OKUSHURULIRWA 11

1Bakampa orubingo rwemire nk'enkoni y'okupimisa, bangambira bati, «Imuka, opime Rwensinga ya Ruhanga na alutare, omare obare n'abalikufukamira omuli Rwensinga egyo. 2Kyonkai nyarubuga ya Rwensinga otagipima; ogileke, ahakuba egyo bagihaire abanyamahanga, abalikwija kukandagilira Ekigo Kitakatifu emyezi 42. 3Abajulizi bange bombili bajwete engunia, ninyija kubaha omulimo gw'oburangi bagukore ebiro 1,260.» 4Abajulizi abo bombili niyo miti ebili y'emizeituni n'ebinaara bibili ebyemeleire omu mabona g'Omukama atwara ensi yona. 5K'omuntu ayenda kubakora kubi, omuliro gujumbuka omu kanwa kabo, gurambaramba ababisha babo. K'omuntu alikwenda kubakora kubi, zamulya ziti! Yafa! 6Bainai obushobora bw'okukinga eiguru, enjura ekabura kugwa omu biro ebyo baraba nibakora omulimo gw'oburangi. Baina n'obushobora okuhindura amaizi gakaba bwamba, n'ensi kugiteza buli kibundo emirundi nyingi okwo balikwenda. 7Kabaramara kugamba ebyo batumirwe, ekikaaka kiruge omu kiina owa dondondo kibatabalire, kibasinge mara kibaite. 8Emitumbi yabo eragangarama omu mbarabara y'ekigo kihango ekyo twakweta nitusindata tuti ni Sodoma na Misiri, mbali Omukama wabo yabambiirwe. 9Abantu aba buli ngeli, enganda, abalikugamba endimi zitali zimoi, n'amahanga baramara ebiro bishatu n'enusu bashamaliire emitumbi yabo egyo mara bange kubaziika. 10Abanyansi barayeshanda bashemelerwe, bagemulirangane, aha rw'okuba abarangi aba bombili bakabonesa abanyansi enaku. 11Kyonkai ebiro bishatu n'enusu kabyahoire Ruhanga yabatahyamu omwoyogwe ogw'oburora, bayemelera bwemelera, abantu abababoine bakwatwa obutini. 12Abajulizi abo abahimbuke bahulira eiraka lihango lyemire omw'iguru niligamba liti, «Mutembe mwije kunu!» Batemba omw'iguru ekichwi kibabunzire, ababisha babo babalebire. 13Omu saa egyo habaho omusisi gw'amani, ekichweka kya ikumi ky'ekigo kikumba; abantu 7,000 baitwa omusisi ogwo, abasigaire batiina muno, baha Ruhanga w'omw'iguru ekitinwa. 14Ekibonabonyio ekya kabili niky'eki kyahingura. Ekya kashatu kili haihi muno nikija. 15Omumalaika wa mushanju atera enzamba. Amaraka gahango gahulirwa omw'iguru nigagamba gati, «Engoma y'ensi yaba ngoma y'Omukama waitu na Kirisito wa wenene, aliba Mukama eirai lyona.» 16N'abagurusi 24 abasingiire aha nketo zabo omu mabona ga Ruhanga bajumara ahansi, bafukamira Ruhanga, 17nibagamba bati, «Nitukusiima Mukama Ruhanga Rushoborabyona, iwe asingire mara ayakasingire, wakoza obushobora bwawe obungi waly'engoma. 18Amahanga gagwerwa akabuta, aha rw'okuba wanigara muno, n'akanya niko ak'abafu kuramurwa, okarongora abairu bawe, abarangi n'abegesibwa, balinya abakutina, abake n'abahango. Kaanya k'okusilikya abatura nibasilikya ensi.» 19Nirwo Rwensinga y'Omukama omw'iguru yakingukire, Esanduku y'Endagano ekazoka omuli Rwensinga egyo. Endabyo zirabya, amaraka gagamba, eiguru lilindima, habaho omusisi n'orubare.

will be added

X\