LUKA 4

1Yesu aijwire Mwoyo Mutakatifu aihurura kuruga Yorudani. 2Mwoyo amutwara omw'irungu amarayo ebiro 40 nalengesibwa Sitani. Omu biro ebyo tiyaliire kantu. Kabyahoire aliibwa enjara. 3Sitani amugambira ati, «K'oraba oli Mwana wa Ruhanga, hanga eibare eli lihinduke mukate.» 4Yesu amuhorora ati, «Kikahandikwa okwo omuntu tatungwa mukate gwonkai.» 5Sitani aho amushutura amutwara eiguru, omw'ipokya n'omw'ibuurura akaba yamwolekire engoma zona z'ensi. 6Amugambira ati, «Ndakuha engoma ezi zona n'ekitinwa kyazo, aha rw'okuba nkazihabwa, mara nakuziha owo nayenda. 7Mbwenu iwe aho kawakunfukamira, ziba zawe.» 8Yesu amuhorora ati, «Kikahandikwa kiti, ‹Orafukamiraga Omukama Ruhanga wawe wenkai, mara wenene mushai n'iwe orakoleraga.› » 9Amutwara Yerusalemu, amwemeleza aha kanara ka Rwensinga, amugambira ati, «K'oraba oli Mwana wa Ruhanga, oyeme aha oyekunture ahansi. 10Manya kikahandikwa kiti, ‹Ruhanga aliragira abamalaika bakulinde,› 11kandi, ‹Balikushutuza emikono yabo, otalija okasitara aha ibare.› » 12Yesu ahorora Sitani ati, «Kikagambwa okwo otalilengesa Mukama Ruhanga wawe.» 13Sitani kayamazire kulengesa Yesu buli muhanda yamurugaho, yalindilira bushango bundi. 14Yesu agaruka Galilaya omu mani ga Mwoyo. Ensi zona ezataine Galilaya zihulira eirangalye. 15Ayegesa omu sinagogi zabo, buli muntu amutenda. 16Aija Nazareti mbali yalereirwe. Ataaha omu sinagogi nk'okwo yakagiraga, ekaba eli Sabato. Ayemelera kushoma Ebihandiko bitakatifu; 17bamuha ekitabo ky'Omurangi Isaya. Ashurura ekitabo, agwamu mbali habaire ahandikire ati, 18«Mwoyo wa Mukama anyemiremu, aha rw'okuba ankozire amajuta kutona aboro amakuru garungi. Antumire kugamba okwo embohe zaija kutaishurwa, n'abaigazi b'amaisho baija kubona, abatura omu naku kubaha emilembe; 19n'okugamba okwo akaanya kagoba, Omukama yaija kurokora abantube.» 20Abunda ekitabo, akigarulira omukozi, ashuntama. Ababaire bali omu sinagogi bona bamuhanga amaisho. 21Abagambira ati, «Kir'eki ebihandiko bitakatifu byagobelera nimuhulira.» 22Bamutenda bona, batangazibwa n'ebigambo ebirungi bityo ebyo yagambire. Bebaza bati, «Ogu ti mutabani wa Yozefu?» 23Abagambira ati, «Obutalengeshanyia, nimwija kunshubiramu omugani ogu muti, ‹Muganga oyegange; ebyo tukuhuliire nokora Kaperinaumu shuba obikore n'owanyu!› » 24Abagambira ati, «Nimbagambira amazima, taliho murangi agonga wabo. 25Kyonkai mbagambire eky'amazima, omu makiro ga Eliya omuli Isiraeli hakaba halimu entumbwakazi zingi, orwo enjura etagwire emyaka eshatu n'emyezi mukaga, n'ensi ekaterwa eifa ly'amani. 26Eliya tiyatumirwe aha muntu weena weena shana akatumwa Sareputa, omu nsi ya Sidoni, aha ntumbwakazi. 27N'omu makiro g'omurangi Elisha, ababembe bakaba bali bangi omuli Isiraeli, kyonkai taliyo n'omoi ayayeziibwe, shana Naamani wenkai owa Siria.» 28Bona ababaire bali omu sinagogi kabahuliire ekigambo eki ekiniga kibazimbeza. 29Baimuka bamubinga omu kigo, bamutwara aha bulengo bw'orushozi obw'ekigo kyabaire kyombekirweho, bagondize kumuchulimya. 30Kyonkai wenene abaraba omu ntigita, ayegendera. 31Yesu agya Kaperinaumu omu kigo kya Galilaya. Ashangwa nabegesa kili kiro kya Sabato; 32batangazibwa emyegeshezeye. Aha rw'okuba yagambisaga obushobora. 33Omu sinagogi hakaba halimu omuntu akwetwe eisitani, ataaga n'eiraka lihango ati, 34«Otuleke! Notwenzaki iwe Yesu owa Nazareti? Ninkumanya iwe, Omutakatifu wa Ruhanga!» 35Kyonkai Yesu akabukira eisitani elyo ati, «Silikwa, mara omurugemu!» Eisitani kalyamazire kukuntura omuntu ogwo omugati, limurugamu litamuhutaize. 36Batangara bona, omuntu nagambira ondijo ati, «Kigamboki eki? Enshonga amasitani nagabingisa obushobora n'amani mara nigagenda!» 37Eirangalye ligenda buli hantu omu nsi egyo. 38Abanduka aruga omu sinagogi, agya omwa Simoni. Simoni omwe akaba ainamu nyinazara, omushwago gumuli kubi. Bamutagiliza k'amukiza. 39Yesu amwemelera aha mutwe akabukira omushwago, gumurugaho. Niho honkai omukazi aimuka abanyegeza. 40Orwo eizoba lyatobeire, abantu bona ababaire baina abarwaire aba kaishe ndwara babamuletera. Bona abataho emikono abakiza. 41N'amasitani garuga omuli bangi nigakunga gati, «Iwe oli Mwana wa Ruhanga!» Kyonkai agakabukira tiyagajubwire kugamba, enshonga gakaba nigamumanya okwo ali Kirisito. 42Obwire kabwakeire, aruga omu kigo ekyo, agya aheheleire. Abantu bamuhiga balemwa bamugwamu, banga n'okumurugaho. 43Wenene abagambira ati, «Evangeli y'obukama bwa Ruhanga ndagiirwe kugiranga n'omu bigo ebindi, ahakuba nkatumwa kukora ekyo.» 44Yarangaga omu sinagogi za Buyahudi.

will be added

X\