OKUSHURULIRWA 2

1Omumalaika omulinzi w'enteko ya Efeso, omuhandikire oti: «Ogwo akwete enyanyinyi mushanju omu mukonogwe gwa bulyo, naraba omu binara mushanju by'ezahabu, nagamba ati, 2‹Emilimo yawe ningimanya, akachwazikano kawe n'obwegumisiliza bwawe obw'amani. Nimanya n'okwo abantu ababi otalikubaha kaanya, n'abalikweyeta ntumwa okwo batali ntumwa nobamankuza. 3Nimanya okwo oina obwegumisiliza obw'amani mara nondashanira, mara tokalemirwe. 4Kyonkai kandi nyina ekigambo eki ahali iwe: Engonzi ezo wabaire oinaizo orwa mbere mbwenu tokinaizo. 5Oijuke ekikugwisize, oyechuze oshube okore okwo wakoraga aha mbandizo. K'otechulize ndakwizira, nyihye ekinara omu mwanya gwakyo. 6Kyonkai kandi eki oinakyo: Ebigiro by'Abanikolai tobyenda, nanye kwakwo timbyenda. 7Araba ainai okutwi ahulire ebyo Mwoyo alikugambira enteko ezo. Omuntu alisinga endashana ndimulisa aha muti gw'oburora oguli omuli Paradiso ya Ruhanga.› » 8Omumalaika omulinzi w'enteko ya Simirina omuhandikire oti, «Ebi nibyo owa mbere mara owa nzindo, ayafire akahimbuka, alikugamba, 9‹Nimanya ebiyengo byawe n'obunaku bwawe (kyonkai oli mutungi), kandi abeyeta Bayahudi okwo batali Bayahudi, shana sinagogi ya Sitani, nimanya okwo balikukugaya. 10Obushasi bw'olikwija kubona otabutina. Omuli inywe halimu abo Sitani araliire kunaga jela, mubone kulengwa, mara omu biyengo ebyo muramaramu ebiro 10. Obe mwesigwa, k'oraba nofa ofe, inye ndakuha orukinga rw'oburora. 11Araba aina okutwi ahulire ebyo Mwoyo alikugambira enteko ezo. Arasinga endashana, orufu orwa kabili tirulimukoraho kantu.› » 12Omumalaika omulinzi w'enteko ya Perigamo omuhandikire oti, «Ow'embanda ehyoire ey'amogi gabili nagamba ati, 13‹Mbali otura nimpamanya, niyo enketo ya Sitani eli. Inye nomanya kandi okanyebuga omu makiro ga Antipasi omujulizi wange, omwesigwa wange, owo baitiire omuli inywe omu bukiro bwa Sitani. 14Kyonkai kandi nyinai ebigambo bike ahali iwe: Oinayo abantu abalikukwata ebyo Balaamu yayegesize, ayayegesize Balaki kusitaza Abaisiraeli kulya enyama z'ebitambo ebitambiirwe ebihuku bakashuba bakakora n'obusiyani. 15Kandi oinaho n'abalikukwata eby'Abanikolai bayegesize. 16Ahonu oyechuze. Kakitali kityo elirandeta ntaraliire ninyija kurashanisa abantu abo n'embanda ey'omu kanwa kange. 17Aina okutwi ahulire ebyo Mwoyo alikugambira enteko ezo. Omuntu arasinga endashana ndamuha manu etalikuboneka, muhe eibare lilikwera elihandikirweho eibara elihya elitalikumanywa muntu shana arahabwa eibara elyo.› » 18«Omumalaika omulinzi w'enteko ya Tiatira omuhandikire oti: Omwana wa Ruhanga, ow'amasho nk'endimi z'omuliro, ow'ebilenge bilikushusha omulinga gumunywire, nagamba ati, 19‹Ebigiro byawe nimbimanya, n'okwikiliza kwawe, n'eikora lyawe, n'obwegumisiliza bwawe obw'amani, n'okwo ebigiro byawe ebya nyuma bilikushaaga ebya mbere. 20Kyonkai nkwinaho ekigambo eki: Omukazi Yezebeli, alikweyeta murangikazi nayegesa abairu bange emize nabahabisa kuta nibakora obusiyani n'okulya enyama z'ebitambo ebyo batambiire ebihuku. 21Muhaire omwanya gw'okwechuza, kyonkai talikukunda kwechuza busiyani. 22Leba ninyija kumusheegesa, taliruga aha kishago, na bagendabe ninyija kubanaga omu biyengo kabarayanga kwechuza obusiyani obwo basiyaine n'omukazi ogwo. 23Abaanabe nabo ndabaita. Enteko zona ziramanya okwo n'inye mpenjuuza amagezi g'omuntu n'omutimagwe, mara inywena buli omoi ndamurongora kuhondera ebikorwabye. 24Kyonkai inywe abandi abali Tiatira, abatalikukunda bilikwegesibwa ebyo, abatalikumanya eby'abandi beta naama za Sitani, kambagambire, tindikwija kubatweka mugugu gundi, 25ekiliho mukwatire aho mbali muli, kuhika orwo ndaija. 26Omuntu arasinga endashana, akaguma akozire ebyo muragiire kulemwa kugoba aha ndekelero, ndamuhindura mutwazi w'amahanga, 27agatwaze enkoni y'ekyoma, agashekashekure nk'enyungu z'eibumba; agire obushobora nk'obwo nanye Tata yantungire. 28Ndashuba muhe n'enyanyinyi za bwankya karai. 29Ainai okutwi ahulire ebyo Mwoyo alikugambira enteko ezo.› »

will be added

X\