MARIKO 12

1Yesu abanza kubagambira omu nfumo, ati, «Omuntu akalima endimiro y'emizabibu, yagizingoza orugo, yagilimamu ekiina ky'okujungiramu ezabibu, yayombekamu omunara, yamara endimiro yagikwasa abakozi, yakwata omuhanda yagya nsi ndijo. 2Kakyabaire kirumo ky'okunoga ezabibu, yatuma omwiru aha bakozibe kabamuha ebye ebyo bayelize omu ndimiro. 3Bamukwata bamutera, bashuba bamutaishura agenda ngaro zishai. 4Ashuba abatumaho omwiru ondijo, bamuhutaza omutwe bamujangura. 5Atuma ondijo, ogwo bamwita, n'abandi bangi batyo, abandi babatera, abandi babaita. 6Akaba akyainayo ondijo, omwanawe omugonzibwa; obugenda bw'eirai nawe amutuma nagamba ati, ‹Barakunira omwana wange.› 7Kyonkai abakozi balinya bohyangana bati, ‹Ogu n'iwe musika; tumwite obusika bube bwaitu.› 8Bamukwata bamwita, bamunaga enjai y'endimiro y'emizabibu. 9Mbwenu aho mukama w'endimiro alikoraki? Kilimwimukya aije aite abakozi abo. Endimiro y'emizabibu aligikwasa abandi. 10Timukashomaga bihandiko mbali bilikugamba biti, ‹Eibare lyonene lyonene ely'abombeki bayangire, nilyo libaire ibare likuru ly'epembe; 11eki kikakorwa Omukama wenene, mara nitukibona nitutangara?› » 12Aho bashobokerwa okwo enfumo agichweleire bonene; balenga kumukwata, kyonkai batina embaga. Bamurugaho bagenda. 13Bamutwekera Abafarisayo n'ab'omuteko gwa Herode kumukwatira omu ngambo. 14Baija bamubaza bati, «Mwegesa, nitukumanya okwo oba w'amazima, eby'abantu batekeleza iwe tobifaho. Ekitiinwa kyabo tokiliho, shana iwe ekikuru kwegesa emihango ya Ruhanga. Mbwenu kisaine kuha Kaisari omushoro anga chei? 15Emishoro tugigire anga tutagigira?» Yesu ashangwa nabamanyaho obugobya, abagambira ati, «Ahakubaki nimundenga? Mpa edinari ngilebe.» 16Bamuleteraho emoi. Ababaza ati, «Ekishushani n'ekihandiiko ebili aha dinari by'ohai?» Bamuhorora bati, «Bya Kaisari.» 17Yesu abagambira ati, «Ebya Kaisari mubihe Kaisari, n'ebya Ruhanga mubihe Ruhanga.» Bamutangalira. 18Abasadukayo abanga okwo okuhimbuka kubayo bamugoba; bamubaza bati, 19«Mwegesa, Musa akatuhandikira okwo omuntu kufa akasiga omukazi atasigire mwana, omurumuna ashwere omukazi ogwo, azalire omurumuna kifa abaana. 20Hakaba aliho abarumuna mushanju. Owa mbere ashwera omukazi, k'afa tasiga mwana. 21Owa kabili ashwera omukazi ogwo, nawe afa buchweke; n'owa kashatu kutyo; 22bona omushanju tibasigire mwana. Obugenda bw'eirai omukazi nawe afa. 23Aha kuhimbuka omukazi aliba w'ohai? Aha rw'okuba bona omushanju akaba ali mukazi wabo.» 24Yesu abagambira ati, «Tikyonu mulikuhabira! Na bihandiko, na bushobora bwa Ruhanga taliho kyomulikumanya. 25Kuba orwo abantu balihimbuka omu bafu, tibalishwera anga kushwerwa. Balishusha abamalaika b'omw'iguru. 26Kandi abafu kuhimbuka, timukashomaga kitabo kya Musa, mbali alikugamba aha kishaka ky'omuliro, okwo Ruhanga yamugambiire ati, ‹Inye mba Ruhanga wa Aburahamu, Ruhanga wa Isaka na Ruhanga wa Yakobo?› 27Taba Ruhanga wa bafu, aba Ruhanga w'abarora; aha rw'ekyo muhabire muno.» 28Aho honene hakaba haliho omwegesa w'Amateka omoi, ahulira okwo bahankana. Kayaboine okwo Yesu yahorora kurungi Abasadukayo, amubaza ati, «Omuhango ogukuru kushaaga yona ni guhai?» 29Yesu amuhorora ati, «Ogwa mbere, ‹Hulira iwe Isiraeli: Omukama Ruhanga waitu, Omukama aba omoi. 30Kandi ogonzega Omukama Ruhanga wawe n'omutima gwawe gwona, n'omwoyo gwawe gwona, n'amagezi gawe gona, n'amani gawe gona.› 31Ogwa kabili nigw'ogu, ‹Ogonzega mutahi wawe nk'okwo iwe olikwegonza.› Omuhango ogw'okushaaga egi tiguliho.» 32Omwegesa w'Amateka amugambira ati, «Mwegesa oli omu mazima; okw'olikugamba nikwo, kugir'oti Omukama Ruhanga ab'omoi, mara taliho Ruhanga ondijo shana wenene. 33Kandi kugonza Ruhanga n'omutima gwona, n'amagezi gona, n'amani gona, n'okugonza mutahiwe nk'okwo wenene alikwegonza, kirungi kushaaga ebihongo by'okusosotorwa n'ebitambo.» 34Yesu k'abona okwo yahorora nk'omuntu omugezi, amugambira ati, «Obukama bwa Ruhanga tobuli harai.» Kwema aho taliho muntu yazilize kubaza Yesu kigambo kyona kyona. 35Yesu ayegesa omuli Rwensinga ati, «Abegesa b'Amateka bakugamba batai okwo Kirisito ali mwana wa Daudi? 36Daudi wenene akakyanulirwa Mwoyo Mutakatifu, yagamba ati, ‹Omukama akagambira Mukama wange ati: Shuntama aha bulyo bwange, kuhika orwo ndikunaga omu maguru ababisha bawe.› 37Daudi wenene namweta ‹Mukama;› mbwenu aho Kirisito yaba atai mwana wa Daudi?» Embaga ekaba eli nyingi, emuhulira n'amashemelerwa. 38Yesu kayabaire nayegesa, agamba ati, «Murayelinda abegesa b'Amateka. Bagonza kugenda bajwete ekanzu ezira zira, n'okuramibwa omu katare, 39omu sinagogi baikalira entebe ezirungi, n'aha magenyi baitanira emyanya y'ekitinwa. 40Kyonkai bezora nibashoma enshara ezira zira, okwo oku nibanyaga entumbwa omu maka gazo. Balihabwa ekibonabonyio ekihango kushagaho.» 41Yesu kayabaire ashuntamire bwatana buhanika ya Rwensinga, abona omu buhanika obwo okwo embaga elikutamu empiha. Abatungi bangi bakaba nibatekamu amahera gangi. 42Agya aija entumbwa omunaku, atekamu esarafu ibili z'omulinga, nilyo ihera limoi. 43Ayeta abegesibwabe abagambira ati, «Mbagambiire amazima, entumbwa omunaku yatamu amahera gangi kushaaga bona abalikuteeka amahera omuli buhanika. 44Bona baihya aha bingi byabo ebyo bainabyo; kyonkai entumbwa n'obunaku bwayo yatekamu byona ebyo yaba enabyo, nilyo lyaba lili itungalye lyonkai.»

will be added

X\