MARIKO 10

1Yesu arugayo, agya omu Wilaya ya Buyahudi na buseli bwa Yorudani. Embaga eshuba ehurura emugoba, na wenene agarukamu kubegesa nk'okwo yakagiraga. 2Abafarisayo baija kumulenga, bamubaza bati, «Nikijuburwa omushaija kutambya mukaziwe?» 3Abahorora ati, «Musa akabaragiraki?» 4Bahorora bati, «Musa akajubura omushaija kuhandikira omukazi ebarua y'okumutambya akagenda nayo.» 5Yesu abagambira ati, «Musa okubahandikira omuhango ogu akaihwa omu kugumangana kw'emitima yanyu. 6Nawe kwema aha kutondwa kw'ensi, Ruhanga akatonda omushaija n'omukazi. 7Kityo omushaija arasigagaho ishe na nyina ajwangane na mukaziwe, 8mara bombili barabaga mubili gumoi. Aho nibaba batakili babili shana nibaba basiigaire mubili gumoi. 9Aha rw'ekyo abo Ruhanga yajwangainyie, omuntu atalibataishurana.» 10Kababaire bali omu nju abegesibwa bashuba bamubazaho ekigambo eki. 11Yesu abagambira ati, «Omuntu ayakatambya mukaziwe akashuba akashwera ondijo, aba aisire obushwere ahali mukaziwe mara aba nasiyana. 12N'omukazi ayaruga omwa iba akashwerwa mushaija ondijo, nawe aba nasiyana.» 13Abantu baija baletera Yesu abaana k'abakwataho. Kyonkai abegesibwa babarotokera. 14Yesu kayaboin'ebyo anigara, abagambir'ati, «Muleke abaana baije ahali inye, mutabatanga; manyasi obukama bwa Ruhanga buba bwabo. 15Nimbagambira amazima, aliba atatoire bukama bwa Ruhanga nk'omwana talibutahamu.» 16Ababumbatira, abataho emikono nabaha omugisha. 17Kayabaire naimukya kugenda omushaija aija airukire amubandama omu maisho, amubaza ati, «Mwegesa murungi, nkoreki kubona oburora obutalihwaho?» 18Yesu amubaza ati, «Aha kiki kunyeta murungi? Omurungi tabayo n'omoi shana Ruhanga wenkai. 19Nomanya emihango: Otaliita, otalisiyana, otaliiba, otalihangilira muntu, otaligobeza banu, okunire sho na nyoko.» 20Ndi ogu amugambira ati, «Mwegesa, emihango egi nkagyekomya kwema obusigazi bwange.» 21Yesu amuleba amugonza, ashuba amugambira ati, «Noburwaho ekintu kimoi: Ogende oguze ebyawe, empiha ozigabire abanaku, eitunga lyawe oliligira omw'iguru; aho oije ompondere.» 22Yesu kayamazire kugamba ekyo omushaija ajunara, agenda ashobeirwe; nobona akaba aina eitunga lingi. 23Yesu aleba oku n'oku agambira abegesibwabe ati, «Abatungi baligumirwa batai kutaha omu bukama bwa Ruhanga!» 24Aho abegesibwa batangara kubona yagamba atyo. Kyonkai Yesu abagambira ati, «Baana bange, kigumire kitai abesiga eitunga kutaha omu bukama bwa Ruhanga! 25Nikyoroba engamia kuraba omu kahuru k'enkinzo kushaaga omutungi kutaha omu bukama bwa Ruhanga.» 26Bashoberwa muno munonga, bamugambira bati, «Ahosi ayakurokoka n'ohai?» 27Yesu abaleba, abagambira ati, «Aha bantu tikilikushoboka, nawe ahali Ruhanga nikishoboka; ahakuba ahali Ruhanga ebintu bishoboka byona.» 28Petero amugambira ati, «Ichwe tukasigaho buli kantu twakuhondera.» 