MARIKO 6

1Yesu aruga mbali yabaire ali, agaruka owabo. Abegesibwabe bamuhondera. 2Ahali Sabato ayegesa omu sinagogi. Bangi abamuhuliire bashoberwa, bebaza bati, «Omuntu ogu ebi byona akabiyaha? Akahabwa bumanyiki obu? Eby'alikukora by'amani bitai? 3Ti museremara ogu? Aba mutabani wa Maria, ni murumuna Yakobo, na Yose, na Yuda, na Simoni, na banyanya tutura nabo munu.» Bamwanga. 4Yesu abagambira ati, «Omurangi takaburwaga kitinwa, shana owabo n'omu banyarugandabe n'omwabo mwonene.» 5Tiyakozireyo ky'amani, shana akatekaho abarwaire bake emikono mara yabakiza. 6Okutesiga kwabo kukamushobeza. 7Ayeta eikumi na babili, abatuma babili babili, abaha n'obushobora bw'okubinga Amasitani. 8Abagambira kutatwara kantu kona kona omu rugendo shana enkoni. Omukate n'enshaho n'amahera omu mifuko ebyo chei. 9Abajubura kujwara enkaito, kyonkai okujwara ekanzu ibili ayanga. 10Abagambira ati, «Mbali muragyaga, enju eyo mulitahamu mwikare omwo kulemwa kugoba orwo mulirugayo. 11Hona hona mbali balibanga, bakanga n'okubahulira, kamulija kurugayo mukunkumure echuuchu aha maguru ganyu, balimanyir'aho.» 12Kityo bagenda barangira abantu babone kwechuza amafu gabo. 13Babinga Amasitani gangi, basiiga abarwaire bangi amajuta babakiza. 14Omukama Herode abihulira, aha rw'okuba eibara lya Yesu likaba niliranganwa. Abantu abandi bakaba nibagamba bati, «Yohana Omubatiza ahimbukire omu bafu, niyo nshonga aina obushobora buti.» 15Kyonkai abandi bati, «Ni Eliya.» Abandi bati, «Murangi nk'abarangi aba karai.» 16Herode orwo yabihuliire ati, «Yohana owo natemireho omutwe ahimbukire.» 17Herode akaba atumire ab'okukwata Yohana, bamuboha bamufunga nibamutura Herodia, muka Filipo murumuna Herode, aha rw'enshonga Herode akaba amushweire. 18Yohana akaba agambiire Herode ati, «Nikizira ahali iwe kushwera muramu wawe.» 19Nikwo Herodia kumukwatirwa enzigu, akagonza kumwita, kyonkai tiyashoboire, 20kuba Herode yatinaga Yohana aha rw'okumumanya okwo ali mugorogoki mara mutakatifu, kityo yaba namulinda. Kayamazire kumuhulira yaikara nahwahwana muno omwoyo, kandi okwo yamuhuliilizaga n'amashemelerwa. 21Bwija bushangwa buli bushango Herode nashemeza ekirokye ky'okuzarwa, akoleire abaramatabe n'abanyiginyabe n'abatwazi ba Galilaya obugenyi. 22Muhara wa Herodia aija amuzinira amushemeleza hamoi n'abagenyibe. Omukama agambira omwisiki ati, «Ongambire kyona kyona eky'olikwenda, ndakikuha.» 23Amwenahilira ati, «Eky'oranyenza kyona kyona ninkikuha, nangu n'enusu y'engoma yange.» 24Omwisiki aturuka abaza nyina ati, «Nshabeki?» Nyina ati, «Omutwe gwa Yohana Omubatiza.» 25Achwanisa agaruka owa Herode bwangu bwangu, amushaba ati, «Ningonza mbwenu aha ompe omutwe gwa Yohana Omubatiza aha sinia.» 26Omukama ajunara ebishobeize. Kyonkai aha rw'ebyo yabaire anahiire n'enshoni z'abagenyibe, takunda kuchwa kigambo ekyo yabaire agambiire omwisiki ogwo. 27Arahuka atuma omwisherukare omulinzi, kuleta omutwe gwa Yohana. Omwisherukare agenda jela atema Yohana omutwe, 28aguleta aha sinia aguheleza omwisiki. Omwisiki agutwalira nyina. 