa wange Epeneti ayabaire wa mbere kwekiliza Kirisito omuli Asia. 6Munshulire Maria ayabahendekeire. 7Munshulire Andoroniko na Yunia, abanyaruganda bange mara abafungwa bataahi bange: Bonene abo omu ntumwa b'eiranga mara bakanyebembera kwikiliza Kirisito. 8Munshulire Ampuliati, omugonzibwa wange omuli Mukama. 9Munshulire Urubano, omukozi mutahi waitu omuli Kirisito, na Sitekisi omurungi wange. 10Munshulire Apelesi, omwesigwa omuli Kirisito. Munshulire eka ya Arisitobulusi. 11Munshulire Herodioni omunyaruganda wange. Munshulire eka ya Narisisi omuli Mukama. 12Munshulire abakozi balinya omuli Mukama, abalimu Tirifena na Tirifoza. Munshulire omurungi Perisisi, ayachwaziikaine omuli Mukama; 13Munshulire Rufusi, enganzi y'Omukama, na nyina mara mawe. 14Munshulire Asinkiriti, Filegoni, Herumesi, Patirobasi, Herimasi n'abanyanteko abo bainabo. 15Munshulire Filologi, Yulia, Nereo na munyanya, na Olimpasi n'abakirisito bona bataahi baitu abo bainabo. 16Mushurangane nimunywegerangana ekinywegero kitakatifu. Enteko zona za Kirisito nizibakeisa. 17Kyonkai barumuna bange nimbashaba, mwekenge abateraikubo abalikwisa banu omwaga, kubahakanisa aha byo mwegesiibwe; mubatantare. 18Abantu abemire batyo tibalikukolera Mukama waitu Kirisito. Omulimo gwabo kulya. Nibakoza obugambo burungi n'okujebeka abatalikumanya bingi kubahabisa. 19Omuhuliro gwanyu nigumanyika omu bantu bona, niyo nshonga nimbebuga. Kyonkai ningonza mube bagezi mukore ebirungi, kandi mube nyakatetere mwelinde ebili bibi. 20Aho Ruhanga, entabuko y'emilembe, arayanguha ashekenyure Sitani mumulibatilire. Omugisha gw'Omukama waitu Yesu Kirisito gube nainywe. 21Timotheo omukozi mutahi wange nabakeisa; hamoi na Lukio na Jasoni na Sosipateri abanyaruganda bange. 22Inye Terisio, omuhandiki w'ebarua egi nimbakeisa omuli Mukama. 23Gayo anyegeize mara akanyegeza n'enteko yona nabakeisa. Erasito omuhanika w'ekigo, na Kwarutusi murumuna waitu, nibabakeisa. 24[Omugisha gw'Omukama waitu Yesu Kirisito gwikare nainywe inywena. Amina.] 25Asingizibwe Ruhanga, aina obushobora bw'okubagumisa omu vangeli eyo ndikuranga ningamba Yesu Kirisito, nikwo kushuuruwa kw'ekyebisho ky'okurokoka ekyabaire kitakamanyikaga kwema eirai lyona. 26Kyonkai mbwenu ekyebisho ekyo kihigire aha mushana omu bihandiko by'abarangi, n'aha rw'omuhango gwa Ruhanga ow'eirai lyona kimanyikire omu mahanga gona, bakitoze omuhuliro ogulikutabuka omu kwikiliza. 27Ruhanga wenene wenkai omumanyi, ahaisilizibwe omuli Yesu Kirisito eirai lyona. Amina

will be added

X\