MARIKO 11

1Kabailiire haihi na Yerusalemu bakagoba Betifage na Betania, aha Ibanga ly'Emizeituni, Yesu atuma babili omu begesibwabe, 2abagambira ati, «Mugende omu kyaro ekibali omu maisho, orwo murakitahamu muti, murabona omwana gw'endogobe gusibikire, ogutakakuubwagaho muntu, mugusibure mugulete. 3K'omuntu arababaza ekyo mulikukolera mutyo, mumugambire muti, ‹Omukama nagwetaga, arayanguha agutaishure.› » 4Bakwata omuhanda bagenda, bashanga omwana gw'endogobe gusibikire omw'ilembo aha muhanda; bagusibura. 5Ababaire beemeleire aho babaza ekyo bagendeleire kusibura omwana gw'endogobe. 6Abegesibwa babagambira okwo Yesu yabaire abaragiliire; babaleka bagenda. 7Omwana gw'endogobe baguletera Yesu bagwaraho ebijwaro byabo, Yesu agukuuba. 8N'abantu bangi bara ebijwaro byabo omu muhanda, abandi bara amatagi ago babaire batemire omu ndimiro. 9Abayebembeire n'abarugire enyuma bagamba n'eiraka lihango bati, «Hosana! Kilimugisha ogwo ayaija omw'ibara ly'Omukama! 10Obukama bwa tataichwe Daudi obulikwija bwagira omugisha! Hosana omw'iguru muno!» 11Ataaha Yerusalemu, agya Rwensinga, arambura buli kantu. Likaba lyatobeire, aho agya Betania hamoi n'eikumi na babili. 12Bukeire Yesu n'abegesibwabe kabarugire Betania, Yesu ashangwa aina enjara. 13Ayema haraimu kake, alengera omutini gwina obubabi, agya kuleba nka gwinaho akantu. Kugya kugugoba tagushangaho kantu shana obubabi, ahakuba kikaba kitali kirumo kya tini kushangwa zirabire. 14Agambira omutini ogwo ati, «Omuntu atalikulyaho kiraba rundi.» Abegesibwabe bahulira ekyo yagamba. 15Yesu n'abegesibwabe bagoba Yerusalemu. Ataha Rwensinga abinga ababaire nibagulizamu n'ababaire nibaguliramu ebintu. Emeza z'abahingi b'empiha azichulengura, akunengura n'obutebe bw'ababaire nibaguza ebiiba. 16Tiyajubwire muntu kurabya kintu muli Rwensinga. 17Ayegesa abagambira ati, «Manya kikahandikwa kiti, ‹Enju yange elyetwa nju y'enshara y'amahanga gona.› Mbwenu inywe mwagihindura mpako y'abashuga.» 18Abakuhani n'abegesa b'Amateka kabahuliire amakuru ago bahiga okwo baramwita. Bakaba bamutinire, enshonga embaga yona ekaba netangalira emyegesheze ya wenene. 19Eizoba kalyatobeire Yesu n'abegesibwabe baruga omu kigo. 20Bukeire bwankya Yesu n'abegesibwabe kababaire nibahingura, babona okwo omutini gwomire gwona n'emizi yagwo. 21Petero aijuka, agambira Yesu ati, «Mwegesa, oraleba! Omutini ogwo oraamire gwomire.» 22Yesu abahorora ati, «Mwesige Ruhanga. 23Nimbagambira amazima nti wena wena aligambira eibanga eli ati, ‹Sinduka ogwe omu nyanja,› mara omu mutima atagiziremu kakulengeshanyia, akaikiliza okwo byona ebyo alikugamba bilibahokwo, ekyo aliba nashaba alikitungwa. 24Aha rw'ekyo nimbagambira, ekyo mulikushaba omu nshara, mwikilize okwo mwakiboine, ekyo mulikitungwa. 25Kamurayemeleraga mukashaba, mushube mugarulire ababafakaliire; nirwo na Isheinywe asingiire omw'iguru alibagarulira amafu ganyu. 26[Kyonkai kamutagaruliire babafakaliire, nainywe Isheinywe asingiire omw'iguru talibagarulira ntambara zanyu.]» 27Yesu n'abegesibwabe bagaruka Yerusalemu. Kayabaire nagenda omuli Rwensinga, abakuhani bakuru n'abegesa b'Amateka n'abagurusi bamugoba, 28bamubaza bati, «Eby'olikukora ebi nobikoza bushoboraki, anga ayakuhaire obushobora bw'okubikora n'ohai?» 29Yesu abagambira ati, «Kambabaze; mara mumporore, nyije mbagambiire obushobora obwo ndikukoza ebi. 30Okubatiza kwa Yohana kukatabuka omw'iguru anga kukatabuka omu bantu? Mumporore.» 31Bonene aho bagyaho bahankana bonkai. Bati, «Katuragira tuti, ‹Kukatabuka omw'iguru,› aragira ati, ‹Aho kubaki mutamwikiliize?› 32Isi tugire tuti, ‹Kukatabuka omu bantu?› » Bakaba nibatina abantu, kuba bona babonaga Yohana ali murangi komo. 33Kityo bahorora Yesu bati, «Titulikumanya.» Yesu abagambira ati, «Nanye tindikubagambira ni bushoboraki obwo ndikukoza ebi.»

will be added

X\