OKUSHURULIRWA 4

1Ebi kabyahoire nabona oruhigi rukingukire omw'iguru. Mpulira eiraka lya mbere nk'ely'enzamba lingambira liti, «Temba kunu nkwoleke ebilikwija kuhonderaho.» 2Niho honkai Mwoyo ambanda, ntangara kubona enketo omw'iguru, mara haliho agibandaireho. 3Wenene ogwo ayabaire abandaire aha nketo egyo akaba nashusha amabare g'eiguzi: Yasipi na akiki, kandi enketo yonene ekaba ezingoirwe omuhangazima nigushusha zumaridi. 4Enketo egyo ekaba ezingoirwe enketo enketo ezindi 24, zibandairweho abagurusi 24, bambaire enyambarwa zilikwera, baina n'enkinga z'ezahabu aha mitwe. 5Enketo egyo erugwaho endabyo, enkuba netera nesharuka, omu maisho g'enketo etara mushanju z'omuliro nizaka, nibo bamalaika mushanju ba Ruhanga. 6Omu maisho g'enketo hakaba haliho oti enyanja y'ekyoo, neyengelera nk'eibare lya kirisitalo. Enketo yona ekaba ezingoirwe ebitondwa bina ebilikurora, biina amaisho gangi muno omu maisho n'enyuma. 7Ekitondwa kya mbere eky'oburora kikaba nikishusha entare. Ekya kabili nikishusha enumi. Ekya kashatu aha maisho muntu. Ekya kanai kikaba nikishusha enkwaju elikuharara. 8Ebitondwa binai ebyo ebilikurora, buli kimoi kiina amapapa mukaaga, kiina amaisho gangi muno obuzingora nangu n'omunda, kiro na mushana nibihoya obutalekera bikwese, «Omutakatifu, Omutakatifu, Omutakatifu, aba Mukama Ruhanga Rushoborabyona, ayakasingire, asingire, mara naija kwija!» 9Buli orwo ebitondwa bilikurora ebyo bilikuha ekitinwa abandaire aha nketo, Nyakumeleera wenene, nibimukunisa n'okumusiima, 10abagurusi 24 nilibandama omu mabonage nilifukamira Nyakumeleera ogwo. Nibakwata enkinga zabo nibaziteka omu maisho g'enketo nibahoya bati, 11«Mukama Ruhanga waitu, osaine kuhaba obushobora n'ekitinwa, mara bakukunise, kuba n'iwe watonzire byona, aha rw'okuba okenda byahangwa, byabaho.»

will be added

X\