ABAROMA 11

1Mbwenu nimbaza nti, Ruhanga akachwera kimoi eihangalye? Nikikabure! Inye nyenene ndi Mwisiraeli, mwijukuru wa Aburahamu, w'oruganda rwa Benjamini. 2Ruhanga takachwaga ihangalye elyo atura namanya batakabaireho. Timulikumanya eby'Ebihandiko Bitakatifu bilikugamba ahali Eliya, okwo atoijera Isiraeli ahali Ruhanga? 3«Rugaba, abarangi baawe babaisire, alutare zawe bazikambura, inye nyenkai n'inye nsigaireho, mara bakyampiga kunyita.» 4Kyonkai Ruhanga namuhororaki? Ati, «Nyesigiireho abantu 7,000 abatakatekeraga Baali kujwi.» 5Na mbwenu omu bukiro obu nikwo bili; haliho abasigaireho abaronkirwe ekisha kya Ruhanga. 6Kyonkai kabiraba bili bityo aha rw'ekisha tibikyali aha rwa bikorwa; kitali kityo ekisha tukyakubaire kisha. 7Mbwenu aho tugambeki? Ebyo Abaisiraeli bahigaga tibabiboine. Abaronkirwe bakabibona, kyonkai abasigaire bakagumangana, 8nk'okwo kihandikirwe kiti, «Ruhanga akabaha omwoyo ogulikuhuziima, amaisho gatabona n'amatwi gatahulira kulemwa kugoba mwaha.» 9Kandi Daudi nagamba ati, «Amagenyi gabo gababeere mutego gubakwate, gababeere kiina mara gabarugirwemu ekibonabonyio; 10amaisho gabo gabundwe omwilima batabona, enaku zibahende emigongo ebiro byabo byona.» 11Kityo nimbaza, bakasitara nikyo bagweleire? Nikikabure. Entambara zabo zikaletera Abanyamahanga okurokoka, kandi aho Abaisiraeli bagira ekiisho. 12Mbwenu k'entambara zabo ziraba zatungisize ensi, kandi okulemwa kwabo kukatungisa Abanyamahanga, lero kasho orwo Abaisiraeli balirokoka bona! 13Mbwenu ningambira inywe Banyamahanga. Nk'okwo inye ndi ntumwa y'Abanyamahanga, n'inyebuga omulimo gwange 14ngize Abayahudi bataahi bange ekiisho, kutyo ngire abo naronkamu. 15K'okuchuubwa kwabo kuraba nikuletera ensi kugaruka ahali Ruhanga, okwikiliza kwabo nikwo kugambaki kakutali kuhimbuka mu bafu? 16K'ensano ekanzirwe ey'okuganuza eraba eba ntakatifu, mpaho n'ekiihuro kyona; k'omuzi guraba guli gutakatifu, mpaho n'amatagi gali gatyo. 17Kyonkai k'amatagi agamoi garaba gakonoirwe, kandi iwe ekyana ky'omuzeituni ishwa okabyarwa aha muzeituni mbali amatagi gakonorwa, kulya obunuzi bw'omuzeituni, 18oleke kugaya amatagi. K'oragaya oijuke okwo t'iwe oyemeleirweho muzi, shana iwe wenene oyemeleire aha muzi. 19Oragamba oti, «Amatagi gakakonorwa kambyarwa mbali gakonoirwe.» 20Ekyo nikwo. Gakakonorwa aha rw'okutaikiliza kwago, kyonkai naiwe okwikiliza kwawe nikwo kukwemeleize. Kityo oleke kugaya, ekiliho ofulike omwoyo. 21Aha rw'okuba ka Ruhanga araba ataganyiire mataagi ag'obuhangwa, naiwe talikuganyira. 22Aho oyekomye obufura bwa Ruhanga n'okukarakwe: Ruhanga akalira abagwire, kyonkai iwe akugilira obufura, ekiliho oyekwate obufurabwe; kitali kityo naiwe kutyo alikuchwa. 23Nangu n'abandi kabaraba batazigiliire omu butesiga bwabo, baligaruka mbali babaire bali, kuba Ruhanga aina obushobora bw'okubagarura. 24Enshonga ka iwe oraba wakongoirwe aha muzeituni, omuzeituni kibira aha rw'obuhangwa bwagwo, okakwatanisibwa aha muzeituni ogulimano omu ntwaza etali ya buhangwa, aho amatagi aga ag'obuhangwa tigakwatanisiibwe aha muzeituni ogwago kushaaga? 25Barumuna bange, ningonza mushobokerwe ekyebisho eki, mutaija mukebeiyabeiya ngu mwina amagezi. Abaisiraeli abandi bagumangaine, nangu Abanyamahanga bona balemwe barokoke, 26nirwo Isiraeli yona elirokoka; nk'okwo kihandikire kiti: «Omurokozi aliruga Sioni, achwe entambara omuli Yakobo; 27mara egi niyo eliba ndagano yange eyo ndikora nabo orwo ndibagarulira entambara zabo.» 28Aha bikwete evangeli baba babisha ba Ruhanga aha rw'okugilira inywe Abanyamahanga eitima. Kyonkai aha bikwete okuronkwa baba bagonzibwa aha rwa baishenkurubo. 29Orwo Ruhanga atunga omuntu egaboze anga akamuronka tamuhinduka. 30Inywe Abanyamahanga, eirai timwahuliraga Ruhanga. Kyonkai mbwenu Ruhanga abagilire obuganyizi aha rw'okutahulira kwa Baisiraeli. 31Aha rw'enshonga y'obuganyizi obwo mugiliirwe, Abayahudi tibalikuhulira Ruhanga, kutyo nabo baije babone kugilirwa obuganyizi bwa Ruhanga. 32Ahakuba Ruhanga ahaire abantu bona obutahulira, kwija kubagilira obuganyizi. 33Lingi litai eitunga lya Ruhanga n'obumanyibwe n'amagezige! Emiramulire n'entwazaze by'okutangaza! 34«N'ohai alikumanya ebitekelezo by'Omukama anga n'ohai arabaire mutegekiwe? 35Anga n'ohai aramuhaire ekintu ali wa mbere Ruhanga kwija kukimugarulira?» 36Ebintu byona bitabuka ahali wenene, bibaho omu bushobora bwa wenene, mara biba bya wenene. Ekitiinwa kibe kya wenene eirai lyona. Amina.

will be added

X\