OKUSHURULIRWA 19

1Ahanyuma mpulira ekyashusha oti iraka ly'embaga mpango omw'iguru niligamba liti, «Musingize Omukama Haleluya! Ekitinwa n'obushobora biba bya Ruhanga waitu, n'iwe aturokora. 2Eiramulye liba lirungi mara ly'amazima. Aramwire omumalaya rwituza; ayahemwize ensi obusiyani bwa wenene. Yamwehora aha rw'obwamba bw'abairube.» 3Bagarukamu n'eiraka lihango bati, «Musingize Omukama! Omumalaya ogwo alichunkwa omwika eirai lyona.» 4Abagurusi 40 n'ebitondwa binai ebilikurora bajumara ahansi bafukamira Ruhanga asingiire aha nketo nibagamba bati, «Amina. Haleluya!» 5Eiraka lihango nalyo lyema aha nketo liti, «Musingize Ruhanga waitu, inywe bairube inywena abakamutina, omuke n'omuhango.» 6Nshuba mpulira ekyashusha oti iraka ly'embaga mpango, oti kahiliro k'omutunga, gangi, oti iguru nilihinda n'amani, eiraka nilyatanguka liti, «Haleluya! Kuba Omukama Ruhanga waitu Rushoborabyona asingiire aha ngoma. 7Tushemelerwe, tushanduke, tumusingize, kuba obugenyi bw'obushwere bwa Kataama bwahika, n'omugore yayetekatekire, 8Omukama asingiire omugore, yamwambika kitaani nungi, elikwengelera mara etainaimu katokoro.» Kitani nungi nibyo bikorwa by'obugorogoki eby'abakirisito. 9Kandi omumalaika angambira ati, «Handika ekigambo eki: Baberwa abaraliziibwe aha muraagiro gw'obugenyi bw'obushwere bwa Kataama.» Ashuba angambira ati, «Ebigambo bya Ruhanga ebi by'amazima.» 10Aho mugwa omu maguru kumufukamira, kyonkai angambira ati, «Ebi otakubikora! Inye ndi mwiru mutahi wawe mara mutaahi wa barumuna bawe abakwete evangeli ya Kirisito. Ruhanga obe n'iwe ofukamira.» Kuba evangeli ya Kirisito niyo eshoboza abarangi kuranga. 11Nirwo naboine eiguru likingukire, nkabona efarasi elikwera. Ayabaire agishuntamireho akaba nayetwa Mwesigwa mara Omunyamazima, omu kuramura n'omu kurashana wenene aba mugorogoki. 12Amaisho nigashusha orulimi rw'omuliro, enkinga zitali zike zimuli aha mutwe; ainai eibara elimuhandikirweho ely'omuntu n'omoi atalikumanya shana wenene wenkai. 13Ayambaire ekanzu eibikire omu bwamba, n'eibara nayetwa Kigambo wa Ruhanga. 14Amahe g'omw'iguru, gajwete kitaani nungi, katare etainaimu katokoro, nigamuhondera gakuubire efarasi zilikwera. 15Omu kanwa yarugwamu embanda ehyoirwe ey'okwisa amahanga, mara amahanga ago aragatwaza enkoni y'ekyoma. Kandi eijungiro ly'edivai elilimu ekiniga kibi kya Ruhanga Rushoborabyona naija kulilibatilira. 16Aha kanzuye n'aha kiberokye ahandikirweho eibara eli: Omukama w'abakama, Rugaba Nyamukuru. 17Nshuba mbona omumalaika ayemeleire omw'izoba, ayeta muno amahungu gona agalikuharara eiguru ati, «Mwije, muhurure, mwije aha muraagiro katangaza gwa Ruhanga, 18mulye abakama, abakuru b'amahe, abaisherukare, efarasi n'abazikuubire, abantu bona: Omwiru n'atali mwiru, na muke na muhango.» 19Mbona ekikaaka n'abakama b'ensi n'amahe gabo bahurwire kurashanisa ogwo asingiire aha farasi n'okurashanisa eihelye. 20Ekikaaka bakita omu ngaro, n'omurangi w'ebishuba abulimu ayakoraga eby'okutangaza omu maisho gakyo ebyo kyabeiyesaga ababaire bagiirweho akabonero kakyo n'abafukamiraga ekishushani kyakyo. Ekikaaka ekyo hamoi n'omurangi w'ebishuba akabanaga nibarora omu nyanja y'obuganga obulikwokya. 21Abantu abandi bakaitwa embanda y'ogwo asingire aha farasi; niyo mbanda elikumuruga omu kanwa; amahungu gabalya gaiguta gaigusire.

will be added

X\