MARIKO 14

1Bikashangwa bisigaireyo ebiro bibili kugoba Pasika n'ekiro kikuru ky'emikate etatumbisiibwe. Abakuhani bakuru n'abegesa b'Amateka bahiga kukwata Yesu atabamanyire, bakamwita. 2Bagambaga bati, «Tutamukwatira mu kiro kikuru, embaga etaija ekatuhyokera.» 3Yesu kayabaire ali Betania omwa Simoni omubembe nalya, omukazi aija n'echupa y'eibare einamu amajuta g'eiguzi lihango muno, ahenda echupa egyo engoto, amusheshera amajuta omu mutwe. 4Kyonkai haliho abatamirwe bakatekeleza bati, «Amajuta aga gafaki? 5Gakuguziibwe garugwamu edinari ezilikushaaga 300, zigabirwa aboro.» 6Kyonkai Yesu agamba ati, «Mumuleke; kiki kumwita kubi? Ekyo yankolera kirungi. 7Manya ebiro byona abanaku mwinabo; nimushobora kubajuna mbali mwayendera. Kyonkai inye timulikwija kumbona biro byona. 8Yakora ekyo yashobora. Omubili gwange yagusiiga amajuta likyali karai nagutekatekera kuziikwa. 9Mara mbagambiire amazima, eky'omukazi ogu yakora balimwijuka nibakibarura.» 10Aho Yuda Isikariote, omoi omu 12, agya omu bakuhani bakuru kumubanja. 11Kabahuliire batyo bashemelerwa, baragana kumuha empiha. Kwema aho Yuda ata nahiga obushango bw'okumubanja. 12Aha kiro kya mbere ky'Omukate Gutatumbisiibwe, ekyo batambiragaho akataama ka Pasika, abegesibwabe bamugambira bati, «Wakugondize tugyehai kukutekatekera mbali oraliira Pasika?» 13Omu begesibwabe atumamu babili, abagambira ati, «Mugye omu kigo, muratanganwamu omushaija ayetwekire emuga y'amaizi. Mumuhondere, 14mbali arataha, mugambire nyin'enju muti, ‹Omwegesa nabaza eikumbi mbali araliira Pasika hamoi n'abegesibwabe.› 15Araboleka ekiyumba omu gorofa, kitekatekire kihoire; omwo mube nimwo mutushemeleza.» 16Abegesibwa baturuka bataha omu kigo, babibona okwo yabagambira, batekateka Pasika. 17Eizoba kalyatobeire Yesu aija n'eikumi na babili. 18Kababaire bali aha meza nibalya, Yesu agamba ati, «Mbagambiire amazima, omuli inywe halimu arambanja, mara nitulya hamoi.» 19Babanza kujunara buli omoi namubaza ati, «Isi n'inye?» 20Yesu abagambira ati, «N'omoiho omu 12, nitukoza hamoi omukate aha sahani. 21Omwana w'Omuntu nibija kumubaho nk'okwo bywamuhandikirweho, kyonkai alibona ogwo alikwija kubanja Omwana w'Omuntu! Hakili k'omuntu ogwo atakuzairwe.» 22Kababaire nibalya, akwata omukate, asiima, agubegura, agubaha nagamba ati, «Tora, ogu mubili gwange.» 23Akwata n'ekikompe, kayamazire kusiima akibaha, bona bakinywaho. 24Abagambira ati, «Obu bwamba bwange obw'endagano empya, obwo barashesha kuchungura bangi. 25Mbagambiire amazima, tinkishuba kunywa divai kuhika orwo ndinywa empya omu bukama bwa Tata.» 26Kabamazire kuhoya oruhoya, baturuka bagenda aha Ibanga ly'Emizeituni. 27Yesu agambira abegesibwabe ati, «Nimwija kwiruka inywena mukannagaho. Enshonga kikahandikwa kiti, ‹Ndiita omushumba, entaama zenaganage.› 28Kyonkai kandamara kuhimbuka ndabebembera Galilaya.» 29Petero amugambira ati, «N'orwo bona barairuka bakakunagaho, inye chei!» 30Yesu amugambira ati, «Nkugambire amazima, omu kiro omu enkoko etakakokoromire kabili, oraba wanyetongire kashatu.» 31Kyonkai Petero agamba n'amani ati, «Tindikwija kukwetonga, n'orwo ndaragirwa kufa naiwe.» N'abasiigaire bona bagamba nka Petero. 32Bakwata omuhanda bagya mbali hayetwaga Getisameni. Yesu agambira abegesibwabe ati, «Mushuntame aha mbe ninshoma enshara.» 33Aihyaho Petero na Yakobo na Yohana agenda nabo, aho abanza kugira obushasi bungi n'okushoberwa muno. 34Agambira abashatu aba ati, «Omwoyo gwange gwina obujune bungi muno kuralira kufa. Musigare aha mara mutanagira.» 35Ailirayo akandi kake, ajumara ahansi, ashaba ati, «Tata, kakiraba nikishoboka esaa egi empingure.» 36Ashuba agamba ati, «Aba. Tata, ebintu byona ahali iwe nibishoboka. Banyihyeho ekikompe eki. Kyonkai tikwo inye ndikwenda, iwe okwo olikwenda obe nikwo okora.» 