LUKA 20

1Ekiro kimoi ka Yesu yabaire nayegesa abantu n'okuranga evangeli omuli Rwensinga, abakuhani bakuru n'abeegesa b'Amateka n'abagurusi bamuzinda 2bamugambira bati, «Otugambire, eby'olikukora ebi nobikoza bushoboraki, anga ayabukuhaire n'ohai?» 3Abahorora ati, «Nanye kambabaze; mbwenu aha mungambire, 4Okubatiza kwa Yohana gukatabuka omw'iguru anga gukatabuka omu bantu?» 5Aho babanza kwebaza bonene bonkai bati, «Katuragamba tuti, ‹Kukatabuka omw'iguru,› naija kugamba ati, ‹Aho kubaki mutamwikiliize?› 6Katuragamba tuti, ‹Kukatabuka omu bantu,› abantu bona nibatuteza amabare; ahakuba nibamanyira kimoi okwo Yohana yabaire ali murangi.» 7Kityo bahorora okwo batalikumanya mbali okubatiza okwo kwatabukaga. 8Ndi Yesu nawe abagambira ati, «Nanye timbagambire ebyo ndikukora ebi nimbikoza bushoboraki.» 9Yesu achwera abantu enfumo egi ati, «Omuntu omoi akalima endimiro y'emizabibu; yagira abo yagitunga, yakwata omuhanda yagya omu nsi endijo yaikarayo. 10Obukiro kabwagobire yatuma omwiruwe aha batungwa, bamuhe ebyo babaire belize omu ndimiro y'emizabibu. Kyonkai abatungwa bamutera, bamubinga ngaro zishai. 11Atuma omwiru ondijo, nawe kutyo bamutera, bamujangura, bamubinga ngaro zishai. 12Atuma omwiru wa kashatu, ogu bamuhutaza bamujugunya aheru. 13Aho mukama w'endimiro ayebaza ati, ‹Nkoreki? Ntume omwana wange omugonzibwa, rundi ogwo bakumukunira.› 14Kyonkai abatungwa kabamuboine, begeya bonene bonkai bati, ‹Tumwite, ebyo yakusikire bibe byaitu.› 15Bamubinga omu ndimiro, bamwita. Mbwenu mukama w'endimiro kalilimuleta alibagira atai? 16K'alija aliita abatungwa abo, endimiro y'emizabibu agitunge bantu bandi.» Orwo bahuliire enfumo egi bagamba bati, «Nikikabure! Ruhanga alikasinga.» 17Kyonkai Yesu abaleba agamba ati, «Enshonga y'ekihandiko eki nehai? Kikahandikwa kiti, ‹Eibare ely'abombeki bayangire, nilyo libaire ibare likuru ly'epembe.› 18Buli omoi aligwa aha ibare elyo alisinjagulika; kandi owo liligwaho lilimusinjagura.» 19Omu kaanya ako abeegesa b'Amateka n'abakuhani bakuru balenga kukwata Yesu, kyonkai batiina abantu. Bakamanya bumanya okwo enfumo agichweleire bonene. 20Kityo baikara bamulebeleize, bata nibatuma n'ab'okumunyomoza, abanyomozi nibezora kugamba amazima, nibahiga kwekomya ebyo alikugamba kwija kumutwalira gavana. 21Bamubaza bati, «Mwegesa, nitukumanya okwo ogamba amazima okagegesa. Togira kigonzi, iwe ekikuru kwegesa ebyo Ruhanga agonza. 22Ichwe tusaine kusholera Kaisari omushoro anga chei?» 23Amanya okwo bali ngobya, abagambira ati, 24«Munyoleke edinari. Ekishushani n'ekihandiiko ebili aha dinari egi by'ohai?» Bahorora bati, «Bya Kaisari.» 25Abagambira ati, «Aho ebili bya Kaisari mubimuhe, n'ebili bya Ruhanga mubihe Ruhanga.» 26Balemwa kumukwatira omu maisho g'abantu kumutura ebyo yagamba. Kandi empororo yoyabahorora ebatangaza, besiza. 27Bamoiho omu Bafarisayo abanga okwo habayo okuhimbuka baija, 28bamubaza bati, «Mwegesa, Musa akatuhandikira okwo murumuna omuntu kayakufa aina omukazi atasigire baana, murumuna kifa naragirwa ashwere omuramu abone kuzalira omurumuna kifa abaana. 29Mbwenu hakaba haliho abarumuna mushanju. Owa mbere ashwera omukazi, kyonkai afa buchweke; 30owa kabili 31n'owa kashatu bashwera omukazi ogwo; bona kutyo okwo bali mushanju bakafa buchweke. 32Ahanyuma omukazi nawe afa. 33Mbwenu aha mahimbuka, aha barumuna mushanju abo omukazi aliba w'ohai? Enshonga bona omushanju bakamushwera.» 34Yesu abagambira ati, «Omu makiro nk'aga abantu bashwera, bashwerwa. 35Balinya abasaniire oburora bw'obukiro obulija, nib'abo abalihimbuka omu bafu, tibalishwera anga kushwerwa. 36Aha rw'okuba nibaaba abatakifa rundi, orwo babaire baana ba Ruhanga baiganirane n'abamalaika aha kumara kuhimbuka. 37Musa nawe nayoleka okuhimbuka kw'abafu. Mbali alikugamba ekishaka ky'omuliro, mbali alikwetera Omukama Ruhanga wa Aburahamu, Ruhanga wa Isaka mara Ruhanga wa Yakobo. 38Mbwenu Ruhanga ogwo ti Ruhanga wa bafu; aba Ruhanga w'abarora; omu bwa wenene bona nibarora.» 39Abeegesa b'Amateka abandi bahorora bati, «Mwegesa, wagambage.» 40Okugamba batyo taliho yazilize kumubaza kigambo rundi. 41Abeegesa b'Amateka abo Yesu ababaza ati, «Bakugamba batai okwo Yesu aba mwana wa Daudi? 42Omu Kitabo ky'Ezaburi, Daudi wenene nagamba ati, ‹Omukama akagambira Mukama wange ati: Oshuntame aha bulyo bwange 43kuhika orwo ababisha bawe ndabakunaga omu maguru.› 44Leba okwo Daudi alikumweta Mukama; aho yaba atai mwanawe?» 45Yesu agambira abegesibwabe, abantu bona nibahulira ati, 46«Murayelinda abeegesa b'Amateka abagenda bajwete ekanzu zirai zirai, bagonza n'okuramibwa omu katare, omu sinagogi baagonza okushuntamira entebe ezirungi muno, n'aha magenyi bashuntama omu myanya y'ekitinwa, 47nibalyomejanyia amaju g'entumbwa oku nibezora kushoma enshara ezirai zirai. Balibona ekibonabonyio ekishagireho.»

will be added

X\