OKUSHURULIRWA 17

1Omu bamalaika mushanju ababaire baina ebakuli mushanju, omoi aija angambira ati, «Ija nkwoleke omumalaya rwituza ashuntamire aha mutunga gw'amaizi naramurwa. 2Ogu akaba ali mugenda w'abakama b'ensi, mara n'iwe abantu b'ensi batamiire edivai y'obusiyani bwa wenene.» 3Anteka omuli Mwoyo antwara omw'irungu, mbonayo omukazi ashuntamire aha kikaaka katuku, kyona kishembirwe amabara g'ebijumi by'okurogota, mara kiina emitwe mushanju n'amahembe ikumi. 4Omukazi ogwo akaba ajwete emyendo ya zambarau, n'elikutukura, ayemaliireho ezahabu, amabare g'eiguzi n'enkwanzi, ashutwire ekikompe ky'ezahabu kijwire amahano n'ebihagaro by'obusiyanibwe. 5Aha buso ahandikirweho eibara ly'akabonero: «Babiloni rubamba, omumalaya rwituza mara entabuko y'amahano g'ensi.» 6Mbona omukazi atamiire obwamba bw'abakirisito n'obwamba bw'abajulizi ba Yesu. Kanamuboine kimbera kitangaro ky'amani. 7Kyonkai omumalaika ambaza ati, «Kiki kutangara? Kankugambire akabonero k'omukazi ogu, n'akabonero k'ekikaaka ky'emitwe mushanju n'amahembe ikumi ekilikumutwara. 8Ekikaaka ekyo wabona kyabagaho, mbwenu tikikiliho, nikyenda kuruga omu kiina owa dondondo kigye kisilike. Kandi abanyansi abo amabara gabo gatakahandikwaga mu kitabo ky'abarora kwema ensi kutondwa, baratangara kubona ekikaaka ekyo, aha rw'okuba kyabagaho, kandi mbwenu tikikiliho, okwo nikyenda kwija. 9Ekigambo eki nikyetaaga amagezi n'obumanyi: Emitwe mushanju nigo mabanga mushanju ag'omukazi ashuntamireho; 10kandi nibo bakama mushanju, omuli abo abatanu bagwire, omoi akyaliho, kandi ondijo takaizire, mara orw'araija naija kwikaraho akaanya kake. 11Kandi ekikaaka ekyabagaho mbwenu tikikiliho, n'iwe mukama wa munaana kyonkai nabalirwa omu bakama omushanju, mara nawe naija kusilika. 12Amahembe ikumi ago wabona nibo bakama ikumi abatakaboine bushobora bwa butwazi, kyonkai nibaija kubona obushobora bw'abakama esaa emoi yonkai, hamoi n'ekikaaka ekyo. 13Abakama aba emitekelereze yabo emoi. Amani gabo n'obushobora bwabo nibaija kubiha ekikaaka. 14Nibaija kurashanisa Kataama, kyonkai Kataama arabasinga, kuba n'iwe aba Rugaba Nyamukuru, Omukama w'abakama; baliinya ab'ainaibo nibo bayesirwe, bakaronkwa bashuba baba besigwa.» 15Omumalaika ashuba angambira ati, «Amaizi ago wabona omukazi ashuntamiremu, abo bantu ab'engeli zona, mbaga etali emoi, mahanga, bantu abakagamba kaishe rulimi. 16Amahembe ikumi ago wabona, gonene hamoi n'ekikaaka nibija kunoba omumalaya. Nibija kumunagaho wenkai entondore, bishube bimulye, bimare bimusosotoze omuliro. 17Ahakuba Ruhanga ataire ekitekelezo omu mitima yabyo kugobesheleza ekyo yagendeleire: Nikwo amahembe ago kwikilijanyia, n'obushobora bwago bw'obukama kubuha ekikaaka, ebyo Ruhanga yagambire bilemwe bigobelere. 18Omukazi owo wabona nikyo kigo kikuru ekitwara abakama abatwara ensi.»

will be added

X\