1 Buli muntu agire omuhuliro aha batwazi. Aha rw'okuba taliho bushobora obutarugire ahali Ruhanga. Abatwazi abaliho bakatekwaho Ruhanga. 2 Aha rw'ekyo kaishe muntu asimbalira abatwazi, asimbalira ekyo Ruhanga yataireho, mara abo abasimbaara balyeletera omushango. 3 Manya abatwazi tibakanga barungi shana ababi. Wakuburwa kutina abatwazi? Ahonu okore kurungi nirwo omutwazi arakusiima, 4 kuba wenene mukozi wa Ruhanga aha rw'obuge bwawe. Kyonkai k'oraba nokora kubi otine, aha rw'okuba omutwazi embanda tagikwatira bushai. Omutwazi mukozi wa Ruhanga kubonabonyia akora kubi. 5 Kityo omuntu naragirwa kugira omuhuliro, ti rwa kutina kiniga kya Ruhanga kwonkai, kyonkai mpaho n'aha rwa ishenkazi omutima. 6 Aha rw'enshonga yonene yonene mushora emishoro, enshonga abatwazi baba baheleza ba Ruhanga, mara ekigambo eki nibakyekomya. 7 Bona mubahe ebili byabo. Araba ali w'okusholerwa emishoro, asholerwe emishoro; omuhoza aholerwe; ow'okukunirwa akunirwe; ow'okuhabwa ekitinwa ahabwe ekitinwa. 8 Omuntu atabatonga kantu kona kona, shana okugonzangana. Enshonga omuntu agonza mutahiwe aba ahikize Amateka. 9 Emihango egi: «Otalisiyana, Otaliita, Otaliiba, Otalyegomba,» efunganisibwa omu kigambo kimoi eki, «Ogonzega mutahi wawe nk'okwo iwe olikwegonza.» 10 Engonzi tizitamisa muntu. Aha rw'ekyo okugonza nikwo kugobesheleza Amateka. 11 Kwongera ahali ekyo nimumanya okwo esaa egobire, okwo akaanya nik'aka kuruga omu turo. Mbwenu aha tuli haihi kurokoka kushaaga orwa mbere orwo twaikiliize. 12 Obwire bwakeire, omushana gwajwire. Kityo tulekere kukora ebikorwa by'omwilima, tukore ebikorwa eby'omushana. 13 Turore nk'okwo kisaine kurora omu mushana, tutagira mururu anga kutamiira, tuleke obusiyani n'eby'enshoni, tuleke endwano n'eihagiko. 14 Ekiliho murondore Omukama Yesu Kirisito, muleke kuhyahyanira omubili, n'okunulirwa obunyama.
