LUKA 2

1Omu biro ebyo Kaisari Augusito atekaho omuku kubara abantu bona omu ngomaye. 2Eli likaba lili libara lya mbere, aho Kwirini ali gavana wa Siria. 3Abantu bona bagya kwehandikisa buli omoi omu kigokye eky'obuzarwabwe. 4Yozefu nawe aruga Galilaya, omu kigo kya Nazareti agya Buyahudi, omu kigo kya Daudi, ekyetwa Betelehemu, aha rw'okuba akaba ali w'eihiga lya Daudi, nimwo yatabukaga. 5Agenda na Maria owo yabaire nashelera, aina enda, bagya kwehandikisa. 6Kababaire bali Betelehemu akanya kagoba aka Maria kuzara. 7Azigaija omwana w'omwojo, yamushwekelera omu twendo tw'enkelemeke, yamubyamika omu bwato bw'ente ziliiramu, kuba omw'ikumbi ly'abagenyi omwanya gukaburamu. 8Omu nsi egyo hakaba halimu abashumba abaturaga omw'irungu, nibalinda amahyo gabo omu kiro. 9Omumalaika w'Omukama abahabukira, n'ekitinwa ky'Omukama kibazingora kibamulikira, batina. 10Omumalaika w'Omukama abagambira ati, «Mutatina, kuba leba mbaleteire amakuru garungi ag'ebyera bingi ebiliizira abantu bona. 11Kir'eki omu kigo kya Daudi mwazalirwamu Omurokozi, n'iwe Kirisito Omukama. 12Muramanyira aha kabonero aka: Murashanga enkelemeke eshwekeleire omu twendo, ebyamire omu bwato obw'ente ziliiramu.» 13Aho honkai eihe ly'abamalaika lyetaba n'omumalaika ogwo basingiza Ruhanga nibagamba bati, 14«Ruhanga ahabwe ekitinwa omw'iguru muno, n'omunsi emilembe eraare omu bantu enganzize!» 15Orwo abamalaika babarugireho bakashuba omw'iguru, abashumba bagambirangana bati, «Tushabuke tugye Betelehemu tulebe eki ekyaba, eky'Omukama yatumanyisa.» 16Bagenda n'obwangu, babona Maria na Yozefu n'omwana abyamire omu bwato bw'ente. 17Orwo bamuboine, bagambira Maria na Yozefu ekigambo ekyo babaire bagambiirwe aha mwana ogwo. 18Abantu bona abahuliire abashumba nibabarura ekigambo eki kibabera kitangaro. 19Kyonkai Maria ebi byona abibiika aha mutima, ata nabitekelezaho. 20Abashumba bagaruka nibasingiza Ruhanga, nibamuhaisiliza aha rw'ebyo bahuliire n'ebyo baboine, nk'okwo babaire bagambiirwe. 21Ebiro kabyakeire munaana omwana bakamutahiri, eibara bamweta Yesu, eibara ely'omumalaika yagambiire atakatwetwe nda. 22Akaanya k'okuhasilirwa kwabo kakagobire kuhondera Amateka ga Musa, batwara Yesu Yerusalemu kumuhongera Omukama 23(nk'okwo kyahandikirwe omu Mateka g'Omukama kiti, «Buli mwana w'omwojo omuzigaijo arayetwaga mutakatifu w'Omukama.») 24Bashuba bahonga n'ekitambo kuhondera okwo Amateka g'Omukama galikugamba, «Entungurumaiba ibili anga obwiba buto bubili.» 25Aho omuli Yerusalemu hakaba halimu omushaija nayetwa Simeoni, akaba ali mugorogoki mara muntu wa Ruhanga, ayategelezaga okuchungurwa kwa Isiraeli, kandi na Mwoyo Mutakatifu akaba amulimu. 26Mara Mwoyo Mutakatifu ogwo akaba amushuruliire okwo atalifa ataboine Kirisito w'Omukama. 27Mwoyo Mutakatifu aba n'iwe amukyanulira, aija Rwensinga. Orwo abazaire balesire Yesu Rwensinga, kumukolera okwo Amateka garagiraga. 28Simeoni amutora omu mikono ahaisiliza Ruhanga ati, 29«Waitu Mukama, otaishure omwiru wawe agende omu milembe nk'okwo wagambire; 30aha rw'okuba amaisho gange gabona obuchunguzi bwawe 31obwo watekatekeire abantu bona, 32omushana gw'okwakiza Abanyamahanga, n'okuletera abantu bawe ba Isiraeli ekitinwa.» 33Ishe na nyina batangazibwa ebyamugambirweho. 34Simeoni abaha omugisha ashuba agambira Maria nyina ati, «Leba omwana ogu atairweho kuba busitaro mara bwimukiro bwa bangi omuli Isiraeli, ashube abe kabonero ako baligambaho kubi; 35(kandi embanda elikuchumita ekuturukirane omu mwoyo), ebitekelezo by'emitima nyingi bibone kushuruguka.» 36Hakaba haliho omurangikazi, Ana, muhara wa Fanueli, ow'oruganda rwa Asheri. Akaba yakuzire muno, kandi iba ayabaire amwebohoire bakamara hamoi emyaka mushanju yonkai. 37Kwema aho yasigara ali ntumbwakazi kulemwa kugobya emyaka kinana n'enai. Tiyarugire Rwensinga, yata nafukamira Ruhanga kiro na mushana, nasiiba kandi nashoma enshara. 38Omu saa egyo na wenene ashangwa naija, asiima Ruhanga ashuba amakuru g'omwana ogwo agabarulira bona abaturaga balindiliire okuchungurwa kwa Yerusalemu. 39Kababaire bagobesheleize buli kantu nk'okwo Amateka g'Omukama gabaire nigaragira, bagaruka Galilaya omu kigo kyabo kya Nazareti. 40Omwana akura agira amani, agira n'obumanyi bungi, mara aba nganzi ya Ruhanga. 41Buli mwaka aha kiro kikuru kya Pasika, abazaire ba Yesu bagyaga Yerusalemu. 42Kayabaire aina emyaka 12, bagenda aha kiro kikuru nk'okwo bakagiraga. 43Ekiro kikuru kakyahoire orwo babaire nibagaruka, omwana Yesu asigara Yerusalemu. Abazaire ba wenene tibamanyire kwo yasigarayo. 44Balenga bati aliho ab'ainabo, kityo bagenda orugendo rw'ekiro kyona, aho nirwo babandize kumuhiiga omu banyabuzare n'omuli bataahi babo. 45Kayabuzire bagaruka Yerusalemu nibamuhiga. 46Kabyakeire ebiro bishatu, bamushanga Rwensinga, ashuntamire omu beegesa, abahuliliize mara nababaza. 47Abamuhuliire bona batangalira amagezige n'emihorolereye. 48Kabamuboine batangara. Nyina amubaza ati, «Mwana wange, otutuzireki? Leba sho nanye tukuhiigire twashasha.» 49Yesu ababaza ati, «Mumpigiireki? Mubaire mutalikumanya okwo ndagiirwe kwikara omu nju ya Tata?» 50Ekyo yabagambiire tibakishobokeirwe. 51Agenda nabo, bagaruka Nazareti, mara ata nabahulira. Ebigambo ebi byona nyina yabibiika aha mutima. 52Yesu ayeyongera omu bumanyi n'omu kyema, ashemelera Ruhanga n'abantu.

will be added

X\