29Ndi Yesu agamba ati, «Nimbagambira amazima, taliho n'omoi ayasigireho nju anga barumuna anga banyanya anga nyina anga ishe anga baana anga mataka aha rwange n'aha rw'evangeli, 30aliba atarongoirwe mirundi kikumi kaanya aka omu nsi egi, amaju, abarumuna, banyanya, banyina, abaana n'amataka, kyonkai n'okugingiizibwa kubulimu, kandi n'omu makiro agalija atahairwe burora obutalihwaho. 31Nawe abali ba mbere baliba b'enzindo, n'ab'enzindo baliba ba mbere.» 32Yesu n'abegesibwabe bashangwa bali aha muhanda nibagya Yerusalemu, Yesu wenene abebembeire. Abegesibwa bakaba bainamu amashoberwa, n'abantu ababaire nibabaruga enyuma bakaba nibatina. Yesu ashuba akwata eikumi na babili abagambira agabaire nigaija kumugwaho, 33ati, «Leba nitugya Yerusalemu. Omwana w'Omuntu nibaija kumunaga omu mikono y'abakuhani bakuru n'abegesa b'Amateka, bamuramure kufa bamare bamunagire Abanyamahanga; 34bamujaamye, bamuchwere ebichwanta, mara bamutere bamwite. Kabirakya ebiro bishatu ahimbuke.» 35Yakobo na Yohana batabani ba Zebedayo bamugoba bamugambira bati, «Mwegesa, nitwenda ekyoturakushaba okitukolere.» 36Ababaza ati, «Nimwenda mbakolereki?» 37Bamuhorora bati, «Singa omu kitinwa kyawe otushoboze: Omoi akushuntame obulyo, ondijo obumosho.» 38Kyonkai Yesu abagambira ati, «Ekyo mulikushaba timulikukimanya. Murashobora kunywa ekikompe ky'obushasi ekyo ndikwija kunywa, handiki kubatizibwa eibatiza elyo ndikwija kubatizibwa?» 39Bamushubamu bati, «Nitushobora.» Yesu abagambira ati, «Ekikompe ekyo ndikwija kunywa mulikinywa; n'okubatizibwa okwo ndikwija kubatizibwa mulikubatizibwa; 40kyonkai okushuntama aha bulyo anga aha bumosho, ekyo tinyina bushobora bwa kukibaha. Ekyo kya balinya abakitekatekeirwe.» 41Abegesibwa eikumi kukihulira, babanza kunigalira Yakobo na Yohana. 42Yesu abeta abagambira ati, «Nimumanya okwo abatwazi b'abanyamahanga babatwaza eikama, n'abanyiginya babo babatwaza amani. 43Kyonkai ekyo, omuli inywe kitaliba kityo. Aligonza kuba mukuru wanyu abe mwiru wanyu, 44kandi n'alikugonza kuba wa mbere omuli inywe, abe mwiru wanyu. 45Nobona n'Omwana w'Omuntu tiyaizire kukolerwa, wenene akaija kukolera banu, n'okweyanga oburorabwe abone kuchungura bangi.» 46Yesu n'abegesibwabe bagoba Yeriko. Kababaire nibaruga omu kigo ekyo hamoi n'embaga etali nke, Baritimayo, omwigazi w'amaisho mara omwanje mutabani wa Timayo akaba ashuntamire aha muhanda. 47Kayahuliire okwo ogwo ali Yesu owa Nazareti, abanza kutaka n'eiraka lihango, ati, «Yesu Mwana wa Daudi, banganyire!» 48Abali bangi bamurotokera nibamusiza. Kyonkai wenene ataka ashagaho ati, «Yesu Mwana wa Daudi, banganyire!» 49Yesu ayemelera agamba ati, «Mumwete.» Omwigazi w'amaisho ogwo bamweta nibamugambira bati, «Guma, imuka, Yesu nakweta.» 50Ebeboye agijugunya kulinya, abanduka ahansi aizire ahali Yesu. 51Yesu abaza Baritimayo ati, «Nogonza nkukolereki?» Omwigazi w'amaisho amuhorora ati, «Waitu Mwegesa, singa mbone.» 52Yesu amugambira ati, «Iroko ogende, okwesiga kwawe kwakukiza.» Niho honkai Baritimayo abona, ashuba ahondera Yesu mbali yabaire nagya.

will be added

X\