MARIKO 5

1Yesu n'abegesibwabe bagoba buseli bunu bw'enyanja, omu nsi y'Abanyagerasi. 2Kayamazire kuruga omu bwato, omushaija aruga omu nziiko akwetwe eiSitani aija amutahiremu. 3Wenene ogwo yaturaga omu nyanga, bakaba batakimuboha, nangu n'omunyororo gwonkai kugumutaho. 4Bamukomaga n'empingo n'eminyororo kyonkai eminyororo agigutura, n'empingo azihendahenda ebigutuka. Taliho muntu yakushoboire kumwelenga. 5Kiro na mushana yaikaraga nakunga omu nyanga n'omu mabanga, nayekaratuza amabare. 6Kayamazire kubonera Yesu harai, agenda airukire amufukamira. 7Akunga n'eiraka lihango, ati, «Nonyenzaki iwe Yesu Mwana wa Rukirabyona? Nakutaho Ruhanga otanshasa.» 8Okugamba atyo Yesu akaba amugambiire ati, «Iwe Sitani omuntu ogu omurugemu!» 9Yesu abaza Sitani ati, «Eibara wab'ohai?» Ahorora ati, «Eibara lyange ndi Ihe; aha rw'okuba tuli bangi.» 10Amutagiliza muno Amasitani ago atagabinga mu nsi egyo. 11Aho hakaba haliho obuhyo bungi bw'empunu nizilya omw'ibanga; 12gamutagiliza gati, «Otutaishure tugye omu mpunu.» 13Aba nikwo agajubura, omushaija gamurugamu, gataha omu mpunu, zikaba nizelenga kugoba omu 2,000. Zihilingita aha bulengo, zigwa omu nyanja zitontobera. 14Abashumba bairuka, ebyo babona eba baruro omu kigo n'omu byaro. Abantu baija kwelebera ekyabaho. 15Bakwata muhanda baija ahali Yesu, babona ayabaire akwetwe Amasitani ali aho ashuntamire, ajwete mara aina amagezige gona, omuntu ayabaire aina eihe ly'Amasitani, batina. 16Ababaire baboine eky'omurwaire w'Amasitani n'ebyaba aha mpunu babarura. 17Abantu babanza kutagiliza Yesu k'abarugira omu nsi yabo. 18Kayabaire nataha omu bwato omushaija ayabaire akwetwe Amasitani amushaba kugenda nawe. 19Yesu ayanga, amugambira ati, «Oshube owanyu obone bataahi bawe, obagambiire byona eby'Omukama yakukolera, n'okwo yakuganyira.» 20Omushaija akwata omuhanda agaruka omu nsi y'ebigo 10 ebyayetwaga Dekapoli, agamba ebyo Yesu yamukolera; abantu bona batangara. 21Orwo Yesu yagarukire buseli akashabuka n'obwato, embaga emuhurulira nyingi, aho wenene ali haihi n'enyanja. 22Aijwa omukuru omoi w'esinagogi eibaralye Yairo. Kayamazire kubona Yesu amugwa omu maguru, 23amutagiliza ati, «Kahara kange kali haihi kufa. Singa oije okateho omukono kakire, karore.» 24Yesu agenda na Yairo. Abantu bangi bamuhondera, nibamufunza oku n'oku omu muhanda. 25Hakaba haliyo omukazi arwaire ekiganga emyaka 12, 26yagiire aha batambi batali bake, empiha zamuhoire aha mukono, aburwa kwikya, anenwa kushagaho. 27Akaba yahuliize Yesu, aho aruga enyuma amuhondeire akwata aha kijwarokye. 28Akaba nagira ati, «N'orwo ndakwata aha bijwarobye kushai ndakira.» 29Aho n'aho ekiganga kilekera, ayehulira n'omu rugingo okwo yakira oburwaire. 30Yesu kuhulira okwo amani gamurugamu, akubuka bwangu amaisho aganaga omu mbaga, abaza ati, «Ayakwata aha bijwaro byange n'ohai?» 31Abegesibwabe bamugambira bati, «Nobona okwo embaga ekutangatangire embaju zona, noshuba nobaza oti, ‹Ayankwataho n'ohai?› » 32Wenene aleba oku n'oku nahiga ayamukwataho. 33Nawe omukazi akashangwa namanya ebyamubaho, aija natina, nachundwa, amugwa omu maisho amugambira amazima gona. 34Yesu amugambira ati, «Mwana wange, okwesiga kwawe kwakukiza; ogende n'emilembe mara okire oburwaire.» 35Kayabaire akyagamba haliho abarugire omw'omukuru w'esinagogi, bagamba bati, «Muhara wawe yafire. Omwegesa otamwita kubi; lekera.» 36Ebyo bagamba Yesu tabitaho mutima, agambira omukuru w'esinagogi ati, «Otatina, iwe ekikuru oyesige.» 37Atanga ab'okumuhondera, shana Petero na Yakobo n'omurumuna Yohana. 38Orwo baagobire omw'omukuru w'esinagogi, ashanga abantu nibachura eyobobo. 39Kayamazire kutaha omu nju ababaza ati, «Kiki nka muliyo nimuchura eyobobo? Omwana tafire anagiire.» 40Bamushekelera. Abaturukya aheru. Akwata Yairo na mukaziwe n'abo yabaire ainabo, ataha omu kiyumba eky'omwana yabaire halimu. 41Akwata omwana omukono, amugambira ati, «Talita kumi;» nikwo kugir'oti, «Kaisiki ninkugambira imuka.» 42Niho honkai omwisiki aimuka atambuka (akaba aina emyaka ikumi n'ebili), bagwa omu kitangaro. 43Abatanga muno ekigambo eki kukigambira abantu, ashuba abagambira kumuha ak'okulya.

will be added

X\