MARIKO 1

1Egi evangeli ya Yesu Kirisito, Omwana wa Ruhanga. 2Nebanza nk'okwo Omurangi Isaya yahandikiire ati, «Leba, natuma entumwa yange kukwebembera, kukushemeleza omuhanda; 3eiraka ly'alikukungeleza omw'irungu, ati: Mushemeze omuhanda gw'Omukama, mugorore emihandaye.» 4Yohana akaba ali omw'irungu nayegesa abantu kabechuza amafu, bakagarulirwa, nashuba nababatiza. 5Ensi yona ya Buyahudi yamugobaga, hamoi n'aba Yerusalemu bona. Ababatiza omu Mwiga gwa Yorudani nibechuza amafu gabo. 6Yohana yajwaraga ekijwaro ky'omushenshe gw'engamia, yayekomaga omukandara gw'oruhu omu nyugunyu, kandi yalyaga enzige n'obwoki bw'omw'ishwa. 7Yarangaga ati, «Alikunduga enyuma manzi kunshaaga, tindagiirwe na kubandama hansi kumujuura biratwa. 8Mbabatiize n'amaizi, kyonkai wenene alibabatiza na Mwoyo Mutakatifu.» 9Omu biro ebyo Yesu aruga Nazareti eya Galilaya abatizibwa Yohana omuli Yorudani. 10Kayamazire kuruga omu maizi, aho n'aho abona eiguru likingukire, na Mwoyo namusongokaho omu mishusire y'ekiiba. 11N'eiraka liruga omw'iguru liti, «Iwe oba Mwana wange omugonzibwa, n'iwe nshemelerwa.» 12Mwoyo ayanguha amutwara omw'irungu. 13Omw'irungu omwo akamaramu ebiro makumi ganai nalengesibwa Sitani. Yaikaragayo n'ebigunju; kandi abamalaika bamutagaitiraga. 14Aho Yohana kababaire bamukwete, Yesu aija Galilaya naranga evangeli ya Ruhanga 15nagamba ati, «Akaanya kahika, obukama bwa Ruhanga buli haihi; mwechuze kandi mwikilize evangeli.» 16Kayabaire naraba aha Nyanja ya Galilaya abona Simoni na Anderea omurumuna nibanaga eishambo omu nyanja; nobona bakaba bali bajubi. 17Yesu abagambira ati, «Mumpondere, ndabahindura bajubi b'abantu.» 18Aho naho basiigaho amashambo gabo bamuhondera. 19Kayagenzireho akatambi akandi kake abona Yakobo eya Zebedayo na Yohana omurumuna, bakaba bali omu bwato nibashoborora amashambo. 20Ayanguha abeta, basiiga ishebo Zebedayo omu bwato n'abakozibe, bamuhondera. 21Bagya Kaperinaumu. Yesu takelererwa, ahali Sabato ataha omu sinagogi abanza kwegesa. 22Batangazibwa emyegeshezeye, aha rw'okuba akabegesa nk'omuntu aina obushobora ti nka begesa ba Mateka. 23Omu sinagogi yabo akaba halimu omuntu ayabaire aina eiSitani. 24Likunga liti, «Notwenzaki iwe Yesu owa Nazareti? Waija kutumara? Ninkumanya oli ohai, oli Mutakatifu wa Ruhanga.» 25Kyonkai Yesu akabukira eiSitani elyo ati, «Silikwa mara omurugemu!» 26EiSitani likabisa omuntu ogwo nk'owensimbu limara limurugamu nilikunga n'amani. 27Abantu bagwa omu kitangaro, bebaza bonene bonkai nibagamba bati, «Kiki eki? Myegesheze emihya! AmaSitani nagabingisa obushobora mara nigamuhulira.» 28Niho honkai eiraangalye liraalira omu mukoa gwona ogwataine Galilaya. 29Omu sinagogi Yesu arahukamu ataha omwa Simoni na Anderea. Akaba aina Yakobo na Yohana. 30Aho nyinazara Simoni akashangwa abyamikirwe omushwago, banguha bamugambira omurwaire ogwo. 31Yesu aija amukwata omukono amwimukya omushwago gumurugaho, nangu abatagaitira omu nju omwo. 32Bwaigoro aha kalemba bazana bamuletera abarwaire bona n'ababaire baina Amasitani. 33Ekigo kyona kisikuka kyemeelera aha mulyango. 34Akiza abarwaire bangi aba kaishe ndwara, abinga n'Amasitani. Kyonkai tiyagajuburaga kwatura kigambo, nobona gakaba nigamumanya. 35Bukeire bwankya omu karo aimuka agya omu mwanya ogweheleire ashoma enshara. 36Simoni n'abo yabaire ainabo abandi bamuhondera. 37Bagya bamubona bamugambira bati, «Buli muntu nahiga iwe.» 38Abagambira ati, «Tugendelere tugye kigo kindi nayo ndangeyo; manyasi ekyo nikyo kyandesire.» 39Araba Galilaya yona, naranga omu sinagogi zabo nabinga n'Amasitani. 40Aijwa omubembe agoba Yesu, abandama amugambira ati, «Kawakwenda wakunyeza.» 41Yesu aganya, aimukya omukono amukwataho, amugambira ati, «N'inyenda, oyere.» 42Aho honkai ebibembe bimuhwaho, ayera. 43Amukomeleza, amara amutaishura bwangu 44namugambira ati, «Oramanya otagira kyowagambira muntu; shana ogende oyeyoleke omukuhani, ogire n'ekihongo aha rw'okwezibwa kwawe: Nikyo kihongo ekyo Musa yaragiire k'abantu bamanyiraho.» 45Nawe kayaturukire abigamba obuzira koyasigayo, amakuru agamazaho ensi, na Yesu aba atakitaaha mu kigo nibamubona. Aikara wenkai enjai y'ekyaro kyonkai bantu bata nibamwijaho nibaruga embaju zona.

will be added

X\