LUKA 23

1Embaga yona eimuka etwara Yesu owa Pilato. 2Babanza kumutoijera bati, «Omuntu ogu tumushangire nashengesa eihanga, kandi natutanga kusholera Kaisari omushoro. Nayeyeta Kirisito Omukama.» 3Pilato amubaza ati, «N'iwe Mukama w'Abayahudi?» Yesu amuhorora ati, «Wakigamba.» 4Pilato agambira abakuhani bakuru n'embaga ati, «Tindikumubonaho ntambara.» 5Kyonkai bonene bakaliliza bati, «Nayohya abantu, nayegesa omuli Buyahudi yona, kubandiza Galilaya kuturuka Yerusalemu.» 6Pilato kuhulira atyo, abaza nka Yesu ogu ali Munyagalilaya. 7Orwo yamanyire okwo ali omu butwazi bwa Herode, aba n'iwe amutwekera, nobona omu kaanya ako Herode akashangwa ali Yerusalemu. 8Herode kayamuboine ashemelerwa muno, ahakuba yayegombaga kumubona aha rw'okushangwa yamuhuliize, kandi yashubiraga k'amubona nakora ekitangazo. 9Kityo amubaza ebigambo bingi, kyonkai Yesu tiyahoroire kantu. 10Abakuhani bakuru n'abeegesa b'Amateka bakaba baliho, nibamutoijera nibasinsimuka. 11Herode hamoi n'abaisherukarebe bamujangura, bamujamya. Kabamazire kumujweka ebijwaro birungi, amugarura owa Pilato. 12Kiro kyonene ekyo Herode na Pilato banywana, aha rw'okuba kwema enyuma bakaba nibanobangana. 13Pilato ayeta abakuhani bakuru n'abatwazi b'embaga, 14abagambira ati, «Omuntu ogu mwamuleta nimugamba okwo alikushengesa eihanga. Kanamara kumumanyuruza kurungi nainywe muliho, tinamubonaho ntambara yona yona aha byo mulikumutoijera. 15Nangu na Herode taina kyoyamubonaho; kandi nka yamungarulira! Taliho ky'akozire eky'okumwisa. 16Aha rw'ekyo kamutere, nshube mutaishure.» 17[Aha kiro kikuru Pilato yaragirwaga kutaishulira embaga omufungwa omoi.] 18Abantu bona baashana bakwese «Ihyamu omuntu ogwo, otutaishulire Baraba.» 19Baraba ogwo akaba aimukize orushengo omu kigo kandi aisire n'omuntu; nikyo babaire bamufungiire. 20Pilato ashuba abagambira ebigambo byonene, agondize kutaishura Yesu. 21Kyonkai bashuba baashana bati, «Omubambe! Omubambe!» 22Pilato amubaza omurundi gwa kashatu ati, «Ahakubaki! Akozire kabiki? Inye tinamubonaho ntambara esaine kumwisa. Ndamutera kushai nshube mutaishure.» 23Abantu bombera kimoi bakaliliza k'amubamba. Eyombo yabo ekiza Pilato amani. 24Nikwo Pilato kuramura ekyo balikwenda kikaba nikyo kikorwa. 25Yataishura Baraba owo bamushabire, ayabaire afungirwe aha rw'okwimukya orushengo omu kigo n'okwita omuntu. Yabataishulira Yesu bamukore okwo balikwenda. 26Yesu bamukurukumbya bamutwara. Batanganwa Simoni owa Kirene naruga omu kyaro naija Yerusalemu, bamukwata, bamutweka omusaraba kugutwara ahondeire Yesu. 27Abantu bangi muno, n'abakazi ababaire nibamuchulira bahonderaho. 28Yesu ahindukira abakazi abo ati, «Inywe bakazi ba Yerusalemu, muleke kunchulira. Mwechulire inywe nywenene, muchulire n'abaana banyu. 29Muraleba, ebiro biliija orwo baligamba bati, ‹Baberwa abagumba, gaberwa amabere agatakazaraga baana, nangu amabunda gatakonkyaga baana gaberwa!› 30Bashube bagambire amabanga bati, ‹Mutukumbire;› bagambire n'enshozi bati, ‹Mutubunde.