ABAFILIPI 2

1Oburora bwanyu bw'omujwangano na Kirisito nibubagumisa, n'engonzize nizibamaramara. Kandi inywe nywenene Mwoyo akabajwanganisa, mara leba nimugilirangana obufura n'embabazi. 2Kityonu mugume, mutekeleze kumoi, inywena mugonzangane, mujwangane omu mwoyo n'omu mutima, munshemeleze muno munonga. 3Mutakukora kantu kona kona nimwihwa aha kweyenda anga aha ikuru. Ekiliho mugire obwetohya, abantu abandi mubabone kuba barungi kushaaga inywe. 4Muleke kweyenda inywe nywenene nywenkai, shana mushemeleze n'abandi. 5Mutekeleze okwo Yesu Kirisito yatekelezaga: 6N'orwo wenene yabaire ali kumoi na Ruhanga, okwigana na Ruhanga tiyakwekwete. 7Akeyanga ekitinwa, wenene n'omwiru baba kumoi; yazarwa nashusha abantu. 8N'orwo yabaire muntu akaba mwetohya, yagira n'omuhuliro kugoba aha kufa. 9Aha rw'ekyo Ruhanga akamukuza muno, yamutunga eibara elikira buli ibara; 10k'eibara lya Yesu liragambwaga buli kitondwa omw'iguru n'omu nsi kiteke amajwi, 11kandi bona bebuge okwo Yesu Kirisito aba Mukama, babe nikwo baha batyo Ruhanga Isheichwe ekitinwa. 12Aha rw'ekyo bagonzibwa bange, nk'okwo mwakamupuliire na mbwenu mube nikwo mumpulira; ti rwo ndiho, n'orwo ndaba ntaliho, muteho amani mubone kurokoka, nimutina nimuchundwa. 13Aha rw'okuba Ruhanga nakora omuli inywe, mushobore kwenda n'okukora eby'okumushemeleza. 14Ebintu byona mubikore mutalikunonoba anga kuhakana, 15nirwo murabona kuba nyakatetere mara enyamibwa, mushobore kuba bana ba Ruhanga enzira kamogo omu makiro aga agabi agashobeize. Omu makiro aga ago mulimu, inywe omu nsi nimwaka nk'etara, 16mwekwete ekigambo ky'oburora, kityo orwo Kirisito alija mbone kweshanda kubona okwo amani gange gatafire bushai. 17Nangu n'orwo obwamba bwange buraba kitambo bakabushesha aha kihongo n'ekitambo ky'okwikiliza kwanyu, inye ninshemelerwa mara ninyeshanda aha rwanyu inywena. 18Kandi nainywe kutyo mushemelerwe mara mweshande hamoi nanye. 19Omukama Yesu k'arayenda ninshubira kubatwekera Timotheo bwangu mbone kumanya okwo muli nshemelerwe. 20Tinyinayo muntu alikumushusha, ow'okubagilira ekihika kwokwokwo aha rw'obuge bwanyu. 21Abandi bona nibakora ebyabo, tibalikukora bya Yesu Kirisito. 22Kyonkai nimumanya okwo Timotheo asaine, kuba okw'obona omwana na ishe, nikwo twemire hamoi kukora eikora ly'evangeli. 23Kityo nyina eshubi kumubatwekera bwangu orwo ndamara kubona okwo ebyange biraba. 24Mara n'inyesiga Omukama okwo omu mwanya gugufi nanye ndabagobaho. 25Ntekeleize nabona nikigasha kubatwekera Epafurodito murumuna wange, omukozi mutahi wange mara omwisherukare mutahi wange, mara entumwa yanyu eyo mwatumire kumpwera. 26Enshonga atura nayegomba kubabona inywena; mara talige, kandi mubaire mwahuliire okwo arwaire. 27Mazimakwo abaire arwaire yaija kufa. Nawe Ruhanga amuganyiire, mara taganyiire wenene wenkai, akaganyira na inye, obujune butaija bukamberabwo. 28Kityo nindibaliibwa muno kumutweka, mwije mushemelerwe kushuba kumubona, kandi nanye ndeke kuhwahwana muno. 29Kityo mumutore n'amashemelerwa gangi nimusindikwa engonzi zanyu ahali Mukama; kandi abantu nk'abo mubahe ekitinwa, 30aha rw'okuba akiliire hake nazira omulimo gwa Kirisito, abase kunjuna geigeigei emijunire eyo inywe mutakunjunire.

will be added

X\