OKUSHURULIRWA 18

1Ebyo kabyahoire mbona omumalaika ondijo naruga omw'iguru aina obushobora bungi. Okwengelera kwa wenene kwayengeleza ensi. 2Atamu omuranga ati, «Yagwa, yagwa, Babiloni n'obuhango bwayo! Bwaba buturo bw'amasitani, bwikaro bwa buli mwoyo oguhagaire, bwikaro bwa buli kinyonyi ekibi ekihagaire. 3Kuba amahanga ganywa ebihagaro by'obusiyanibwe, abakama b'ensi basiyaine nawe, abakama b'omu nsi batungiire aha itunga elyo aihire omu busiyanibwe.» 4Nshuba mpulira eiraka elindi lyemire omw'iguru niligamba liti, «Inywe bantu bange, omumalaya ogwo mumurugemu, mutaija mukafakara nawe, mutaija mukagwerwa bibundo hamoi nawe; 5amafuge gaaba ntuumo gakanga eiguru, mara Ruhanga yaijuka amafu g'omukazi ogwo. 6Mumukore okwo yabakozire, mumubonabonyie kabili aha rw'ebigirobye; ekikompe ekyo yajwangainyie, mukimujwanganyize kabili. 7Okwo yayetungunikire akejaaka, mube nikwo mumushasa akachura. Kuba omu mutima nagamba ati, ‹Ndi mukamakazi, nyeshuntamiire, tindi ntumbwakazi, inye tindichura n'akati.› 8Nikwo ebibundo biramwizira omu kiro kimoi, endwara, enduru n'eifa, bashube bamuteho omuliro; Ruhanga aina obushobora, kuba ni Ruhanga alikumuramura.» 9Kandi abakama b'ensi abasiyaine nawe bakajanguka nawe, baramuchulira bamutongye, kabaramubona nahya omwika niguchunka. 10Obushasibwe nibwija kubatinisa, bemelere harai bagambe bati, «Ai bambi, ai bambi! Iwe kigo nyamuhango, iwe Babiloni ekigo ky'amani! Waramurwa omu saa emoi yonkai.» 11Abatunzi omu nsi nibamuchulira nibamutongya, orwo hatakiliyo n'omoi wa kugura byashara byabo, 12ebyashara by'ezahabu, efeza, amabare g'eiguzi n'enkwanzi, kitaani nungi, emyendo ya zambarau, n'esiliki elikutukura, efanicha za buli ngeli, ebintu ebikoziibwe emiino y'enjuju, ebintu byona eby'embaho z'eiguzi, omulinga, ekyoma na marimari, 13omudarasini, ebirungo, obunuma, n'omugaju, eudi, edivai, amajuta g'okulya, ensano nungi n'engano, ente n'entaama, efarasi n'amagali, n'abairu, nibo bantu. 14«Eby'omwoyo gwawe washuubiraga kubona byakuhwaho, ebintu byawe byona eby'enshonga n'oburungi bwawe tibikikuliho, tibilizoka rundi!» 15Abatunzi b'ebintu ebi, ababaire batungiire omu kigo eki, barayemelera harai nibatiina obushasi bw'ekigo ekyo. Barachura batongye ensi eyatanguke, bati, 16«Ai bambi, ai bambi, ekigo ekyo nyamuhango, ekyajwaraga kitaani nungi, n'emyendo ya zambarau na katuku, kyemaliireho ezahabu, amabare g'eiguzi n'enkwanzi! 17Eitunga eli lyona lyasisikara omu saa emoi yonkai.» Bakama b'emeli bona, ababugi bazo n'abazisabaragamu na bona abakoraga ebyashara by'enyanja bakemelera harai 18batera enduru orwo baboine Babiloni nehya nechunka omwika, bati, « Ni kigoki ekirashusire ekigo eki nyamuhango?» 19Bayesiiga eitaka omu mitwe, bachura, batongya, batera n'enduru bati, «Ai bambi, ai bambi, ekigo Nyamukuru mbali bona abagiraga emeli omu nyanja batungisiibwe eitunga ly'omwo! Babiloni yahwaho omu saa emoi. 20Shemelerwa iwe iguru orwo Babiloni yasilika, shanduka inywe begesibwa, inywe ntumwa na inywe barangi, kuba Ruhanga yabehoroleza ekigo ekyo!» 21Nirwo omumalaika omunyamani yashutwire eibare elilikwigana orubengo ruhango akalikuntura omu nyanja nagamba ati, «Nikwo Babiloni ekigo nyamuhango elikunturwa etyo ahansi n'amani, mara eliba etakiboneka lindi. 22Amaraka g'abatezi b'enanga, n'abahoyi, n'abatezi b'emilere, n'abatezi b'amakondere, tigalihulirwa rundi muli iwe. N'omubuya w'akalimo kona kona k'obubuya, n'eiraka ly'orubengo omul'iwe tibilizokamu rundi. 23Etara telishuba kwaka rundi muli iwe. Eiraka lya kishwera n'omugore liliba likyahulirwamu maki? Abatunzi bawe omu nsi bakaba bali bashaija enyanwanwa, kandi eirogo lyawe likagobeza amahanga gona. 24Bona abakaisirwe omu nsi, n'abarangi n'abakirisito, bakaitwa Babiloni.»

will be added

X\