ABAROMA 14

1Kandi omuntu alikuyuga omu kwesiga mumunyegeze. Kyonkai mutahankana nawe. 2Omu myesigireye omuntu yakushobora kulya buli kantu; nawe kandi alikuyuga ogwo nalya emikubi yonkai. 3Alikulya atagaya alikwetanga. N'alikwetanga ataramura muntu alikulya; aha rw'okuba Ruhanga amukunzire. 4Iwe wab'ohai kuramura omwiru w'ondijo? Mukamawe n'iwe aramura nka yakora kurungi anga nka yakora kubi. 5Haliho omuntu alikubona kir'eki kili kirungi kushaaga ekindi, kandi ondijo nabona ebiro byona nibishushangana. Buli muntu aramure okwo alikubona omu bwa wenene. 6Ahikya ekiro akihikya kukunisa Omukama. Kwakwo n'alikulya nalya kukunisa Omukama, aha rw'okuba nasiima Omukama. Kandi alikwetanga nayetanga kukunisa Omukama mara nasiima Ruhanga. 7Taliho n'omoi omuli ichwe arora anga afa aha bwa wenene. 8Katulikurora niturora aha bw'Omukama. Katulikufa nitufa aha bw'Omukama. Kityonu tulikarora anga tulikafa tuli b'Omukama. 9Aha rw'enshonga egi nikyo Kirisito yafeleire akashuba akarora, abone kuba Mukama w'abafire n'abalikurora. 10Kiki iwe kuramura murumuna wawe? Anga iwe kubaki nogaya murumuna wawe? Nobona ichwena tulyemelera omu maisho g'enketo ya Ruhanga ey'eiramu; 11kuba kikahandikwa kiti, «Omukama nahanga ati, Nk'okwo ndi murora, buli muntu alinfukamaho, na buli rulimi rulisingiza Ruhanga.» 12Kityo ichwena tulyetonda obusigire ahali Ruhanga. 13Ahonu tutazigilira kuramurangana. Ekiliho mulekere kutamisangana n'okusitazangana. 14Nimanya mara nyina amazima omuli Yesu Omukama okwo hatabaho kintu kihagare omu buhangwa bwakyo; shana kihagare omuli olinya alikutekeleza okwo kili kihagare. 15Murumuna wawe k'arasitazibwa eky'olikulya, eby'olikukora oraba otalikubikozibwa ngonzi. Eby'oralya bitaisa muntu owo Kirisito yafeleire. 16Kityo ekirungo kyanyu kitagambwaho kubi. 17Obukama bwa Ruhanga ti kulya anga kunywa, shana obugorogoki n'emilembe n'ebyera omuli Mwoyo Mutakatifu. 18Alikukolera Kirisito omu ntwaza egi akundwa Ruhanga mara asiimwa abantu. 19Aha rw'ekyo tuhondere ebili by'emilembe n'okwombekangana. 20Otakwita mulimo gwa Ruhanga aha rw'enshonga ya nyakabunda. Buli kintu mazima kyera, kyonkai eba shobe omuntu kusitaza banu aha rw'enshonga y'ekyo yalya. 21Kirungi kutalya nyama anga kunywa divai, handiki kukora kyona kyona ekyakusitaza murumuna wawe. 22Okwesiga kwawe kube kwawe na Ruhanga wawe. Muberwa atalikweligomwa aha rw'enshonga y'ekyo alikubona kili kirungi. 23K'eky'alikulya araba nakilengeshanyia, Ruhanga namuramura k'alikukilya, aha rw'okuba ekikorwakye tikisimbagiliize aha kwesiga. Mara kyona kyona ekitasimbagiliize aha kwesiga buba bufu.

will be added

X\