OKUSHURULIRWA 14

1Ndeeba, mbona Kataama ayemeleire aha Ibanga lya Sioni. Akaba aina abantu 144,000 ababaire baina eibaralye n'elya Ishe gahandikire aha buso bwabo. 2Mpulira eiraka lyemire omw'iguru nk'akahiliro k'amaizi gangi n'okusharuka kw'enkuba y'amani. Eiraka lyonahuliire likaba nilishusha amaraka g'abatezi b'enanga nibatera enanga zabo, 3nibahoya oruhoya ruhya omu mabona g'enketo n'omu maisho g'ebitondwa binai eby'oburora n'omu mabona g'abagurusi. Taliho n'omoi ayakushoboire kushobokerwa ruhoya orwo shana abantu 144,000 abashangirwe bachungwirwe omu nsi. 4Nib'aba abatahagaziibwe bakazi, ahakuba bakagira obwera bw'omwoyo. Abo nibo bakuratira Kataama hona hona mbali agenda agiire. Aba bakachunguka omu bantu baba biraba bya mbere bya Ruhanga na Kataama. 5Omu kanwa kabo tibagambire kishuba, kuba abo nzira kamogo. 6Kandi mbona omumalaika ondijo naharara omurwerwerwe. Akaba ainai evangeli ey'eirai lyona naija kugirangira abanyansi, kugirangira buli ihanga, oruganda, abantu abakagamba endimi zitali zimoi n'abantu aba buli ngeli. 7Agamba n'eiraka lihango ati, «Mutine Ruhanga, mumuhe ekitinwa, aha rw'enshonga akaanya kagoba yaija kubaramura. Ruhanga ayatonzire eiguru n'ensi, enyanja n'enchuro z'amaizi mumufukamire.» 8Omumalaika ondijo owa kabili, ahonderaho nagamba ati, «Egwire, egwire Babiloni ekigo kihango ekyanyoisize amahanga edivai y'obusiyani bwakyo.» 9Omumalaika ondijo owa kashatu, ahonderaho aha babili aba, aba mbere, ayatangwire eiraka ati, «K'omuntu wena wena arafukamira ekikaaka n'ekishushani kyakyo, akagiibwaho akabonero aha buso anga omu kiganja, 10ogwo nawe aranywa edivai ya Ruhanga, edivai egyo nikyo kinigakye ekibi, eyo yafuka omu kikompe ky'ekinigakye etarungirwe, kandi omuntu ogwo arabona ekibonabonyio ky'omuliro n'obuganga omu maisho g'abamalaika n'omu mabona ga Kataama. 11Omwika gw'omuliro ogurabokya gwikara niguchunkera eirai lyona. Kiro na mushana tibalibona milembe aba abafukamira ekikaaka n'ekishushani kyakyo, na kaishe muntu wena aragiibwaho akabonero kakyo.» 12Aha niho obwegumisiliza bw'abegesibwa abekomya emihango ya Ruhanga mara bakaguma baikiliize Yesu bulimanyikira. 13Mpulira eiraka lyemire omw'iguru niligamba liti, «Handika ekigambo eki: Baberwa abarafaga bali ba Mukama kwema mbwenu.» Mwoyo nagamba ati, «Baberwa kwo, babone kuhumura emilimo yabo ey'amani, aha kuba ebigiro byabo birabarugaga enyuma!» 14Aho kugya kuleba mbona ekichwi kilikwera, kishuntamirweho alikushusha Omwana w'Omuntu, aina orukinga rw'ezahabu aha mutwe, kandi omu byara ainaimu oruhabyo rw'obwogi. 15Omumalaika ondijo aruga Rwensinga, agambira ashuntamire aha kichwi n'eiraka lihango ati, «Kwata oruhabyo rwawe ogeshe, nobona esaa y'eigesha yagoba, kuba ensi yayeza, byayera byachwa einoga.» 16Kityo ayabaire ashuntamire ekichwi ajugunya oruhabyorwe omu nsi, aho eigesha libaho. 17Omumalaika ondijo nawe aruga Rwensinga y'omw'iguru, na wenene akaba ainai oruhabyo rw'obwogi. 18Omumalaika ondijo aruga ahali alutare, n'iwe mumalaika aina obushobora bw'okugelera omuliro, ayeta ow'oruhabyo rw'obwogi n'eiraka lihango ati, «Kwata oruhabyo rwawe oshare engoobe z'ezabibu omu nsi, kuba ezabibu zayezire.» 19Kityo omumalaika ajugunya oruhabyorwe omu nsi, achwa ezabibu aha mizabibu, azijugunya omw'ijungiro lihango ly'edivai mbali Ruhanga alikumanyisiza ekinigakye eky'amani. 20Eijungiro ly'edivai lilibatilirwa enjai y'ekigo, obwamba ekinyamugera buruga omw'ijungiro elyo, egera ekilomita 300, kandi omugera ogwo gukaba guli gw'emita nka ibili okuzimu.

will be added

X\