OKUSHURULIRWA 6

1Ahanyuma mbona Kataama, omu mihuri mushanju nabamburura gumoi, nshuba omu bitondwa binai ebilikurora mpulira kimoi nikigamba oti nkuba nesharuka kiti, «Ija!» 2Ndeeba, mbona efarasi elikwera, ayabaire agikuubire aina obuta, bamuha orukinga, ashuba atabara ali manzi erashana. 3Kayabambwire omuhuri gwa kabili mpulira ekitondwa kya kabili ekilikurora nikigamba kiti, «Ija!» 4Aturukwa efarasi endijo netukura neyengelera. Ayabaire agikuubire bamujubura kumara emilembe omu nsi, abantu baitangane; bamuha n'embanda mpango. 5Kayabambwire omuhuri gwa kashatu, mpulira ekitondwa kya kashatu ekilikurora nikigamba kiti, «Ija!» Ndeeba, mbona efarasi elikwiragura, n'ayabaire agikuubire akwete omunzani. 6Mpulira eiraka oti niliruga omu bitondwa binai ebilikurora niligamba liti, «Ekipimo ky'engano kigure edinari, kandi ebipimo bishatu nabyo bigure edinari, kyonkai amajuta n'edivai otabisera!» 7Kayabambwire omuhuri gwa kanai, mpulira eiraka ly'ekitondwa kya kanai eky'oburora nikigamba kiti, «Ija!» 8Kugya kuleba mbona efarasi ekilikurora, agikuubire eibara nibamweta «Rufu,» ahondeirweho «Kuzimu,» bona abo bahaabwa obushobora bw'okwita erobo y'ensi, kugiisa embanda, eifa, endwara n'ebikaaka by'omu nsi. 9Abambura omuhuri gwa kataanu, mbona ahansi ya alutare emyoyo y'abaisirwe nibaturwa evangeli bakaba bajulizi bayo. 10Bataka n'eiraka lihango bati, «Waitu Mukama Omutakatifu nyamutaiganwa rugamba mazima, abantu b'omu nsi abatwisire nobaramura maki kutweholera?» 11Aho bona buli omoi ahabwa ekanzu elikwera, babagambira kuba bakyaikizeho akandi, kuhika orw'orubara rw'abairu bataahi babo na barumuna babo ruragobelera, orwo baramara kwitwa nka bonene. 12Abambura omuhuri gwa mukaaga, kugya kuleba mbona okwo aliho omusisi gw'amani. Eizoba liiragura nk'orugunia, okwezi okwabaire kujwire kuhangamwire kushusha obwamba, 13enyanyinyi aha iguru zikuntuka omu nsi okw'obona omuti gw'omutini guchunzirwe omuyaga gw'amani gukakunkumuka etini omu kirumo ky'embeho. 14Eiguru lihwaho okw'obona nibazinga ekitabo, kandi amabanga gona na buli kizinga bisimbuka mbali byabaire bili. 15Aho abakama b'ensi, abashaija enyanwanwa, abakuru b'eihe, abatungi, abanyamani, buli muntu, omwiru n'atali mwiru, bona bayesheleka omu mpako, n'omu mabare omu mabanga, 16nibatakira amabanga n'amabare bati, «Mutugwere mutusheleke, Omukama asingiire aha nketo atatubona, Kataama atatunigalira; 17kuba ekiro ky'amani nikyo kyalemwa kyagoba batwehoroza; ow'okwemera ekiro ekyo n'ohai?»

will be added

X\