MARIKO 9

1Abagambira ati, «Nimbagambira amazima, haliho abeemeleire aha abataliziza kufa bataboine bukama bwa Ruhanga nibwija n'amani.» 2K'ebiro byakeire mukaga, Yesu akwata Petero na Yakobo na Yohana, abatwara bonkai aha ibanga lirai lirai; ahinduka omu maisho gabo, 3ebijwarobye byengelera, byera katare teiteitei, ekyelere ekyo dobi wena wena omu nsi atakafuraga mwendo akagwez'atyo. 4Kandi Musa na Eliya nabo bababonekera; bakaba nibafumora na Yesu. 5Petero agambira Yesu ati, «Mwegesa, kirungi kubona tuli aha. Twombeke obusisira bushatu: Akawe, aka Musa n'aka Eliya.» 6Tiyaboine kya kugamba, nobona bakatina muno. 7Ekichwi kija kibemelera eiguru, n'eiraka liruga omu kichwi ekyo liti, «Ogu n'iwe Mwana wange, omugonzibwa wange, mumuhulilize.» 8Kugya kuleba oku n'oku bakaba batakibona muntu shana Yesu wenkai. 9Kababaire nibasongoka eibanga, Yesu abatanga kubarulira omuntu wena wena ebyo babona, kuhika orwo Omwana w'Omuntu aliba yahimbukire omu bafu. 10Okuhimbuka omu bafu baikara nibakwebazaho enshonga yakwo, mara ekigambo ekyo bakibiika aha mutima. 11Bamubaza bati, «Ahakubaki abegesa b'Amateka bagamba okwo Eliya aragiirwe kubanza kwija?» 12Abahorora ati, «Eliya naijakwo ali wa mbere kutekateka buli kantu; isi nk'ebihandiko bitakatifu bilikugamba okwo Omwana w'Omuntu ali w'okushasha nibamutura ebintu eby'engeli zingi mara bamujaamye? 13Kyonkai kambagambire: Eliya araizire, bamukora okwo babaire nibenda, kuhonderana n'okwo ebihandiko bitakatifu bilikumugambaho.» 14Orwo bagarukire mbali abegesibwa abandi babaire bali, babona embaga mpango ebabumbiliire baliho nibahankana n'abegesa b'Amateka. 15Embaga yona kayaboine atyo, etangara muno, egenda eirukire kumukeisa. 16Yesu abaza abegesibwabe ati, «Nimuhankana nabo ahali kihai?» 17Harugwamu omuntu omu mbaga ati, «Mwegesa, nakuletera mutabani wange, akakwatwa eiSitani lyamutitaza. 18Orwo likamara kumuzangishanyia, limukuntura ahansi arugwamu ekifuzi, anena n'amaino, agumangana wena. Nashaba abegesibwa bawe kulibinga kyonkai balemwa.» 19Abahorora ati, «Inywe muzarwa ogutalikwikiliza, ndiikara nainywe kugoba maki? Isi ndibegumisiliza mberehai? Mumundetere.» 20Omwana bamumuletera. Sitani kumara kubona Yesu, omwana tilimwikaza, limukabisa nk'owensimbu, agwa ahansi ayezilinga, ekifuzi kimwija aha munwa. 21Yesu abaza ishemuntu ati, «Yamaraki akwetwe eiSitani eli?» Ogu ati, «Kwema buto. 22Liikara nilimukuntura omu muliro n'omu maizi, lyenda kumwita. Kyonkai k'oraba oina ekyo wakukoraho, singa otuganyibwe otujune.» 23Yesu amugambira ati, «Nogamba oti, ‹K'oraba oina ekyo wakukoraho?› Buli muntu aina obwesige, yakukolerwa buli kantu.» 24Niho honkai ishe mwana ataaga ati, «N'inyesiga; bantunge okwesiga okushagireho!» 