ABAFILIPI 1

1Inye Paulo na Timotheo, abairu ba Yesu Kirisito, nituhandikira abegesibwa bona ba Filipi, okwo mujwangaine aha rwa Yesu Kirisito. Nituhandikira n'abaaskofu n'abadiakoni. 2Ruhanga Isheichwe n'Omukama Yesu Kirisito basinge babagilire ekisha, n'emilembe. 3Buli orwo ndikubaijuka ninsiima Ruhanga wange. 4Ebiro byona omu nshara zange nimbashabira inywena ninshemelerwa 5nyijwire esiimi aha rwa inywe kuranga evangeli kwema aha kiro kya mbere kugoba mwaha. 6Kandi nimanyira kimoi okwo Ruhanga ayatandikire omulimo gurungi ogu omuli inywe aligugobesheleza kiro ekyo Yesu Kirisito alija. 7Kisaine mbebuge nti inywena, enshonga muntura aha mutima. Omugisha ogwo natungirwe, na inywe mukagutungwa, n'orwo ndi jela. Kandi n'orwo mbaire ndi mwegeleere ndwaniliire evangeli yakwata. 8Okwo ndikubagilira orushusho inywena aha rw'engonzi za Yesu Kirisito, Ruhanga niwe mujulizi wange. 9Kandi nimbashabira engonzi zanyu zeyongere muno, mumanye n'okushobokerwa kushaagaho, 10mushobore kubona ebili birungi muno, kandi mube ntoronyonyo enzira kamogo, mwetekatekeire ekiro ekyo Kirisito aliija, 11Mushangwe mwijwire ebigiro by'obugorogoki ebilikutabuka ahali Yesu Kirisito, kubona kuha Ruhanga ekitinwa n'okumusingiza. 12Barumuna bange, ningonza kamushobokerwa okwo okufungwa kwange bubaire bushango bw'okurandisiliza evangeli. 13Abaisherukare bona b'ekikaare kya Kaisari n'abasigaire bona bamanyiire okwo nfungirwe ninturwa Kirisito. 14Kandi n'abakirisito abangi muno bagizire amani g'okwesiga Omukama aha rw'okufungwa kwange, kandi bamalize kushaagaho, nibagamba ebigambo bya Ruhanga batalikutina. 15Ego, nikwo, abandi nibaranga ahali Kirisito basindikirwe okuchuba n'empaka, kyonkai abandi nibaihwa aha mutima gurungi. 16Abalikwihwa aha mutima gurungi nibaranga ahali Kirisito basindikirwe engonzi, nibamanya okwo nagirwe jela aha rw'okurabira evangeli. 17Abandi okuranga ahali Kirisito nibaihwa aha kungingiza, tikugir'oti nikibaruga aha mutima, shana nibagendelera kumbonesa enaku omu kifungo. 18Mbwenu ekyo ti kantu! Inye nikinshemelera; ekikuru Kirisito kurangwa omu muhanda gwona gwona ogulikushoboka, omuntu alikagira mugendelero gurungi anga gubi. 19Mazima, kandi ninyija kushemelerwa! Ahakuba nimanya okwo omu nshara zanyu n'omu bujuni bwa Mwoyo wa Yesu Kirisito, barantaishura. 20Nyina eshubi mpango okwo ntasingwe nkashonara. Nka mbali nkatulira ninyija kumanzara muno, inyena okwo nkali, ndikarora anga ndikafa, ninyija kuhaisa Kirisito ekitinwa. 21Nobona inye Kirisito niwe aba burora bwange; kandi kandafa kurungi kushaagaho. 22Kandaba nkyali w'okurora nikwo kugir'oti nkyainayo eikora ly'amani kyonkai ely'egoshoko. Kyonkai tinakugamba kyondaihyaho. 23Nkwatiirwe embaju zombili. Nakugondize nfe nture na Kirisito, mara ekyo nikyo kirungi kushaaga. 24Kyonkai n'okufa kw'omugasho bwoli aha bwanyu. 25Ekyo ninkimanyage okwo ndikwija kwikara kunu hamoi nainywe inywena, mubone kweyongera omu kwesiga, mugire n'ebyera, 26inye mbahe obushango bw'okwebuga Kirisito Yesu, aha rw'enshonga y'okubagobaho orundi. 27Ekikuru emirolere yanyu egire entambuka emoi n'evangeli ya Kirisito: Kityo ndikaija nkababona anga ndikaba ntaizire, mpulire okwo mugumire kandi mukomeire hamoi, kandi mwemire hamoi kurabira okwikiliza okwo tuhabwa evangeli, 28kandi okwo abalikubahakanisa batalikubatinisa aha kigambo kyona kyona. Aka kabonero akali aha mushana, okwo balisilika kyonkai inywe Ruhanga alibarokora. 29Nobona timwashobozibwe kwesiga Kirisito kushai, mukashoboziibwa n'okumushasira, 30nimurwana endashana nk'eyo mwaboine nindashana, mara na mwaha nimugimpuliraho.

will be added

X\