OKUSHURULIRWA 3

1«Omumalaika omulinzi enteko ya Saridisi omuhandikire oti: ‹Olinya aina emyoyo mushanju ya Ruhanga n'enyanyinyi mushanju, nagamba ati: « ‹Ebigiro byawe nimbimanya. Oina eirainga ly'okuba murora kyonkai oli mufu. 2Ruga omu turo, ohamise eby'oraba osigaire nabyo kuba nabyo biraliire kufa, aha rw'enshonga omu mabona ga Ruhanga wange nashanga ebigiro byawe bitali bya bugorogoki. 3Ijuka ebyo bakwegesize n'ebyo wahuliire. Obyekomye ebyo mara oyeshubeho. K'oraikara omu turo ndaija bundi mushuma, mara tomanye saa eyo ndakubundiraho. 4Kyonkai omuli Saridisi okyainamu abantu bake abatakatokoize bijwaro byabo. Abo basaine kugenda nanye bajwete ebilikwera. 5Alikasinga endashana alijwekwa mijwekerwe egi ey'ebijwaro bilikwera, n'eibaralye tindilifuta mu kitabo ky'oburora. Ndimwebuga omu mabona ga Tata, n'omu maisho g'abamalaikabe. 6Aina okutwi ahulire ebyo Mwoyo alikugambira enteko ezo.› 7«Omumalaika omulinzi w'enteko ya Filadelifia omuhandikire oti: ‹Omutakatifu, ow'amazima, aina orufunguruzo rwa Daudi, akingura omuntu atakinge, akinga omuntu atakingure, nagamba ati: 8« ‹Ebigiro byawe nimbimanya. Olebe nakukingulira oruhigi orw'omuntu n'omoi atakukinga. Nimanya okwo obushobora oinai buke, wayekomya n'ekigambo kyange mara tiwanyetonga. 9Leba ab'esinagogi ya Sitani abeyeta Bayahudi okwo batali Bayahudi kwo, nibabeiya, ndabasindika baije bakubandamire bakugwe omu maguru, bamanye okwo nakugondize. 10Kuba oyegumisilize obutananukwa nk'okwo nakugambiire. Ndakwemera omu kaanya ak'enaku zirabunda ensi yona, kulenga abanyansi bamwo. 11Nkwatiliire kwija. Eby'oinabyo okwatire kimoi, hatabaho wa kukwaka rukinga rwawe. 12Alikasinga endashana ndimuhindura nyomyo omuli Rwensinga ya Ruhanga wange. Rwensinga egyo taligirugamu, ndimuhandikaho eibara lya Ruhanga wange, n'eibara ly'ekigo kya Ruhanga, Yerusalemu empya elikusongoka neruga ahali Ruhanga wange omw'iguru. Nshube muhandikeho n'eibara lyange. 13Aina okutwi ahulire ebyo Mwoyo alikugambira enteko ezo.› 14«Omumalaika omulinzi w'enteko ya Laodisea omuhandikire oti: ‹Amina, omwesigwa omujulizi nyakabara, entabuko y'ebyo Ruhanga yatonzire, nagamba ati: 15« ‹Ebigiro byawe nimbimanya. Tiwahora, kandi okwo towayokya. Hakili kawakuhozire anga okokya! 16Mbwenu orw'olikutagatiraho kushai, okwo tiwahora, okwo tiwayokya, kanyije nkutanake. 17Enshonga nogamba okw'oli mutungi, okwo otungire okaganagana, otalikwetaga kantu, okaburwa kwemanya okw'oli mujune, mushashe, munaku, mpume, mara tojwete, 18kankutegekere: Ongureho ezahabu ejugusirwe omuliro oije otunge, ongureho n'ebijwaro bilikwera ojware osheleke enjuro yawe, ogure n'omubazi gw'amaisho ohumuruguke. 19Abo ngonza mbarwanisa mara mbatera. Ahonu ogire ekihika mara oyeshubeho. 20Oraleba, ndi aha ruhigi ninkomakoma. K'omuntu arampulira eiraka akakingura oruhigi, ndataaha omwa wenene tulye hamoi. 21Alikasinga endashana ndimuha omwanya aha nketo yange, nk'okwo nasingire endashana nkashuntama na Tata aha nketoye. 22Aina okutwi ahulire ebyo Mwoyo alikugambira enteko ezo.› »

will be added

X\