ABAROMA 10

1Barumuna bange, eky'omutima gwange gulikwitanira, n'ekyo ndikushabira Isiraeli ahali Ruhanga nimbashabira kabarokoka. 2Ndi mujulizi wabo okwo baina ekihika ahali Ruhanga, kyonkai ekihika kyabo tikiliruga mu bumanyi nyakabara. 3Aha rw'okutamanya bugorogoki obulikuruga ahali Ruhanga, kandi bakaitanira okuhamisa obwabo, tibakunzire bugorogoki bwa Ruhanga. 4Kirisito n'iwe yachwire Amateka, buli omoi aina okwesiga ashobore kuhindurwa kuba mugorogoki. 5Musa nahandika okw'omuntu alikukora eby'obugorogoki asimbize aha Mateka ekyo kilimubonesa oburora. 6Kyonkai obugorogoki obusimbize aha kwesiga nibugamba buti: Otakugamba mu mutima gwawe oti, «N'ohai alitemba omw'iguru?» (Nikwo kugir'oti, kusongora Kirisito) 7anga, «N'ohai alisongoka omu kuzimu?» (Nikwo kugir'oti, kwihya Kirisito omu bafu). 8Kyonkai obugorogoki obwo nibugamba butai? Ekigambo kikuli haihi, kikuli aha minwa n'omu mutima (nikwo kugir'oti, ekigambo ky'okwesiga ekyo tulikuranga). 9K'oraba nogambakwo okwo Yesu aba Mukama, mara noikiliza aha mutima okwo Yesu yamuhimbwire omu bafu, olirokoka. 10Kuba omuntu aikiliza aha mutima aho ahindurwa mugorogoki, kandi agambakwo atyo arokoka. 11Ebihandiko bitakatifu nibigamba biti, «Kaishe muntu wena ayesiga Ruhanga talishonazibwa.» 12Aha rw'okuba taliho nshororo aha Muyahudi n'Omugriki. Omukama wenene wenene n'iwe Mukama wa bona, mara ebirungibye abitunga bona ababimushaba. 13Nobona «Buli omoi atakira Omukama, alirokoka.» 14Kyonkai abantu bakushaba batai owo batalikwikiliza? Isi bakwikiliza batai owo batakahuliraga? Isi bahulire batai bataina murangi? 15Isi abantu bakuranga batai kabatatumirwe? Nk'okwo kihandikirwe kiti, «Garungi gatai amaguru gabo agalikuranga amakuru garungi!» 16Kyonkai evangeli tibakagikilize bona; Isaya nagamba ati, «Rugaba, n'ohai aikiliize eby'ahuliire kuruga ahali ichwe?» 17Kityo okwikiliza kuruga omu ky'omuntu yahulira, kandi ekyahulirwa kiruga omu kuranga Kirisito. 18Kyonkai nimbaza, tibakahuliire? Mazima bahuliire; aha rw'okuba «Eiraka lyabo lyagobire omu nsi zona, ebigambo byabo byagobire aha mbibi z'ensi yona.» 19Ninshuba nimbaza, Isiraeli tiyashobokeirwe? Ekya mbere Musa nagamba ati, «Ndabaha okuchubira abatali ihanga; mbahe okunigalira eihanga ly'abafera.» 20Kandi Isaya namaza kugoba aha kugamba ati, «Abatampiigaga nibo bamboine, nayemanyisa abatambazaga.» 21Kyonkai Isiraeli namugambaho ati, «Omushana gwona nsiiba ntegire engaro kwakilira eihanga elitahulira mara elishengi.»

will be added

X\