25Yesu kayaboine okwo embaga yaija eligisire, akabukira eiSitani ati, «Iwe Sitani omutita mara ekigara matwi, n'inye ndikukuhangira, omurugemu mara otaliziza kumugarukamu rundi.» 26EiSitani likunga mara limukabisa n'amani gangi muno nk'owensimbu, lirugamu, omwana ashusha ayafa; nangu abantu abangi muno bagira bati, «Yafa.» 27Kyonkai Yesu amukwata omukono amwimukya, aimuka. 28Yesu kayamazire kutaha omu nju, abegesibwa bamubaza omu kebeto bati, «Ahakubaki ichwe twalemwa kulibinga?» 29Abahorora ati, «Elya ngeli egi tilyakubingwa kushai obuzira nshara na kusiiba.» 30Yesu n'abegesibwabe barug'okwo baraba Galilaya. Kandi Yesu wenene akaba atalikwenda kabamanya mbali ali; 31kuba akaba nayegesa abegesibwabe, nabagambira ati, «Omwana w'Omuntu bhalimunaga omu mikono y'abantu bamwite. Bamare kumwita ebiro bikye bishatu ahimbuke.» 32Kyonkai ebyo yagambire tibabishobokeirwe, mara kandi batina kumubaza. 33Baija Kaperinaumu. Kayabaire ali omu nju ababaza ati, «Omu kihanda mwaba nimufumora ahali kihai?» 34Bonene besiza. Omu kihanda bakaba nibafumora kumanya omukuru muno omuli bonene n'ohai. 35Ashuntama, abeta okwo bali 12, abagambira ati, «Alikwenda kuba wa mbere aragiirwe kuba mujege muno omuli inywe inywena mara abe mwiru wanyu inywena.» 36Akwata omwana amuteka omugati yabo, amukwata abagambira ati, 37«Kaishe muntu atoora omwana nk'ogu omw'ibara lyange atora inye; kandi antora tatora inye shana atora ayantumire.» 38Yohana agambira Yesu ati, «Mwegesa, twina owo tuboine nabinga Amasitani nakoza eibara lyawe. Tumutangire aha rw'enshonga abaire atali waitu.» 39Yesu agamba ati, «Mutamutanga; kuba taliho muntu alikukora kitangazo omw'ibara lyange aho n'aho akashuba akangambaho kubi. 40Atalikututamwa ogwo natugonza. 41Nimbagambira amazima, alibaha ekikompe ky'amaizi g'okunywa ngu orwo muli bange, ogwo taliburwa rongoroye n'akake. 42«Alisitaza omoiho omuli aba abalikunyikiliza kyakushemeire kabakumukomire orubengo ruhango omu bikya bakamunaga omu nyanja. 43K'omukono gwawe guraba nigukufakaza, ogutemeho, hakili otahe omu burora obutalihwaho noburwaho orugingo rumoi, kushaaga okugya omu rwota rw'omuliro ogutarara oina emikono ebili, 44[mbali n'enzito ezibalya zitafa.] 45N'okuguru kwawe kakulikukufakaza okutemeho. Hakili otahe omu burora obutalihwaho olemaire kushaaga okunagwa omu rwota rw'omuliro ogutarara oina amaguru gombili, 46[mbali enzito zabo zitafa, n'omuliro gutarara.] 47Eliisho lyawe kalilikufakaza olinonkoremu; hakili otahe omu bukama bwa Ruhanga oina eliisho limoi, kushaaga okunagwa omu rwota rw'omuliro ogutarara oina amaisho gabili, 48mbali enzito zabo zitafa, n'omuliro tiguraara. 49Buli muntu alyezibwa omuliro nk'okwo ekitambo kyezibwa omwonyu. 50Omwonyu gwonene guba gurungi; kyonkai kagumara kuhwamu obunuzi bwagwo, wakugurung'otai? Mugire akonyu omuli inywe, mara mugire emilembe omuntu na mutahiwe.»

will be added

X\