ABAFILIPI 3

1Eky'enzindo barumuna bange, mushemelerwe aha rw'omujwangano gwanyu n'Omukama. Okubahandikira ebigambo byonene byonene inye tikulikundemesa, kandi nainywe ekyo nikibagasira. 2Muramanya abantu babi abo embwa, abaikara bakaliliize okutahirirwa. 3Ichwe n'ichwe tutahiriirwe kwokwokwo. Ichwe abafukamira Ruhanga twemire na Mwoyo, mara nitwebuga Yesu Kirisito, kandi ebikorwa by'aheru ebyo titubyesigire, 4n'orwo inye kandi ndikushobora kubyesiga. K'omuntu araba nabona nashobora kwesiga eby'aheru, leronu inye ninshagaho: 5bakantahiri aha kiro kya munana. Mba Mwisiraeli ow'oruganda rwa Benjamini, ndi Muyahudi n'akagere. Aha bikwete Amateka mba Mufarisayo, 6kandi ekihika nagira kingi nagingiza enteko. Leronu okwo omuntu aragirwa kuba mugorogoki aha rw'enshonga y'okukwata Amateka, ahali ekyo nabaga nyakatetere. 7Kyonkai ebyo nabonaga biina omugasho ahali inye, nkabihwamu aha rwa Yesu Kirisito. 8Mazima buli kantu nkakahwamu aha rw'enshonga y'okumanya amagoba g'okumanya Yesu Kirisito Omukama wange. Ebintu byona nkabihwamu aha rwa wenene, nimbibona nk'omwejuno, Kirisito ashobore kuba niwe aba itunga lyange, 9mara njwangane nawe, ti aha rwa bugorogoki obwange nyabwange obuzarukana omu Mateka, kyonkai obugorogoki obwo tubonesibwa okwesiga Kirisito. Obugorogoki obulikwema ahali Ruhanga butabuka aha kwesiga; 10nyije mbone kumumanya n'okumanya amani g'okuhimbukakwe, nshashe nka wenene, nfe nka wenene, 11kakilikushoboka nshobore kuhimbuka omu bafu. 12Tikugir'oti ebi nabiboine anga nabaire mugorogoki. Nintaho amani kubona emperwa egyo, Yesu Kirisito akandonka naba wa wenene. 13Barumuna bange, tindikugira nti emperwa egyo nagiboine. Ekintu kimoi kyonkai ekyo ndikukora, kwebwa ebyo nakozire, kandi nintaho amani kubona ebili omu maisho. 14Ninyitanira omugendelero gwange, niyo mperwa ey'oruguru eyo Ruhanga yatweteire kujwangana na Yesu Kirisito. 15Ichwe abalikuhiga obugorogoki tutekeleze emitekeleze nk'egi. Kandi kamuraba nimutekeleza kundi aha kintu kyona kyona, ekyo nakyo Ruhanga alikibashurulira. 16Kyonkai amazima ago twaboine tube nigo tugumaho. 17Barumuna bange, mwikare nimundondora. Mwekomye abalikwekomya obulebero obwo twabahaire. 18Aha rw'okuba haliho bangi abo ndabagambiire emirundi nyingi, mara na mbwenu ninshuba nimbabagambira nindira, omu mirolere yabo nibashemelerwa okufa kwa Kirisito aha musaraba. 19Nibaija kufa kubi, orubunda niwe ruhanga wabo, nibebuga ebigoko byabo, amagezi gabo bagataire aha bintu by'ensi. 20Kyonkai ichwe owaitu n'omw'iguru, ekyo nikyo kilikutuha okulindilira Omurokozi, Omukama Yesu Kirisito, 21alikwija kuhindura omubili gwaitu ogujege kaguba nk'ogwa wenene ogw'ekitinwa, nakoza obushobora obumuhindura Mukama w'ebintu byona.

will be added

X\