MARIKO 15

1Orwo obwire bwakeire buti, abakuhani bakuru, n'abagurusi, n'abegesa b'Amateka, n'orukiiko rwona bakiika. Baboha Yesu bamutwalira Pilato bamumunaga omu mikono. 2Pilato abaza Yesu ati, «Iwe oba mukama w'Abayahudi?» Yesu amuhorora ati, «Okwo wakigamba nikwo kili.» 3Abakuhani bakuru bamutoijera bingi. 4Pilato ashuba amubaza ati, «Toina kyakuhorora? Olebe okwo ebyo balikukutoijera bili bingi!» 5Kyonkai Yesu tiyayeyongeire kuhorora, ekyo kitangaza Pilato. 6Buli kiro kikuru kya Pasika, Pilato yabataishuliraga omufungwa omoi owo bamushabaga. 7Omu bashuuga ababaire bali omu kifungo, nibo balinya abaisire abantu omu bushengi, hakaba halimu omoi nayetwa Baraba. 8Embaga eija ebanza kushaba Pilato kubagilira nk'okwo yabagiliraga. 9Pilato abahorora ati, «Nimwenda mbataishulire Omukama w'Abayahudi?» 10Ahakuba akaba namanya okwo abakuhani bakuru bamulesire nibasindikwa eihagiko. 11Kyonkai abakuhani bakuru batamu abantu oruchuku kumugambira k'abataishulira Baraba, Yesu chei. 12Pilato ashuba ababaza ati, «Isi aho omushaija owo mulikweta Mukama w'Abayahudi mugire ntai?» 13Bashuba bakunga bati, «Omubambe.» 14Pilato ababaza ati, «Aha kiki? Kabiki ak'akozire?» Kyonkai bonene bakunga bashagaho bati, «Omubambe.» 15Kityo Pilato agonza kushemeleza embaga, abataishulira Baraba; kyonkai kayaizire kutaishura Yesu kumubamba, abanza amutera. 16Abaisherukare batahya Yesu omu kikaare (nigwo mwanya ogulikwetwa Puraitorio); beta omutwe gwona gw'abaisherukare. 17Bamujweka ebebo ya zambarau, basiba n'omukako gw'amahwa bagumutaho. 18Babanza kumumeleeza bakwese, «Kamelere Mukama w'Abayahudi!» 19Bamuteza orubingo omu mutwe, bamuchwera ebichwanta, babandama bamuramya. 20Kabamazire kumujaamya bamujura ebebo ya zambarau, bamugaruraho emyendo eye. Bashuba bamufunya kugya kumubamba. 21Kababaire nibagenda omu muhanda bagimba omuhinguzi, Simoni owa Kirene, akaba naruga omu kyaro, bamutwaza omusaraba. N'iwe ishe Alekisanda na Rufusi. 22Baleta Yesu ahalikwetwa Goligota (nikwo kugir'oti omwanya gw'ekitwe ky'omuntu). 23Bamuha edivai etabirainwe n'omubazi gwa mira, kyonkai tiyaginyoire. 24Bamubamba, babegana emyendoye, kyonkai bagitekera enshoga kumanya ogw'omuntu aratwara. 25Zikaba zili saa ishatu za bwankya orwo bamubambire. 26N'omushango ogwo bamutaireho bagumuhandikaho bati, «Omukama w'Abayahudi.» 27Bamubamba n'abashuga babili, ogu bamuteka obulyo n'ondijo obumosho. 28[Aho n'ebihandiko bitakatifu bigobelera ebilikugamba biti, «Bakamukwatirana n'abafakare.»] 29N'ababaire nibahingura bamuleerura nibachunda emitwe bakwese, «Mpahosi! Iwe ayagambiire kukambura Rwensinga okagyombekera ebiro bishatu, 30oyerokore oruge aha musaraba!» 31N'abakuhani bakuru kutyo hamoi n'abegesa b'Amateka bamujamya omu fumoro bati, «Akarokora banu, wenene taina kwerokora. 32Kirisito Omukama wa Isiraeli, naruge aha musaraba twije tumwikilize.» N'ababambirwe nawe kwakwo bamujuma. 33Kazabaire esaa mukaga ensi yona ebambwa omwilima kugoba esaa mwenda. 34Aha saa mwenda Yesu ataka n'eiraka lihango ati, «Eloi Eloi, lama sabakitani?» Nikwo kugir'oti, «Ruhanga wange, Ruhanga wange, wanagiraki?» 35Ababaire bali aho kabakihuliire bagamba bati, «Leba, nayeta Eliya.» 36Omuntu omoi airuka, akwata ekikunjuzo akitubika omu siki y'edivai, akitunga aha rubingo omuhaire kunywa, nagamba ati, «Katulinde tulebe nka Eliya araija akamuhanantura.» 37Yesu ataaga muno, aho ahwamu omwoyo. 38Orutimbe rwa Rwensinga rutagukamu kabili, kwema eiguru kwija ahansi. 39Aho omukuru w'abaisherukare ayabaire ayemeleire amulebire, yaboine okwo yataka akashuba akahwamu omwoyo, agamba ati, «Mazimakwo omuntu ogu yaba ali Mwana wa Ruhanga!» 40Hakaba haliho n'abakazi balebeire harai, omuli abo akaba halimu Maria Magadalena, na Maria nyina Yakobo omuto na Yose, na Salome, 41abamuhonderaga kwema Galilaya nibamujuna; n'abakazi abandi bangi ababaire baizire nawe kwema Yerusalemu. 42Omu bwaigoro kikaba kili kiro ky'okwetekateka, nikyo kiro kilikwebembera Sabato, 43Yozefu owa Arimatea, omutegeki w'ekitinwa omu rukiiko, kandi yategelezaga obukama bwa Ruhanga, ayeyemamu agya owa Pilato, amushaba omubili gwa Yesu. 44Pilato atangara nayebaza nka yafire. Ayeta omukuru w'abaisherukare, amubaza nka yafire. 45Mukuru w'abaisherukare kayamugambiire okwo yafire, aha Yozefu omubiligwe. 46Yozefu ogwo owa Arimatea agura ekirago kya kitaani, amuhanantura, amuzinga omu kirago kya kitaani ekyo, amuteka omu nyanga eyo wenene yashangirwe ayetemeire omu rwazi. Ahilingisa eibare lihango alikingisa enyanga. 47Maria Magadalena, na Maria nyina Yose, babona mbali Yesu yaziikwa.

will be added

X\