› 31Kabaraba bagira bati omuti ogubisi, lero aho ogwomire baligugira batai?» 32Kandi hakaba haliho abashuga abandi babili, abatwetwe kwitwa hamoi nawe. 33Kabagobire mbali halikwetwa Kaluvari, baba niho bamubambira, hamoi n'abashuga, omoi aha mukono gwa bulyo n'ondijo aha mukono gwa bumosho. 34Yesu agamba ati, «Tata, singa obagarulire; aha rw'enshonga bakora ekyo batalikumanya.» Ebijwarobye babitekera enshoga kubibegana. 35Abantu bemelera haihi bahangire Yesu amaisho. Kyonkai abatwazi bamushekelera, bakwese, «Akarokora banu; mbwenu nayerokore k'araba ali Kirisito wa Ruhanga, endonkwa!» 36Abaisherukare nabo bamushekelera, bamuletera edivai y'enshalizi, 37nibagamba bati, «K'oraba oli Mukama w'Abayahudi oyerokore!» 38Aha mutwegwe hakaba haliho n'ekihandiiko omu Rugiriki n'omu Rulatini n'omu Ruyahudi, nikigamba kiti, «Ogu n'iwe Mukama w'Abayahudi.» 39Omoi omu bashuga bombili ababaire babambirwe nawe, ajuma Yesu ati, «Manya iwe oba Kirisito! Oyerokore naichwe oturokore!» 40Kyonkai omushuga asigaire akabukira mutahiwe ati, «Iwe totiina Ruhanga? Manya naiwe oli aha kibonabonyio kyonene kyonene. 41Ichwe turagiirwe kufa; twabona emperwa etusaine aha rw'ebigiro byaitu. Kyonkai omushaija ogu akozire ntambaraki?» 42Amara agambira Yesu ati, «Waitu Yesu oranyijuka k'oraba wagobire omu bukama bwawe.» 43Yesu ahorora omushaija ogwo ati, «Nkugambire amazima, kir'eki oraba oli hamoi nanye omuli Paradiso.» 44Esaa kazabaire zili nka mukaga, ensi yona ebundwa omwilima kuhika esaa mwenda. 45Eizoba likwatangana n'okwezi; orutimbe rwa Rwensinga rutaagukamu kabili. 46Aho Yesu agamba n'eiraka lihango ati, «Tata, ninkukwasa omwoyo gwange omu miikono yawe!» Kayamazire kugamba atyo omwoyo guhwamu. 47Aho omukuru w'abaisherukare kayaboine ebyabaho, yasingiza Ruhanga ati, «Mazima omushaija ogu yaba ataina ntambara.» 48Kandi abantu abasigaire bona ababaire bahurwire kutangalira ekyo, kabaaboine ebyabaho bashuba omuka nibeetera aha bifuba. 49Bataahi ba Yesu bona n'abakazi ba Galilaya ababaire bamuhondeire, bemelera haraimu kake, babona ebyabaireho byona. 50Akaba aliho omushaija nayetwa Yozefu, naruga omu kigo kimoiho ky'Abayahudi ekyayetwaga Arimatea. Akaba ali mugurusi omu rukiko, muntu murungi mara mugorogoki. 51Omu ntegeka z'abagurusi b'orukiko, n'eki ekyo bakozire, wenene akaba atabulimu. Kandi yategelezaga Obukama bwa Ruhanga. 52Omushaija ogu akwata omuhanda agya owa Pilato amushaba omubili gwa Yesu. 53Agubamburura aha musaraba, aguzinga omu kirago kya kitaani, aguhumuza omu nyanga y'orwazi, mbali omuntu n'omoi yabaire atakaziikwaga. 54Ekiro ekyo kikaba kili kiro ky'Okwetekateka, kandi Sabato nirwo yabaire nebanza. 55Abakazi ababaire barugire Galilaya na Yesu nabo bahonderaho, babona enyanga, n'okwo omubili gwahumuzibwa omu nyanga egyo. 56Nirwo bagarukire omuka, bakatekateka omugaju n'amajuta g'okwija kusiga omubili gwa Yesu. Aha kiro kya Sabato bahumura, nk'okwo omuhango gwabaire niguragira.

will be added

X\