MARIKO 4

1Yesu ashuba abanza kwegesa aha Nyanja ya Galilaya. Abantu bangi muno basikuka bamugoba, ataha omu bwato omu nyanja abushuntamamu. Kandi embaga eikara aha mwaro. 2Abegesa ebintu bingi muno omu nfumo; abegesa nagamba ati, 3«Muhulire! Omubibi akaturuka kugya kubiba. 4Omu kubiba, embibo ezindi zagwa omu muhanda, ebinyonyi byaija byazilya. 5Embibo ezindi zagwa aha nsi ey'orwazi, aho eitaka likaba litaliho lingi, n'okumera zimera bwangu aha rw'enshonga eitaka likaba litali lingi kuzimu. 6Omushana kagwajwire gwazibabuura. Zikoma aha rw'enshonga zikaba zitaina mizi. 7Embibo ezindi zagwa omu mahwa, zakura, kyonkai amahwa gazibuza obwikizo, tizarabire. 8Embibo ezindi zagwa aha itaka lirungi, zamera, zageijage, zayakya, zaraba: Zaraba 30 omu 30, 60 omu 60,100 omu 100. 9Kigira matwi g'okuhulira ahulire.» 10Yesu kayabaire yasigaire wenkai, ababaire bamuli haihi, hamoi n'eikumi na babili, bamubaza emigani egyo. 11Abagambira ati, «Inywe mushuruliirwe enama y'obukama bwa Ruhanga, kyonkai abali aheru abo nibagambirwa omu nfumo. 12Okubona babone kyonkai batagira kyobaihyamu, okuhulira bahulire kyonkai batagira kyobashobokerwa, bataija bakahinduka bakagarulirwa.» 13Yesu abaza abegesibwabe ati, «Inywe timulikushobokerwa nfumo egi? Aho enfumo ezindi zona murazishobokerwa mutai? 14Omubibi nabiba ekigambo. 15Aba nibo bali omu muhanda mbali ekigambo kilikubibwa. Orwo balikukihulira Sitani ayanguha aija aihyamu ekigambo ekyo ekyababibwamu. 16Kandi kutyo ezabibirwe aha nsi ey'orwazi nibo bahulira ekigambo mara bakakitora bwangu nibashemelerwa. 17Kyonkai omu mitima yabo tibaina mizi. Nibaikara n'ekigambo akanya kagufi. Orwo balikugwa omu biyengo anga bakagingizibwa nibaturwa ekigambo ekyo, banguha bagwa. 18Abandi nizo mbibo ezibibirwe omu mahwa. Nibo bahulira ekigambo, 19kyonkai akahyahyano k'ensi n'okunulirwa eitunga, n'orwoyoyo rw'ebintu ebindi bibatahamu bifundagatanisa ekigambo kiburwa obwikizo, kiba kitakiraba. 20Nawe embibo ezabibirwe aha itaka lirungi nibo bantu abahulira ekigambo bakakiikiliza mara kikaraba 30 omu 30,60 omu 60,100 omu 100.» 21Kandi Yesu abagambira ati, «Etaara bagileta kugijumikiza ekitukuru? Isi bagiteka ahansi y'ekitanda? Manti egya ahatungamire. 22Taliho kishelekire ekitalishururwa. Kandi tabayo nama etaligya aha mushana. 23K'omuntu araba aina amatwi g'okuhulira, ahulire.» 24Ashuba abagambira ati, «Ebyo mulikuhulira mubyekomye! Eiramu elyo muramura banu nilyo muliramurwa, nangu n'okushagaho. 25Manyasi araba ain'ake n'iwe alyongerwaho; kandi atainake, nangu n'ak'ainako balikamwaka.» 26Yesu ayeyongera abagambira ati, «Obukama bwa Ruhanga nibushusha okwo omuntu yakunaganagire embibo aha itaka, 27kyaba kiro yanagira, bwankya yaimuka, embibo ekamera mara ekakura atamanyire nibigenda bitai. 28Embibo zonene nizemeza omw'itaka. Akababi niko kabanza, n'ekikumba kitaho, ahanyuma ekiraba kyera. 29Engano k'emara kwera, talinza, akwata orwabyo ashara, manyasi eigesha lyahika.» 30Yesu gamba ati, «Obukama bwa Ruhanga tubushushaniseki, anga nfumoki eyo turachwa ekabushoborora? 31Nibushusha enjuma ya Haradali. Enjuma egyo kubibwa omu itaka, omu nsi zona omu njuma niyo eba nke bwoli bwoli. 32Orwo ebibwa ekura erugwamu ekiti kihango muno kushaaga ebiti ebindi byona, kigira amatagi gahango, n'ebinyonyi bigombekamu ebishunkuli.» 33Yabagambiraga ekigambo omu nfumo nk'ezi ezo bashoboraga kushobokerwa. 34Tiyabagambiraga atabachweleire nfumo, kyonkai kayabaga yasigaire n'abegesibwa ba wenene abaitoitorolera buli kantu. 35Kir'ekyo kalyatobeire Yesu agambira abegesibwabe ati, «Tushabuke tugye buseli.» 36Basigaho embaga, bagenda nawe omu bwato, kyonkai wenene akashangwa yabutahiremu. Kandi akaba ainaho amato agandi. 37Omuyaga gwija n'amani, amayengo gatera nigagwa omu bwato, obwato buralira kwijura. 38Yesu akaba ali aha ngoba y'obwato, ayeshagwire omuto anagiire. Bamusisiimura nibamugambira bati, «Mwegesa, watuleka twafa?» 39Asisiimuka akabukira omuyaga, agambira n'enyanja ati, «Hora! Chuleera!» Omuyaga gubutama, habaho obuchulezi bungi. 40Agambira abegesibwa ati, «Nimutinisibwaki? Timulikunyesiga?» 41Bakwatwa obutini bungi babazangana bati, «Kyonkai ogu ab'ohai, kuhulirwa omuyaga n'enyanja?»

will be added

X\