ABAROMA 12

1Aha rw'ekyo barumuna bange, nimbatagiliza mbataireho obuganyizi bwa Ruhanga, muhonge emibili yanyu ebe kitambo ekilikurora, ekitakatifu mara ekilikushemelera Ruhanga. Oku nikwo kumufukamira kwanyu okw'amazima okwo muragiirwe kumuha. 2Muleke kwekoma aha migilire y'ensi egi. Muhinduke, muhindure ebitekelezo byanyu buhya, mwije mumanye kabutekire ebyo Ruhanga ayenda, mumanye ekili kirungi, ekishemeire mara ekigorogokire. 3Aha rw'ekisha ekyo nagiliirwe, buli omoi omuli inywe nimuragira aleke kwetungika kushaaga okwo ali, ekiliho ayelebe n'obwegendeleza, buli omoi kuhondera amani g'okwikiliza okwo Ruhanga yamutungire. 4Nk'okwo omu mubili gumoi twinamu engingo zingi, mara engingo zona tizilikukora mulimo gumoi, 5kityo naichwe n'orwo tuli bangi, tuli mubili gumoi omuli Kirisito, kandi buli omoi rugingo rwa mutahiwe. 6Twina amatungwa gatali gamoi kuhonderana n'ekisha kyotugiliirwe, kityo tugakoze. Kakuli kuranga, turange nk'okwo okwesiga kwaitu kuli. 7Kalili ikora, tukore, araba ayegesa, ayegese. 8Araba agira akalyo k'okuchumbiza, achumbize; araba amanya kuha banu, abahe ataina kabajoka. Ajuna, ajune n'ekihika; ow'obuganyizi, agire obuganyizi n'amashemelerwa. 9Engonzi ziruge aha mutima. Munobe ebibi, mwekwate ebirungi. 10Mugonzangane engonzi ez'oburumuna; mukirangane omu kukunirangana. 11Ekihika kyanyu kitashuba nyuma; mubengeye omu mwoyo, kandi mukolere Omukama. 12Mushanduke aha rw'eshubi yomwinayo, omu matangwa mwegumisilize, kandi mushome enshara obutosha. 13Abakirisito bataahi banyu mubachangire ebyo balikwetaga, kandi munyegeze abagenzi. 14Ababagingiiza mubagambege; mubahe omugisha, mutabaraama. 15Abalikushanduuka mushanduuke nabo, abalikulira mulire nabo. 16Mugire obuchulezi omu muturanwa; mutetungika, ekiliho mwikare n'abantu ab'ahansi. Mutalyebona magezi. 17Mutalyehoroza, shana muhige ekilikushemelera abantu bona. 18Kakilikushoboka, inywesi okwo murabona, muture kurungi n'abantu bona. 19Abagonzibwa, mutalyehoora; ebyo mubilekere Ruhanga, aha rw'okuba kikahandikwa kiti, «Okwehoora kuba kwange, n'inye ndibamalira, alikugamba Mukama. 20Leka! K'omubisha wawe araba aina enjara, omuhe ak'okulya; k'araba aina eiliho, omuhe ak'okunywa. Omu kugir'otyo oraba nomukwasa enshoni zingi muno.» 21Omutima gubi gutakukiza mani; omutima gubi ogusingise omutima gurungi.

will be added

X\