OKUSHURULIRWA 5

1Ngya mbona abandaire aha nketo omu mukonogwe gwa bulyo akwete ekitabo kihandikire omunda, kimaamirwe emihuri mushanju. 2Mbona omumalaika w'amani nagamba n'eiraka lihango ati, «Nohai asaine kukingura ekitabo eki, akahenda n'emihuri yakyo mushanju?» 3Taliho n'omoi mw'iguru anga mu nsi anga kuzimu ayashoboire kukingura kitabo ekyo nangu n'okukilebamu kwonkai. 4Inye aho ndira muno kubona hataliyo asaine kushurura kitabo ekyo nangu n'okukilebamu kwonkai. 5Nirwo omugurusi omoi yangambire ati, «Oleke kulira. Leba entare ya Yuda, Mwijukuru wa Daudi asingire endashana, kityo nashobora kushurura ekitabo ekyo n'okuhenda emihuri yakyo mushanju.» 6Omugati y'enketo n'ebitondwa binai eby'oburora n'omu bagurusi mbonamu Kataama ayemeleire, oti bamwisire, aina amahembe mushanju n'amaisho mushanju, nibo bamalaika mushanju ba Ruhanga abo atumire omu nsi yona. 7Kataama ogwo agenda aihyaho ekitabo omu mukono gwa bulyo gw'ogwo abandaire aha nketo. 8Kayabaire yatwete ekitabo ekyo, ebitondwa binai eby'oburora n'abagurusi 24 babandamira Kataama, buli omoi akwete enanga n'epakuli z'ezahabu zijwire obunuma, obunuma obwo nizo nshara z'abakirisito; 9bahoya oruhoya ruhya bati, «N'iwe osaine kukwata ekitabo okakihenda emihuri, ahakuba bakakwita, kandi obwamba bwawe wabuchunguza abantu aba buli ruganda n'orulimi n'eihanga, wabagarura ahali Ruhanga; 10wabahindura ngoma mara bakuhani ba Ruhanga waitu, omu nsi baralya engoma.» 11Kanagiire kuleba obuzingora bw'enketo, n'ebitondwa bilikurora n'abagurusi mpulira amaraka g'abamalaika bangi obutabarwa, enkumi n'enkumi, 12nibagamba n'eiraka lihango bati, «Kataama owo baisire, asaine kuhaba obushobora n'eitunga n'obumanyi n'amani, bamukunise, bamuhe ekitinwa, bamuhaisilize.» 13Nshuba mpulira buli kitondwa omw'iguru n'omu nsi n'okuzimu n'omu nyanja n'ebikagilimu byona nibigamba biti, «Ogwo asingiire aha nketo na Kataama bahaisilizibwe, batinwe, bakunirwe, bagire n'obushobora eirai lyona!» 14Ebitondwa ebinai ebilikurora bigamba biti, «Amina!» Abagurusi babandama ahansi, bamufukamira.

will be added

X\