OKUSHURULIRWA 15

1Ngya mbona akabonero akandi omw'iguru, kahango mara k'okutangaza. Abamalaika mushanju baina ebibundo mushanju eby'enzindo, ebyo nibyo birahwerwaho ekiniga ky'Omukama eky'amani. 2Mbona ekyazoka oti nyanja y'ekyoo etabangijainyie n'omuliro. Abantu ababaire basingiire ekikaaka n'ekishushani kyakyo n'enamba y'eibara lyakyo bemeleire aha rubaju rw'enyanja y'ekyoo baina enanga za Ruhanga omu mikono. 3Bahoya oruhoya rwa Musa, omwiru wa Ruhanga, n'oruhoya rwa Kataama bati, «Waitu Mukama Ruhanga Rushoborabyona, ebikorwa byawe biba by'amani, nibitangaza! Emihango yawe y'obugorogoki kandi y'amazima, Nyakusinga Omukama w'amakiro gona! 4Atakutina akakuha kitinwa n'ohai, Rugaba? Aha rw'okuba omutakatifu aba iwe. Amahanga goona, nigaija kwija gakufukamire, kuba emiramulire yawe y'emishango yamanyikiire.» 5Ebyo kabyahoire ndeba omw'iguru mbona Rwensinga ekingukire einamu Eihema ly'Obusinge ly'Omukama. 6Omuli Rwensinga egyo harugwamu abamalaika mushanju baina ebibundo mushanju, bajwete ekanzu za kitaani nungi nizengelera, bekomire enfufu z'ezahabu omu bifuba. 7Omu bitondwa binai ebilikurora harugwamu kimoi kiha abamalaika mushanju epakuli z'ezahabu zijwire ekiniga kya Ruhanga asingire eirai lyona. 8Ekitinwa kya Ruhanga n'obushoborabwe birugwamu omwika, gwijura Rwensinga. Taliho yashoboire kutaaha Rwensinga kuhika orwo ebibundo mushanju by'abamalaika mushanju byahoire.

will be added

X\