1 Ichwe abagumire nituragirwa kwemera obutamosho bw'abalikuyuga, tuteshemeleza ichwe chwenane. 2 Ichwena tushemeleze bataahi baitu aha rw'obuge bwabo kubombeka. 3 Kuba Kirisito tiyayeshemeleize. Ekiliho nk'okwo kyahandikirwe, «Ebijumi by'abakujumire byabendabendera inye.» 4 Nobona ebyakahandikirwe obwa karai bikahandikwa kwegesa ichwe tubone kugira eshubi aha rw'enshonga y'Ebihandiko Bitakatifu kutugumisa n'okututamu ekihika. 5 Ruhanga atugumisize mara akatutamu ekihika abatunge omuturanwa gw'emilembe omuli Kirisito Yesu, 6 mubone kwema hamoi omw'iraka limoi kusingiza Ruhanga mara Ishe Omukama waitu Yesu Kirisito. 7 Aha rw'ekyo mukundangane nk'okwo yakunzire inywe, aha rw'ekitinwa kya Ruhanga. 8 Nimbagambira okwo Kirisito yabaire mukozi w'abatahiriirwe kuhamisa ebyo batat'enkurw'ichwe baraganisiibwe, 9 n'Abanyamahanga babone kusingiza Ruhanga aha rw'obuganyizibwe. Nk'okwo kyahandikirwe, «Orw'ekyo ndikuhaisiliza omu Banyamahanga, nshube mpoyere eibara lyawe;» 10 kandi nashuba nagamba ati, «Inywe Banyamahanga, mushanduke hamoi n'abantube;» 11 kandi bati, «Banyamahanga inywena muhaisilize Omukama, n'amahanga gona gamuhaisilize.» 12 Isaya nayongeraho ati, «Muzi gwa Yese aliija, aliimuka kutwara Abanyamahanga: Abanyamahanga balimushuubira.» 13 Ruhanga, entabuko y'eshubi akanyise ebyera n'emilembe omuli inywe inywena aha rw'okwesiga kwanyu, mubone kugira eshubi nyingi omu mani ga Mwoyo Mutakatifu. 14 Barumuna bange, inye nimanyira kimoi okwo muli bantu barungi bwoli, nimumanya buli kantu mara nimushobokerwa kwegesangana. 15 Kyonkai aha bigambo ebindi mbahandikiire n'amani gangi kubaijukya, aha rw'ekisha ekyo Ruhanga yangiliire, 16 kuba mukozi wa Yesu Kirisito omu Banyamahanga. Nindanga evangeli ya Ruhanga nk'omukuhani, ekihongo ky'Abanyamahanga, nibo Banyamahanga bonene abo Mwoyo Mutakatifu ahindwire batakatifu, kibone kwikilizibwa. 17 Aho nyina enshonga y'okwebuga omulimo gwange ogwo ndikukolera Ruhanga omu mani ga Kirisito Yesu. 18 Aha rw'okuba tindikwija kuziza kugamba kyona kyona shana ebyo Kirisito alikugamba omu kanwa kange, abone kushoboza Abanyamahanga kumuhulira omu bigambo n'omu bikorwa, 19 omu mani g'obubonero n'ebitangazo, omu mani ga Mwoyo Mutakatifu. Nzingoire kwema Yerusalemu nagoba Iliriko, nindanga kabutekire evangeli ya Kirisito. 20 Ekyo nyitanira obutosha kuba kuranga evangeli mbali Kirisito atakahulirwaga, ntaija nkombeka aha musingi gw'ondijo. 21 Nk'okwo kyahandikirwe kiti, «Abatakamugambirwagaho balimubona, n'abatakahuliraga balishobokerwa.» 22 Egi niyo nshonga eikara nentanga kubagobaho. 23 Kyonkai mbwenu orwo namazire omulimo gwange omu mikoa egi, mara n'okwo emyaka nyingi ntura n'inyegomba kubagobaho, 24 ninshubira kubabona orwo ndaba ningya Hisipania, ninshubira n'okwo muranshagarayo, kyonkai mbanze mbakyalire buzima akaanya kake. 25 Kyonkai aha rwa mbwenu aha ningya Yerusalemu kutwalira abakirisito bataahi baitu eshumbusho. 26 Masedonia na Akaya bategekire kugira ebyo babonera abakirisito bataahi baitu abetaage ba Yerusalemu. 27 Bakitegekire, mara mazima baragiirwe, aha rw'okuba k'Abanyamahanga baraba bakunzire ebirungi byabo by'omwoyo, na bonene kwakwo baragiirwe baheho Abayahudi ebyo bainabyo. 28 Aha rw'ekyo orwo ndaba namazire ekigambo ekyo, nkamara kuheleza ebigizirwe, ndabaletwaho orwo ndaba ningya Hisipania. 29 Mara nimanya okwo orwo ndaija okwo ndaija n'emigisha ya Kirisito ekinje. 30 Barumuna bange nimbatagiliza mbataireho Omukama waitu Yesu Kirisito n'engonzi ezilikutabuka ahali Mwoyo, tweme hamoi kushoma enshara n'amani, munshabire ahali Ruhanga, 31 mbone kukira aha bataikiliza ba Buyahudi, n'eikora lyange aha bakirisito bataahi baitu aba Yerusalemu libone kubashemelera. 32 Ruhanga k'arayenda ndashemelerwa kubagobaho mara mbaikareho nyikyemu. 33 Ruhanga entabuko y'emilembe abe nainywe inywena. Amina.
