1 Ngya mbona omumalaika naruga omw'iguru akwete orufunguruzo rw'ekina kitaina bugarukiro n'omunyororo guhango. 2 Akwata ekinyamugenge, niyo njoka eya karai, Ibilisi, Sitani, akiboha emyaka 1000, 3 akijugunya omu kiina ekyo, akikingiranamu, mara ekiina akitaho omuhuri ekinyamugenge kitaija kikashuba kulemba mahanga rundi, kuhika emyaka 1,000 kuhwa. Aho nirwo kilibohororwaho akaanya kake. 4 Kandi mbona enketo z'abakama, zisingiirweho abantu ababaire batungirwe obushobora bw'okuramura emishango. Kwakwo nshuba mbona emyoyo y'abantu ababaire batemirweho emitwe aha rw'okwesiga Yesu n'ekigambo kya Ruhanga, ababaire batafukamiire kikaaka anga kishushani kyakyo, kandi batagiirweho kabonero kakyo mu buso anga mu biganja. Bahimbuka, balya engoma na Kirisito emyaka 1,000. 5 Abafiire abasigaire tibahimbukire kulemwa kugoba emyaka 1,000 kuhwa. 6 Muberwa mara mutakatifu alikuhimbuka omw'ihimbuka elya mbere! Nk'aba tibalifa rundi, ekiliho baliba bakuhani ba Ruhanga na Kirisito, balye nawe engoma emyaka 1,000. 7 Emyaka 1,000 k'elihwa, Sitani alitaishurwa aruge jela. 8 Alituruka kulemba amahanga aha pembe inai z'ensi, amahanga nigo Gogi na Magogi, babahurulize endashana. Orubara rwabo baliba nk'omushenye gw'omwaro gw'enyanja. 9 Bakahurura kuruga embaju zona z'ensi, bazingora orusisira rw'abegesibwa n'ekigo nyamurungi. Nawe omuliro gugya guhanantuka omw'iguru gubokya. 10 Ibilisi ayabaire abalembire anagwa omu nyanja y'omuliro n'obuganga mbali ekikaaka n'abarangi w'ebishuba bashangirwe bali, balishasha kiro na mushana eirai lyona. 11 Ngya mbona enketo mpango katare n'ayabaire agibandaireho. Ensi n'eiguru bimwiruka, mara biburwa obugyo. 12 Mbona abafu, abake n'abahango, bemeleire omu maisho g'enketo, n'ebitabo bishurwire. Kwakwo n'ekitabo ekindi, nikyo kitabo ky'oburora, nakyo kikaba kishurwirwe. Abafu baramurwa ebyabaire bihandikirwe omu bitabo ebyo, nibyo bikorwa byabo ebyo babaire bakozire. 13 Enyanja eshohoza abafu ababaire bagilimu, Rufu agirakwo na Kuzimu kutyo. Abafu ebyo babaire bakozire biba nibyo bibaramura. 14 Aho Rufu na Kuzimu bakunturwa omu nyanja y'omuliro. Enyanja y'omuliro nirwo rufu rwa kabili. 15 Omuntu ow'eibaralye litazokire mu kitabo kya burora akakunturwa omu nyanja y'omuliro.
