MARIKO 2

1Ebiro kabyakeireho bike Yesu akagaruka Kaperinaumu, kimanyika okwo aizire, ali omuka. 2Abantu bangi basikuka baburwa n'obwikaro, nangu n'aha mulyango chei; mara abarangira ekigambo. 3Abandi baija bamuletera ayabaire akabire orubaju, ashutwirwe abantu banai. 4Kababuzirwe agamugoba aha rw'obungi bw'abantu, balengelera mbali ali bashakarura orushwi. Orwo bamazire kutema ekihuru bamusongora bamutaire aha machera ago wenene ogwo ayabaire akabire orubaju yabaire abyamireho. 5Yesu kayaboine okwesiga kwabo, agambira ayabaire akabire orubaju ati, «Mwana wange, wagarulirwa amafu gawe.» 6Ahonu abegesa b'Amateka abandi bashangwa bashuntamireho, nibebaza aha mutima bati, 7«Ahakubaki omuntu ogu nagamba ati? Yarogota! Ayakugarulira amafu n'ohai atali Ruhanga wenkai?» 8Yesu ayanguha akenga omu mwoyo okwo abantu aba balikwebaza batyo aha mutima, na wenene ababaza ati, «Kiki kwebaza mutyo aha mutima? 9Ekyorobire kushaaga ni kihai, kugambira akabire orubaju nti, ‹Wagarulirwa amafu gawe,› anga kugamba nti, ‹Imuka, okwate amachera gawe otambuke?› 10Kyonkai mumanye okwo Omwana w'Omuntu omu nsi aina obushobora bw'okugarulira amafu,» nagambira akabire orubaju ati, 11«N'inye ndikukugambira, imuka, kwata amachera gawe ogye omuka.» 12Omusharaare talinda, aimuka akwata amachera aturuka. Bona okwo bakamulebire, kibabera kitangaro, bahaisiliza na Ruhanga bakwese, «Ekilikushusha kiti titukakibonaga.» 13Yesu ashuba atwarwa ogw'enyanja, embaga ehurura emuta omugati. Abegesa. 14Kayabaire nahingura abona Levi eya Alifayo ashuntamire omu ofisi y'abashoza, amugambira ati, «Ompondere.» Levi aimuka amuhondera. 15Kayabaire ali omwa Levi nalya akakulya, abashoza bangi n'abafakare bashuntama nawe, ahakuba hakaba haliho bangi ababaire bamuhondeire. 16Abegesa b'Amateka n'Abafarisayo kababoine okwo alikulya n'abashoza n'abafakare, babaza abegesibwabe bati, «Ahakubaki omwegesa wanyu nalya n'abaashoza n'abafakare?» 17Yesu kayahuliire ekigambo ekyo abagambira ati, «Abagumire tibetaaga mutambi, shana abarwaire. Nkaija kweta abafakare, tinaizire kweta bagorogoki.» 18Abegesibwa ba Yohana n'Abafarisayo basiibaga. Aho abantu baija babaza Yesu bati, «Kubaki abegesibwa ba Yohana n'Abafarisayo basiiba, kyonkai iwe abegesibwa bawe tibalikusiiba?» 19Yesu abahorora ati, «Abagenyi aha kiro ky'obushwere bakusiiba baina kishwera? Orwo bakyaina kishwera tibakusiiba. 20Ebiro biliija orwo balibaihyaho kishwera, aho kir'ekyo balisiiba. 21Taliho muntu ateka kiraka kihya aha mwendo gukuru. Kayakugira atyo ekiraka kitaguka aha mwendo, ekihya kiruga aha mwendo ogukuru, lero kandi aho emitagukire eba mibi kushagaho. 22Taliho muntu ateka divai mpya mu nshaho nkuru ya ruhu. Kayakutwaza atyo edivai ebarura enshaho, edivai eshesheka, n'enshaho z'oruhu zifa. Edivai empya egya omu nshaho z'oruhu ezihya.» 23Ahali Sabato emoi Yesu ashangwa naraba omu ndimiro z'engano. Kababaire nibagenda, abegesibwabe babanza kugutura ebikumba by'engano. 24Nikwo Abafarisayo kubaza Yesu bati, «Olebe, kubaki abegesibwa bawe nibakora ekizira ahali Sabato?» 25Abagambira ati, «Timukashomaga ekyo Daudi yagizire orwo yabaire ataina kantu n'enjara ekamulya wenene n'abo yabaire ainabo: 26okwo yatahire Rwensinga omwa Ruhanga, Abiatari ali Mukuhani Nyamukuru, akalya Omukate gw'Obusinge bwa Ruhanga, ogutajubulirwa muntu n'omoi shana kuliibwa abakuhani bonkai, yamara yahaho n'abo yabaire ainabo?» 27Abagambira ati, «Sabato ekagyaho aha rw'omuntu, omuntu talikutwarwa Sabato. 28Kityo Omwana w'Omuntu nangu n'iwe Mukama wa Sabato.»

will be added

X\