OKUSHURULIRWA 12

1Akabonero k'okutangaza kaboneka omw'iguru. Omukazi akaba ayambaire eizoba, alibatiire okwezi, aha mutwe ainaiho orukinga rw'enyanyinyi ikumi na ibili. 2Akaba ainai enda, ataka narumwa kuzara, ebisha bimushagashagya. 3Akabonero akandi kaboneka omw'iguru. Ekinyamugenge kihango katuku, eky'emitwe mushanju n'amahembe ikumi, kandi aha mitwe yakyo egyo kiinaho enkinga mushanju. 4Omukira gwakyo gukukumba etheluti y'enyanyinyi z'aha iguru, kizikuntura omu nsi. Ekinyamugenge nkikyo kyemelera omu maisho g'omukazi ali haihi kuzara, k'aramara kuzara kilye omwana ogwo. 5Omukazi azara omwana w'omwojo, ow'okutwaza amahanga goona enkoni y'ekyoma, kyonkai omwana bamushwaikura bamutwalira Ruhanga bashuba bamuteka aha nketoye. 6Omukazi asingirwa omw'irungu, niho Ruhanga yashangirwe amutekatekeire omwanya, kuba niyo amara ebiro 1,260 nibamuliisa. 7Aho endashana eimuka omw'iguru. Mikaili n'abamalaikabe barashanisa ekinyamugenge. Ekinyamugenge n'abamalaika bakyo lirashana, 8kyonkai basingwa, baba batakiina bwikaro mw'iguru. 9Ekinyamugenge runwanwa kikuntuka ahansi, niyo njoka elinya ey'obunyakarai, n'iwe Ibilisi mara Sitani, ayabeihire ensi akagimaraho, akakunturwa ahansi hamoi n'abamalaikabe. 10Aho mpulira eiraka lyatangukire omw'iguru liti, «Mbwenu obushobora n'obukama bwa Ruhanga waitu byagobelera yaturokora, n'Enkorwamajuta ya wenene yaly'engoma: omubisha alega barumuna baitu bamukuntura ahansi, kiro na mushana abahangilira ahali Ruhanga waitu. 11Bamusingisa obwamba bwa Kataama, n'obujulizi obwo bagamba, orw'okuba bakeyanga bweyanga balemwa bafa. 12Ahonu iwe iguru shanduka nangu nainywe abalikaturamu! Kyonkasi zabalya, iwe nsi na nyanja, kuba Ibilisi yabasiliikira n'ekiniga kingi, enshonga nomanya okwo akaanyake kasigara kagufi!» 13Orwo ekinyamugenge kyaboine okwo bakikuntura ahansi, kibinga omukazi ayamara kuzara omwana w'omwojo. 14Kyonkai omukazi ogwo bamuha amapapa gombili g'enkwaju mpango aharare ailire harai omw'irungu asinge ekinyamugenge. Omw'irungu omwo abe nimwo amalira emyaka eshatu n'enusu nibamuliisa. 15Ekinyamugenge kitanaka amaizi nk'engezi, kigamuhondeza kagamukukumba nk'omutunga. 16Nawe ensi eyamba omukazi ogwo, eyashaamuka emira omwiga ogw'ekinyamugenge kyatanaka. 17Aho ekinyamugenge kinigalira omukazi ogwo, kisibuka kugya kutabalira abaanabe abasigaire, nibo balinya abakwata emihango ya Ruhanga bakashuba bakebuga Kirisito. Kyayemelera aha mwaro gw'enyanja.

will be added

X\