ABAROMA 1

1Inye Paulo omwiru wa Yesu Kirisito, nketwa kuba ntumwa, nkaronkwa aha rw'evangeli ya Ruhanga. 2Evangeli egyo niyo Ruhanga yaragiire karai omu kanwa k'abarangi omu Bihandiko Bitakatifu. 3Ekwete aha Mwanawe ayatabukire ahali Daudi aha bunyamubili. 4Amanyisiibwe n'amaani okwo ali Mwana wa Ruhanga, orwo yahimbukire omu bafu nk'okwo Mwoyo Mutakatifu yarangire, n'iwe Yesu Kirisito Omukama waitu. 5Omuli wenene nimwo tugiliirwe omugisha gw'okuba ntumwa aha rwa Yesu Kirisito kwegesa amahanga gona kugira omuhuliro ogulikuruga omu kwesiga aha rw'eibaralye. 6Kandi na inywe omuli balinya abesirwe kuba ba Yesu Kirisito mubulimu. 7Kityo nimbahandikira inywena abagonzibwa ba Ruhanga omuli Roma. Mugire omugisha n'emilembe ya Ruhanga Isheichwe n'ey'Omukama Yesu Kirisito. 8Ekya mbere ninsiima Ruhanga wange omuli Yesu Kirisito, omw'ibara lyanyu inywena, aha rw'okuba okwesiga kwanyu nikugambwa omu nsi yona. 9Enshonga Ruhanga n'iwe mujulizi wange, owo nkolera n'omwoyo gwange orwo ndikuranga evangeli y'Omwanawe, okwo mbashabira obutosha omu nshara zange, 10nti rundi Ruhanga ayenzire nakulemwa mberwa mbagobaho. 11Nobona nyina orushusho rwanyu, mbone kubagobya egabo y'omwoyo kubagumisa, 12nikwo kugir'oti tushobore kugumisangana, inye ngumisibwe okwesiga kwanyu, na inywe mugumisiibwe okwange. 13Barumuna bange, ningonza mumanye okwo naraaliire emirundi nyingi kubagobaho (kyonkai kugoba mwaha nkyatangatangirwe), mbone kugira abo nahindura omuli inywe, nk'okwo nyina abo mpindwire omu Banyamahanga. 14Nyina eibanja aha bantu bona, Abagiriki n'Abanyamahanga kumoi, abamanyi n'abafera kumoi. 15Kityo nindibaliibwa na inywe abali Roma kubarangira evangeli. 16Aha rw'okuba tindikukwatirwa vangeli nshoni: Nigo mani ga Ruhanga agakurokora buli omoi alikwesiga, kubanza n'Omuyahudi n'atali Muyahudi kwakwo. 17Kuba obugorogoki bwa Ruhanga omu kuhindura abantu kuba bagorogoki nibubonekera omu vangeli egyo; abahinduza okwesiga kwonkai. Nk'okwo Ebihandiko Bitakatifu bilikugamba, «Okwesiga kw'omugorogoki nikwo kulimugiza oburora.» 18Ruhanga asingiire omw'iguru nanigalira abantu bona abatamwikiliza n'ababi abalikufakara bakafunfuniza amazima. 19Kuba ebilikushobora kumanyika ahali Ruhanga nibabimanya, nobona Ruhanga wenene abibamanyisize. 20Kwema aha kutondwa kw'ensi emibere ya wenene etaboneka, nikwo kugir'oti obushoborabwe obw'eirai lyona, bumanyikira bunyanungi omu bintu ebyakatonzirwe. Aha rw'ekyo tibaina kyakwekwasa. 21Kuba n'orwo Ruhanga bamumanyire tibamuhaire kitinwa okwo ali Ruhanga handiki kumusiima. Batekeleza ebitaina mugasho n'amagezi gabo g'obufera gakwatwa omwilima. 22Bakeyeta banyamagezi baba bafera, 23omu mwanya gw'ekitinwa kya Ruhanga nyamutafa batamu ebishushani ebilikushusha omuntu nyakufa anga ebinyonyi anga ebigunju anga ebyekurura. 24Aha rw'ekyo Ruhanga akabahwamu baikara omu mairu g'emitima yabo ag'obujanga, 25ahakuba amazima agakwete ahali Ruhanga bakagahindura bishuba, bafukamira ekitondwa bakikolera kushaaga Omutonzi ow'ekitinwa eirai lyona! Amina. 26Aha rw'enshonga egi Ruhanga akabahwamu, baikara omu buhwanshoni. Abakazi babo basiga eby'emibili yabo yahangiirwe, bagikoza ebitali bya buhangwa bwayo. 27N'abashaija kutyo balekera kugenda n'abakazi okwo kihangirwe, bata nibagenda omushaija n'omushaija, abashaija bahemuka n'abashaija, ekyarugir'omwo bayeletera ekibonabonyio aha rw'okufakara kwabo okwo. 28Kandi okwo baboine kitalikugasha kwesiga Ruhanga, Ruhanga akabahwamu baikara n'emitima mibi, baba bantu babi. 29Bagira emize yona, entambara, omururu n'orwango. Baijurwa ekiisho, baita abantu, okurwana, ebishuba, orwangorogo, okugeya, 30okuchwelerera, okunoba Ruhanga, eikuru, eisinini, okwetutumura, kugishagisha emize mibi n'okutahulira bazaire. 31Baba bafano, tibagira bwesigwa aha byo baragaine, baba bihwamwoyo, tibagira na mama. 32N'orwo balikumanya omuku gwa Ruhanga okwo abakora ebintu nk'ebi baragirwa kufa, tibalikubikora kushai kyonkai nibasiima n'abalikubikora.

will be added

X\