29Abegesibwa ba Yohana babihulira, baija batwara omubiligwe baguziika omu nyanga. 30Entumwa zigaruka owa Yesu zimubaruulira ebyo zakozire byona n'ebyo zayegesize. 31Azigambira ati, «Mwije nywenkai mbali abantu batali, mwikyeho kake.» Nobona abaijaga aba nibagenda bakaba bali bangi, n'akanya k'okulya tibakukaboine. 32Bagenda bonkai omu bwato bagya mbali omwaga gutali. 33Abantu bangi bababona nibagenda mara babekomya, baruga omu bigo byona bairukire, batwarwa ogw'amaguru babagoberayo mbere. 34Yesu aruga omu bwato agya aha mwaro abona embaga y'amani, abaganyibwa aha enshonga bakaba bali nk'entaama ezitaina mushumba. Abanza kubegesa bingi. 35Eizoba kalyalengire abegesibwabe bamugoba bamugambira bati, «Aha mbali tuli karungu, mara n'eizoba lyalenga. 36Obataishure bagye omu byaro ebili hagufi bagure akakulya.» 37Wenene abahorora ati, «Inywe mube n'inywe mubaha ak'okulya.» Bamubaza bati, «Ichwe tugende tugure omukate gw'edinari 200, tube nigwo tubaha kulya?» 38Ababaza ati, «Mwina emikate engahai?» Bagya kuleba bamugambira bati, «Etanu n'enfuru ibili.» 39Aragira embaga yona kushuntama aha bunyasi omu bichweka. 40Bashuntama omu bichweka, 100 omu 100, 50 omu 50. 41Yesu akwata emikate egyo etanu n'enfuru ibili, araramira eiguru, asiima, abegabegura emikate egyo, agiha abegesibwa kabagabira abantu. N'enfuru zombili azibagabira zona. 42Bona balya baiguta. 43Bashombokya entukuru 12 z'obubeguka by'emikate n'enfuru. 44Abaliire omukate ogwo bakaba bali bantu 5,000. 45Yesu ayanguha agambira abegesibwabe kusabara omu bwato bakamwebembera buseli, Betisaida, oku nataishura embaga kutaha. 46Kayabaire yarugangaineho nabo atemba omw'ibanga kushoma enshara. 47Eizoba kutobera obwato bushangwa buli omu nyanja, kandi wenene ali wenkai aha mwaro. 48Abona okwo balikubuga nibyanga. Omuyaga gukaba nigwija gubataahiremu n'amani. Omu kichweka ky'okwema esaa mwenda kwija kukeisa obwire nimwo Yesu yabagobeireho, natambuka aha maizi omu nyanja. Akaba agendeleire kubahingura, 49kyonkai kabamuboine natambuka aha maizi bamulenga kuba muzimu, bakunga; 50nobona bona bakamubona batina. Ayanguha abagambira ati, «Mugume, n'inye; mutatina.» 51Ataha omu bwato abashanga, n'omuyaga guchulera. Batangara muno munonga, 52kuba ekyakozirwe aha mikate bakaba batakishobokeirwe aha rw'emitima yabo kugumangana. 53Orwo bamazire kushaabuka bagoba Genezareti, basiiga bagoromora obwato. 54Kabamazire kuruga omu bwato, abantu banguha bamanya Yesu. 55Bagenda nibairuka omu byaro ebili haihi, babanza kuleta abarwaire aha machera, nibabamushangisa hona hona mbali bamuhulizaga. 56Orwo yakaijaga omu byaro n'omu bigo, baleta abarwaire nibababyamika omu katare, bamutagiliza buzima kukwata aha mukugiro gw'ekijwarokye kushai. Bona abakwatagaho bakiraga.

will be added

X\