37Aija ashanga okwo banagiire, abaza Petero ati, «Simoni, wanagira? Tiwashobora kurora saa emoi yonkai? 38Otanagira, oshome enshara otaija okagwa omu bilengeso. Mazima omwoyo nigwenda, kyonkai obunyama bujege.» 39Ashubayo ashoma enshara, ashubamu ebigambo byonene. 40Agaruka ashanga okwo banagiire, nobona oturo tukabakiza amani. Eky'okumuhorora tibakiiboine. 41Aija omurundi gwa kashatu abagambira ati, «Mukyanagiire kuhumura? Otwo mwanagira nitumara; esaa yagoba, Omwana w'Omuntu yabanzirwe, yanagirwe omu mikono y'abafakare. 42Mwimuke tube nitugenda, leba embanzi yagoba.» 43Orwo Yesu yabaire akyagamba ebyo, lileta Yuda, omoiho omu 12, aija n'embaga eina embanda n'erungu ebyo babaire bahairwe abakuhani bakuru na'abegesa b'Amateka n'abagurusi. 44Embanzi ekaba ebahaire akabonero negamba eti, «Owo ndanywegera n'iwe; mumukwate mara mumutware nimumanya.» 45Yuda kayaizire talinda, amugoba, agamba ati, «Mwegesa!» Amunywegera. 46Bamutaho engaro bamukwata. 47Kyonkai omuli balinya abashangirwe bemeleire haihi, omoiho ahurutura embanda omu kiraro, atema omwiru w'Omukuhani Nyamukuru okutwi. 48Yesu ababaza ati, «Mwaija n'embanda n'erungu kunkwata okwobon'oti muzinzire omushuga? 49Ebiro byona tuba tuli hamoi Rwensinga n'inyegesa, timukankwataga. Kyonkai k'ebihandiko bitakatifu bigobelere.» 50Aho abegesibwa bona bamusigaho bairuka. 51Hakaba haliho omusigazi ahondeire Yesu atajwete, shana aha mubili ayenagireho akendo ka kitaani; bamukwata. 52Kyonkai wenene abasigira akendo ka kitaani airuka ali bushai. 53Yesu bamutwalira Omukuhani Nyamukuru; aho abakuhani bakuru bona n'abagurusi n'abegesa b'Amateka literaine. 54Petero agenda namuhondera ayemire harai, alemwa agoba nyakabuga omw'Omukuhani Nyamukuru. Ashuntama n'abalinzi, ayota omuliro. 55Aho abakuhani bakuru n'orukiiko rwona bahanyanyia omushango gw'okutaho Yesu kumwita, kyonkai byanga. 56Bangi bamuhangilira kyonkai ebyo bamuhangilira byanga kushushana. 57Abandi bemelera bamuhangilira bati, 58«Tukamuhulira nagamba okwo arakambura Rwensinga eyayombekirwe abantu, ayombeke endijo omu biro bishatu, mara atagyombekesize bantu.» 59Nabyo ebyo tibyafire kushushangana. 60Omukuhani Nyamukuru ayemelera omu rukiiko omugati, abaza Yesu ati, «Iwe toina kyakuhorora? Aba nibakutoijeleraki?» 61Kyonkai Yesu ayesiza, tiyahoroire. Omukuhani Nyamukuru ashuba amubaza ati, «N'iwe Kirisito Omwana wa Nyakusinga?» 62Yesu agamba ati, «Ndiwe, mara nimwija kubona Omwana w'Omuntu asingiire aha bulyo bw'Omushobora, naletwa omu bichwi.» 63Omukuhani Nyamukuru atagura ebijwarobye, agamba ati, «Obujulizi tukyahiiga obwaki? 64Mwahulira okwo yarogota. Nimuramuraki?» Bona bamuramura okwo alikuragirwa. 65Nikwo abandi kubanza kumuchwera ebichwanta, kumubunda amaisho, kumutera, nibagamba bati, «Toma!» Abalinzi nabo bamutamu empi. 66Petero akaba ali nyakabuga amagyaifo, aijwa omuzana omoi w'Omukuhani Nyamukuru. 67Kayaboine Petero nayota omuliro, amuhanga amaisho, agamba ati, «Naiwe waba oina Yesu Omunazareti.» 68Petero ayetonga ekigambo ekyo ati, «Tindikumanya by'olikugamba anga kubishobokerwa!» Aho aturuka agya nyarubuga n'enkoko ekokoroma. 69Omuzana amuboine, ashuba abanza kugambira ababaire bali aho ati, «Omushaija ogu nawe mumoi wabo.» 70Petero ashuba ayetonga ekigambo ekyo. Akaanya kakahingwireho kake n'ababaire bali aho bagambira Petero bati, «Ky'amazima iwe oli mumoi wabo; aha rw'okuba oli Munyagalilaya.» 71Kyonkai Petero abanza kuraapa n'okurahira ati, «Omuntu ogu owo mulikugamba inye tindikumumanya.» 72Niho honkai ekoko ekokoroma elya kabili. Nirwo Petero yaijukire okwo Yesu yabaire amugambiire ati, «Enkoko etakakokoromire kabili oraba wanyetongire kashatu.» Aho atekeleza ekigambo ekyo, alira.

will be added

X\