MARIKO 7

1Abafarisayo n'abegesa b'Amateka ababaire barugire Yerusalemu bagoba Yesu, 2bagya babona okwo abegesibwabe abandi balikuliisa emikono ehagaire, nikwo kugir'oti etanabire. 3(Abafarisayo n'Abayahudi abandi bona, tibalya batanabire mikono, nibegendeleza emichwo ya baish'enkurubo. 4Kumara kuruga omu katare tibaina kulya batanabire. Haliho n'emichwo endijo nyingi eyo begendeleza, nk'okwogya ekikompe n'enyungu n'ebikwato by'omulinga nangu n'ebitanda.) 5Abafarisayo n'abegesa b'Amateka bamubaza kubaki abegesibwabe batalikugendeleza michwo ya baishenkurubo, bakalisa emikono ehagaire. 6Abagambira ati, «Inywe ngobya, Isaya akaranga amazima ahali inywe, nk'okwo kili omu bihandiko bitakatifu, ati ‹Abantu aba ekitinwa bampa eky'aha munwa kushai, kyonkai emitima yabo tenyetaireho; 7okunfukamira kwabo tikwina mugasho, Amateka agatairweho abantu nigo balikwegesa oti nigo ga Ruhanga.› 8Nimusigiilira emihango ya Ruhanga, emichwo ey'abantu niyo mulikugwaho enda n'amabere.» 9Abagambira ati, «Mwina akalyo k'okwanga emihango ya Ruhanga, mubone kuguma aha michwo yanyu! 10Musa akagamba ati, ‹Okunire sho na nyoko;› kandi ‹Ow'okukeena ishe anga nyina nakafe.› 11Nawe inywe nimugira muti, ‹K'omuntu yakugambira ishe anga nyina ati: Ekyo nakukuhaire kyabaire Korubani› (nikwo kugir'oti kihongeirwe Ruhanga) 12aho nimuba mwamutangire kugira ekyo yakolera ishe anga nyina, 13ebyo Ruhanga alikugamba nimubisheshamu amaizi aha rw'emichwo yanyu eyo mulikwegesa banu. Kandi ebintu nk'ebi nimukora bingi.» 14Yesu ashuba ayeta abantu abagambira ati, «Mumpulilize inywena mara mushobokerwe: 15taliho kintu kiruga njai kikataha mu muntu kikamuhagaza, shana ebimuruga omunda nibyo bimuhagaza. 16[Araba aina amatwi g'okuhulira ahulire.»] 17Kayabaire yatahire omunju yasigireho abantu, abegesibwabe bamubaza enfumo egi. 18Abagambira ati, «Lero nainywe timulikushobokerwa? Timulikubona okwo ekiruga aheru y'omuntu kikamutahamu tikyakumuhagaza? 19Enshonga nikimutaha omu rubunda, tikilimutaha mu mwoyo, mara nikishuba nikituruka.» (Kityo akaba nagamba okwo ebyakulya byona tibiba bihagare.) 20Agamba ati, «Ekiruga omu muntu nikyo kimuhagaza. 21Omu mutima gw'omuntu nimwo haruga ebitekelezo bibi: obusiyani, obushuma, okwita omuntu, obujanga, 22okwegomba eby'abandi, omutima gubi, obulyalya, okutekunira, eitima, okujumangana, eikuru n'oburofu. 23Ebibi ebi byona biruga omunda, mara nibyo bihagaza omuntu.» 24Yesu arug'okwo agya omu nsi eyataine Tiro na Sidoni. Agira mbali yataha omu nju, atalikwenda muntu k'amanya okwo aliyo, kyonkai tibashoboire kumusheleka. 25Niho honkai omukazi yamuhuliize. Akashangwa aina omwana muto w'omwisiki akwetwe Sitani, aija agwa Yesu omu maguru. 26Omukazi akaba ali Mugirikikazi, ow'oruganda rw'Abasirofoiniki. Amutagiliza kubinga eiSitani omu muhara. 27Yesu amugambira ati, «K'abaana babanze balye, aha rw'okuba ti kirungi kukwata mukate gw'abaana okagurasira mbwa.» 28Nawe omukazi amuhorora ati, «Nikwo, waitu Mukama, kyonkai n'abaana kababa nibalya, ebibaragara embwa zibilya.» 29Yesu amugambira ati, «Aha kigambo kyawe eki kwata omuhanda ogende, muhara wawe yarugwamu eiSitani.» 30Omukazi ashuba omuka, ashanga omwana abyamire aha kitanda, eiSitani lyagenzire. 31Yesu aruga omu nsi eyataine Tiro, araba Sidoni agoba aha Nyanja ya Galilaya, alesirwe omu nsi y'ebigo 10 ebyayetwaga Dekapoli. 32Bamuletera omushaija omwigazi w'amatwi mara mutita. Bamutagiliza kumutaho omukono. 33Amwihya omu mbaga agenda nawe wenkai omu kebeto, amukwata omu matwi, ashuba achwa akachwanta amukwata aha rulimi. 34Yesu wenene aleba eiguru, aikya ekikohe, amara amugambira ati, «Efata,» nikwo kugir'oti, «Okinguke.» 35Amatwi ga wenene gakinguka, orulimi rukomorogoka, agamba bunyanungi. 36Atanga abantu bona kubigambira omuntu. Kyonkai okwo yabatangaga baba nikwo beyongera kubigamba n'amani. 37Batangara, baburwa eky'okugamba, bati, «Yatebekanisa buli kantu; nangu n'abaigazi b'amatwi yabashoboza kuhulira, kandi abatita yabagambisa.»

will be added

X\