OKUSHURULIRWA 10

1Nshuba mbona omumalaika ondijo omunyamani naruga omw'iguru, ayefubikire ekichwi, omuhangazima gumurabire aha mutwe, obusobwe nibushusha eizoba, kandi amaguru ga wenene nigashusha enyomyo z'omuliro. 2Akaba akwete akatabo kashurwire. Okugurukwe okwa bulyo akwemeleza aha nyanja, okwa bumosho akwemeleza aha rukaru. 3Okw'obon'entare nesinda, ayeta n'eiraka lihango. Kayayesire zisharuka enkuba mushanju. 4Enkuba ezo mushanju kazabaire zasharukire, nkaba naija kuhandika, aho mpulira eiraka lyemire omw'iguru niligamba liti, «Eby'enkuba mushanju zagamba obikomese omuhuri otabihandika.» 5Omumalaika owo naboine ayemeleire aha nyanja n'aha rukaru aimukya omukonogwe gwa bulyo agwolekeize omw'iguru, 6yarahira obuso bwa Ruhanga asingireho eirai lyona, ayatonzire eiguru n'ebikali omwo, ensi n'ebikali omwo, enyanja n'ebikali omwo, okwo hatabaho kukelererwa kushaagaho. 7Orwo omumalaika wa mushanju aratera enzamba, nirwo Ruhanga aragobesheleza ekyebishokye, nk'okwo yagambiire abairube abarangi. 8Aho eiraka elyo nabaire mpuliire niligamba lyemire omw'iguru lishuba lingambira liti, «Ogende okwate ekitabo ekishurwire omu ngaro z'omumalaika ayemeleire aha nyanja n'aha rukaru.» 9Kityo ngenda ngoba omumalaika, mugambira kumpa akatabo ako. Omumalaika ogwo angambira ati, «Katware okalye, omu kanwa karakunulira nk'obwoki, kyonkai omu rubunda kakweme kubi.» 10Omumalaika mwihya akatabo omu byara nkalya. Omu kanwa kanura bundi bwoki, kyonkai kanabaire nakaliire kanyema kubi omu rubunda. 11Aho ngambirwa kuranga ebiragwera amahanga gangi, abantu aba buli ngeli, n'abakagamba endimi ezitali zimoi n'abakama.

will be added

X\